नथुनि ह्राङला ओन्छाङ खासि टिबा हुलदा च्यासि टिमुबा । थेतेन प्रे नाम्साला म्हिजुगुइ नोन मुबा । हुल थेला ओन्छाङ खासि थेन टिजि । हुलला ङ्हाच्छा ङ्हाच्छा तारि क्रेसि खाबा जोङ पञ्चायतला सभापतिसे सुङजि, ‘ओइ नथुनि, खाउले । छाङमान नाम्साला म्हिजुगुदा ह्रुप्सि मुसलमानजुगुला दिमदा मेसे दिले ।’
नथुनिसे गोल्छेसे ङ्योइजि, ‘हिन्दु बिबा तिला ? मुसलमान बिबा तिला ?’
हुलग्यामसे स्ह्यान तारि क्रेबा म्हि क्रिङजि, ‘ए हिन्दु हिन्ना कि मुसलमान ?’
नथुनिदा था मुबाकि थे राष्ट्रिय पञ्चायतला मुल्मि हिन्ना । नथुनिसे जाक्कि सुत्ताइ आकोल्नान जोहाब पिन्जि, ‘ङा म्हे मोइबा किसान हिन्ना ।’
थेला चु जोहाबसे हुल चुर्से ओर्से ताजि । ङ्हि नोन तारि क्रेबाजुगु पिङ ताजि ।
यारि राको थोबा चाङमा क्वान क्वान्बा फोदोइ म्हि ङ्हाच्छा वाङजि । थे राउतहट जोङला खाप्पाइबिमा ग्रेन शोसकमध्येरि गि मुबा । थेसे नथुनिदा ङ्योइजि, ‘तिला ए मुसलमानला दिमरि मे दिबारि आनि ओम ?’
‘ङादा स्युप्पा हिन्दु हिन्ना, मुहमदनला दिमरि मे दिबारि आनि ।’ नथुनिसे आलोङना जोहाब पिन्जि ।
‘तिला ए ओराङ हिन्साम आखा ओम ?’ ग्रेनग्रेन काइरि सभापतिसे क्रिङसि पाङजि । थेसे ह्राङला दुइनाले तुम्बाक थोबा मुबा । गाङह्राङ नोन आल्हिक्ना नथुनिसे बिजि, ‘देन्बान ङा आनि, मुसलमानसे ङाला दिम ब्यान्बा आरे ।’
तारि क्रेबाजुगुसे गिसेमगिला न्हाबेङरि सुङ थुइजि । हुल दाबे थाआयाङना फ्राफ्रा छ्योछ्यो ताजि । पुलिसजुगु ओन्छाङ खाजि । सभापति पेबा थेन जोकसे प्योसि टिमुबा । नथुनिदा उन्बान पुलिसला हाकिमदा बिजि, ‘पुलिस, नथुनिदा चुङगो । चु पुरानो किसान कार्यकर्ता हिन्ना । चु किसान नेता हिन्ना, लासि लासि ह्युल्बामातेन गे लाबा कम्युनिस्ट हिन्ना । चुस्से सरकारला विरोधरि ह्युल्बामादा स्वान्बान मुला । चुस्से व्यवस्थाला विरोधरि किसानजुगुदा फ्राफ्रा छ्योछ्यो ताना लाबान मुला ।’
हुलरि दाबे तिरेम काच्याउलि ताजि । गिसेमगिदा ठेल्बा चुजि, तोबा ग्याङबा, काठि थेन गोजा छेबाला काइ थेजि ।
दोःबा : ईश्वर थोकर
