१
(लोपखाङग्यामसे खासि ग्याम्जो (डु दिङला) क्लाङबारि छेजि ।)
आखे (ग्याम्जोदा प्लिक च्याबान) – ग्याम्जो, होमवर्क लाआतो ?
ग्याम्जो (थोपो रिबान) – होमवर्क च्याङना मुला । दाते लाला, आखे ।
आखे (जोक रेबान) – होमवर्क आलाना ए क्लाङसिचे टिबा म्राङमुला । होमवर्क आलासाम एला आपाआमातेन नोन निउ ।
(लि ग्युरु लासि ग्याम्जो किताब कुरि चेप लासि, आखेमाम टिबा दिमग्यामसे फिर्क्याप थोन्जि ।)
२
(ग्याम्जोदा आम्राङना, ल्हानान रे ताजिन्बा मुबा । ङाला सेमसे ग्याम्जोतान म्हाइसि टिमुबा ।)
ङा (आमादा प्लिक च्याबान) – आमा, ग्याम्जो तिल्दा आखानि ?
आमा (ङादा प्लिक च्याबान) – आखेचासे होमवर्क आलाबा बिसि केबा थेमुबा, थेतासिन आखाबा मुला ताला ।
(आमासे ओते तिला बिमुबा, ङा ग्याम्जो मुबा ग्लारि तिखुरिन स्हाङ दोजि ।)
ङा (म्रापकोनग्यामसे दिम्नाङ वाङबान) – चाङ, ग्याम्जो खाइ ओम ?
चाङ (या प्रिम्जोसे उन्बान) – उ थेरि क्यो, बोमो खासि टिबा ।
ङा (ग्याम्जोला ङामरि निबान) – ग्याम्जो, ए तिल्दा बोमो खासि टिबा ?
ग्याम्जो (ङादा प्लिक च्याबान, क्रालि काइसे थेसे ङादा सुङजि) – आप्रेन, आखेसे ङादा क्लाङबा बिसि केजि ।
ङा (ग्याम्जोदा कुरि किन्बान) – ग्याम्जो, एदा आखेसे केबा आहिन, होमवर्क का लाउ बिबोम । होमवर्क जिन्सि, क्लाङसाम एदा खालाइसे आकेसेला । थे केबाइ नोन, एतान लागिरि हिन्ना ।
ग्याम्जो (न्हाबेङ चुङबान) – ङादा माफ लाउ आप्रेन, दारेम ङाइ खाइमाइ ख्योल्बा गे आला ।
(ओते बिसि ग्याम्जो ङाला कुरि लेप ताकाजि ।)
