ङा बिजाला साङ्मारि
सेम चङ्गाह्राङ फ्याङचिबा दुइरि
ङाला यारि अभिभावकसे
पिन्माहेन्से फ्यागुर, छाङ, डा
डुइ, ब्ले दुर्गम नाम्सा
थेन पुख्र्याउली दोइ
हाल्सि पिन्बा बाम
आज्याबा ठिम थेन आज्याबा थोपसाङसे डामतिबा खाटाजुगु
पुइसि कुल्दुम स्हुइबा (वामे सरेका) टुहुरा ।
छार युग च्यार्बा अनकन्टार
ब्लेजुगुरि
डाक्कार ल्हाप्तेला बातेन छ्याम पोरे ताबा
म्हारम्हेन्दो म्हाङ
साल्किला डासे कादे दिङ पुइजि
आपासे ख्लासि निबा ल्हाङ्ला पोकोलजुगुरि ।
आउदिन रोबा लामुबा
लिउला म्हाङजुगु
तासाइ आफेनि म्ल्हा
सिंचाइ आरेबा सुनजुगु ग्याम्से
ङाला पौराखी टुला फ्रुमजुगु
खानाङए आस्याप्नि
दान्देइ आरेनिम
दान्देइ आसार्निम ।
सिमसार आरेबा कामी गाङरि
ख्रिनला म्हेस्योङरि
आउदिन होमुबा ङाइ
वाईबा स्योङ्ला क्युइ ।
घोरेन्डे ठेल्डी खेप्पा
खामुबा ङाला ब्राङरि
लोपपिन्मुबा हलो छाप्बारि
तारि, बाछिलो थेन राँबो
क्याबा लामुबा ङाइ करुवा, फाली थेन अनौं
मोइमुबा तारे जोबाने म्हेतेन
ह्राङ्लान केवाला पाटाजुगु ।
म्हाइमुबा
गोङ्मा गोङ्मारि
तिङग्याम ताइबा मोतीला फ्रुम
छ्याप छ्याप स्याप्मुबा ह्राङ्लान रहर
च्यार्सि सेबा लासजुगु
नाइसि ब्योङ्मुबा मिख्लि दोसि
ङाला तामाङ जात केबा
नेपाली साप्रारि ।
ज्योमोलोङ्मोला कुरि
थेनोन सिन्धुलीला ब्लेजुगुरि ।
कोल्मुबा ओन्छ्यान जय देश ! जय नरेश !! रि
डेना लासि सपाट केवाला छे
हाँकतिबाकेन मुबा गान्बाला कुल्बारि
साइलुङ, तेमाल, थाङपाल, नाम्लाङ थेन सेमजोङला नाम्साजुगु
मैना सुगाह्राङ डुङ्बा
म्हारला पिन्जडारि लालमोहरला काजुगुसे ।
खोल्मा डाँडा, सिन्धुली ।
(छिगला अर्थ : कठै– ओन्छ्यान, निश्चलता– साङ्मा, खुर्पा– फ्यागुर, अविभारा– दोइ, कुरीति– आज्याबा ठिम, दुर्भाग्य– आज्याबा थोपसाङ, सुनौलो– म्हारम्हेन्दो, कल्पना/सपना– म्हाङ, दाना– फ्रुम, केवा– जिन्दगी, केबा– जन्मेको, छे– आयु, भुजेत्रो– डाक्कार ल्हाप्ते)
दोःबा : यकिना अगाध
