ब्योन पुस्तासे ङादा ल्हाना ह्राङ्बा ङ्योइबा लाला– तिगा ब्रिबा थेन खाराङ लासि ब्रिसे ?
ङाला कासाल ताला– तामाङ ब्रिबा तामाङ थोरिन तातोला ओम चुदा उद्देश्यमूलक, सिर्जनात्मक थेन मर्यादित स्होतोला । तामाङसे तामाङ ग्योइरि आब्रिसाम स्यान्दो खाल्से ब्रिसि पिन्ना ? स्यान्दो आमाग्योइजुगुला सन्दर्भरि नोन चु लागू ताला । चु सन्दर्भरि ङाला फ्यास्हिङ मुला–
१) सेबासे तामाङ ग्योइरि ब्रिस्ह्युगो । च्याङ्ना सेबा थेन आसेबासे ‘ग्योइ शिक्षण’ (तामाङ लोप्के) पाठ लोप्सि बिले खानाङए लोप्सि तासाइ नोन ब्रिस्ह्युगो ।
२) मुल ताम ह्याङ्से ब्रिबारि आवश्यक मुला, डोबारि आवश्यक मुला, काठुइ लाबारि आवश्यक मुला । चुग्याम्से डोबा ठिमला विकास ताला । आमाग्योइला विकास तासेला मुला । चिन्तन मन्थन लाबा आधार तयार लासेला मुला ।
३) ब्रिमा सरल बिमा सरल वाक्य ब्रिस्ह्युगो । खाम्साम गोर सोम ब्लि छिग जेक्खे । छिग पोप्बा आहिन, ब्रिबादा चुस्त स्होस्ह्युगो । ब्रिसि जिन्माहेन्से ह्राङ्से पाङ्बारि म्हाइबा ताम सम्प्रेषणीय ताजि आतानि रेम रेम जाँच लास्ह्युगो । दोसि खाबा, छ्याप्बा थेन आतोबा छिग थेन विचारजुगुदा ब्याङस्ह्युगो ।
४) ब्रिबा उद्देश्यमुलक तातोला– क) लोप्बा खालला तातोला ख) लोपपिन्बा खालला तातोला ग) ग्युइसे प्लिङ्बा ग्योइ स्होबा तातोला घ) ग्योइदा सरल थेन सहज स्होबाला लागि काठुइ लाबा खालला तातोला ।
५) स्थानीय थेन माउलिक छिग म्हाइसि ब्रितोला । चिन्तन नोन माउलिक तातोला । चुसे ब्रिबाला छे ह्रेङ्ना लाला ओम डोबारि अभिप्रेरित लाचिला ।
६) ह्याङ्ला ब्रिबा सिर्जनात्मक ताबारि आवश्यक मुला– क) ग्योइकाइ सिर्जना लाबा ख) ह्राङ्ला ग्योइदा ग्युइसे फ्युक्पो स्होबा ग) आमाग्योइदा सम्प्रेषणीय थेन बोधगम्य स्होबा ।
७) ब्रिबादा डिक्ना लाबारि टिकाटिप्पणी, क्योइताम वा समालोचना लाबारि आवश्यक मुला । चुह्राङ्बा प्रतिक्रिया सकारात्मक, रचनात्मक थेन मर्यादित ताबारि आवश्यक मुला । ह्याङ्ला प्रतिक्रियाग्याम ह्राङ्दा सच्याप लाबारि खाम्गाइ, उत्प्रेरित तागाइ थेन काप्बा हाउसला डिक्गाइ ।
चुनोन आधाररि ङाला ब्रिबादा नोन स्हिगो ओम टिकाटिप्पणी लास्ह्युगो । ह्राङ्ला टिका टिप्पणीसे ङादा जेक्खे आहिन तामाङ ब्रिबादा नोन ‘रोड म्याप’ तयार लाबारि ह्रो लासेला मुला ।
कार्तिक ८ २०७१
दोःबा : यकिना अगाध
