हिन्ना ङा विद्रोही नोन हिन्ना
तिल्माला थेनोन विद्रोही
थेसे ह्राङ्ला आपा आमा
म्हेमे मामला फोटोजुगु ब्याङ्सि
ग्ले ग्लेस्याला फोटोजुगु ब्याङ्सि
सालिकजुगु बोसि
मठ, मन्दिर, बिहार
चोक चोकला देवलजुगु बोसि
पुलजुगु बोसि
डहु ज्याङछ्युप (वर पिपलला)
ओथेबा दोङजुगु गुर्ना लासि
माक्र्स, लेनिन, फ्रेडरिक एगेल्स, माओला
तस्विरजुगुसे सजाप लाजि ।
लाथान बोजि ओम
चोक चोकरि
सालिक रेन्सि सेल्युट पुङ्जि
ङाइ आलु देन्बान हिन्ना
पृथ्वीनारायण
राम शाह, मानदेव
त्रिभुवन, महेन्द्र
विपी, मनमोहन, मदन आसेनि
कुलमान, महावीर खाला हिन्ना आसेनि
सेबारि आम्हाइनि
तिल्दाबिसाम चु नाथेमि नेपाली हिन्ना
ङादा झुत्रे नेपालीरि गर्व आरे
ङोसेबा मुला जेक्खे
गोबा मुला फिरग्याप ह्युल
मानवताला महान किस्सा
दोङरापजुगु ।
फिरग्याप ह्युलला ह्युल्सा (भूगोल) ङोसेला
साप्रा ङोसेला
आमा ङोआसे बिले ङोआसे
ङाइ ङालान नाम्सा ङोआसे
समाज, रिम
ह्राङ्लान बु ह्वारा कुना (कान्ला)
छे, सिङ तिलाइ ङोआसे ।
सुटुक्क आलुना पाङ्गे होइले
दारेम पाङ्बारि ताला ताला ले ?
ङा राप्बा चु जाम्बुलिङ
चु भूगोल
विश्व मानचित्ररि
मुबा च्याबा सेम नोन आरे
ह्राङ्लान राष्ट्रिय दाज्र्यु
ज्योमोलोङ्मो, केचनकवल
मेची, महाकाली ङोआसे
हिन्ना ङादा झ्याउरे, सेलो आहा
सेएनोन आतो
मारुनी
ख्यालीला चुट्का ङादा आहा
सोरठी, लैबरी, सालै जो आहा
आहा ङादा
हा नोन आहा
मुन्धुम,
सत्प्रेमला बुद्धला
ॐ मणि पद्ये जपतिबारि आहा
तिल्दाबिसाम
ॐ नमः शिवायला धुनजुगु
दासत्वला संकेतजुगु हिन्ना
छोर्ला ङादा ।
ज्याक्सन, साकिरा
म्याडोनाला ह्वाइजुगुरि स्याबारि सेम निला
खानाङला थेनोन खेबाः (पुराना)
छे सिङ बु लामा कोबा
खेबाः ख्यारख्युरपा भाकाजुगु
ङादा सेतोबा नोनए आरे ।
ङादा आधुनिक
आमिन सेम निला
होली वाईन सेम निला
खेबाः सिर्जनाजुगु बोनोन तोला ।
छार स्हेङ्बारि
खेबाः बोनोन तोला बिबा थाहा मुला
थेतासि ङादा विद्रोह सेम निला
तहस नहस लिच्छाला
तहस नहसफिरि लाबा
क्रान्ति सेम निला
ङा विद्रोही, क्रान्तिकारी
ङाइ ह्राङ्ला लागि जेक्खे आहिन
ह्युल दुइ लागि जेक्खे आहिन
फिरग्याप ह्युलला लागि नोन
बस्
विद्रोह लानोन तोला ।
क्रान्ति लाबारि सेम मुला
तासाइ नोन
आपा आमादा थान्बारि
बृद्धाश्रम स्होचिबा बिमा
ह्युल नोन फ्याबा विद्रोह लाबा सेम मुला
ङादा ङाला ह्युल नोन
फिरग्याप ह्युलरि छयोल्बारि सेम मुला
जय तागाइ
ङा थेन ङाला विद्रोहला !
निजगढ, बारा । दाते : पोखरा (२०७७/७/३)
दोःबा : यकिना अगाध
