म्हानज्या सोम जि थुङ्सि टिल्ला तासि गुर्बा मुला । रेदा खुम स्होसि मु न्हान्सि । बेफिक्री मुला । तिलाइ दुइरि छोर्बा मुला । रङ (नसा)से सोत पुइमाहेन्से ।
बिटुलो ताबाकेन लाबा युगतेन ङिच्चा स्वा उन्सि ख्रेन्सि जिला रङ ल्हागाब तासि सि लाबा सेदा सेबाकेन मुला । ङा सेला हत्याचार नाथे सेला । हुत्ती मुबा हिन्साम राज्यला का ङ्हाप्बाला लाबारि तासेला मुबा हार्दिक हत्या । तासाइ, ङाइ थेह्राङ लाबारि आखाम ।
ङा लाछीसे खाम्बा बिबा प्राबा दिनिला स्हेररि चिसि दुइ बर्बाद लाबा हिन्ना, थेए नोन ङ्ह्योइसि । गे आरे बि कि आरे बिसे । लासम मुला गे । आला आपा आमादा घुर्कि उन्सि चाबारि सेबा मुला । थेतासिमि ह्राङ्लाजुगुग्याम नालायक मिन उपहार याङ्बा मुला । गज्जबला मुला ह्याङ्ला समाज ।
ल्हानान समस्या गुङ्ला ग्रेन समस्यादा क्लेसि काफ्युर स्होबारि ग्रेन गे म्हान्ला । ङा थेनोन समाजला उपज हिन्ना । समाजसे तिला लाला थेनोन च्याला । तिला च्याला थेनोन लोप्ला ।
ओइमाकेन क्योलोलो गणतन्त्र विदवसला दुइसाङरि ग्रेन ज्यानमारा ज्यानमार केसग्याम्से उन्मुक्ति याङ्सि ख्लाबा मुला केन्द्रीय कारागारग्याम ।
तिनि थे तिलाइ आलाबा निर्देष म्हि बिमा नोन कु ब्लासि ब्राबा मुला सहरला बजाररि । ग्लानि फिटिक्ककान आम्राङ लिरि । अभिमान छ्योल्बा ङेबा ङेसि निर्धक्क सोबा मुला ।
ह्राङ्ला गुमाप लासि अधमरो केवा सोबा मुला पीडितदा थेसे रेदाङसे रेमरेम सेबा मुला । थेला चुरिफुरीसे ।
दुइ थाल्बाकेन मुला, दुइ बिकाप तासि विश्वासजुगु विश्वव्यापी लिरि मज्जासे लिलाम ताबाकेन मुला । न्होररि !
देन्बान, स्यान्दो ताम मुला । दिमदिमला राप । म्लेबारि आदेबा आपाङ्ना आताबा । न्होरला लागि बैंस थारो स्होसि, दिमम्हेदा प्लुत ख्लासि हुलला हुल बैसालु ब्योन युबा मुला ठासि (छरेर) बिबा जाम्बुलिङ नाङ ।
स्याप्बा मुबा तिल्मा म्हुनाला म्हाङरि साहारा मरुभूमि ह्राङ्बा अरबला ग्रेन निर्जन मरुभूमिरि । तिलाइ ब्योन ह्रोजुगुदा । थेनि न्हा दुखी मुबा । न्हा ताङ्बा मुबा । बिबाकेन मुबा बस् केवा न्युटलरि चलप ताबाकेन मुला ज्योज्यो ।
याखारगि लिरि जाकि ल्हाना वान (घोर, बाक्लो) निराशा छ्योङ्बा म्राङ्सि ।
‘तिला ताजि आले’ बिबा ?
थेसे बिबाकेन बिजि, ‘ज्योज्यो ङालाम जाम्बुलिङ नोन ब्लुम्जि ।’ थेसे मिख्लि ताइना लाबारि चुजि ।
थेलिच्छा तिलाइ ङ्योइबा हिम्मत आलानि ।
म्हाङग्याम दोसिखाउ ङोनछुपरि । ङोनछुपसे उन्जि लिखन्डि दुनियाँला नरसंहार खानाङ म्हिसे म्हिदा सेबाकेन लामा ताङ्बा म्हि ।
म्हिसे म्हिदा तिल्दा सेला ?
म्हिसे म्हिदा सेबा बम तिल्दा स्होला ?
चुह्राङ्बा ङ्योइबाजुगुला कासाल खाजिबा म्हिसे पिन्सेला हिन्ना ?
‘थाहा आरे ।’
तिलाइ दुइ ङ्हाच्छाला ताम हिन्ना ।
युट्युबरि थोपसाङ (भाग्य) म्हाइबाकेन लाबा चर्चित भाग्य ङेङ्गोरसे लिसो दिमला भिडियो स्होसि सार्वजनिक लाबा मुबा । ङाइए नोन रेमरेम च्याबा मुबा ।
खानाङए, दारेम लिसो दिम स्होबाजुगुसे च्याबाजुगुसे च्यापुङ्बाला लागि तासाइ नोन लिसो गेमि लाबा आहिन ? थेतासि खाइमागिमि छोर्ला !
दारे ङाए नोन नाकाकोला ठोना लाबा नाका न्हाला । के केना लाबा रा न्हाबारि तिला । खाम्देदोना न्होङ्सि ल्हेबारि ख्लाबा आइराकला स्विमिङ पुल स्होसि क्याल्बा बिजनेस लाला ।
ङाइ तिला तिला म्राङ्ला । मुतेबा लिसो लिसो म्राङ्ला । खाइ ङा केमा लिसो केजि कि आलिसो थाहा आतानि । थाहा मुबा गिक्खे पात्र आमादा ओन्मान बिदा लाजि ।
मिनेट गि ल्हाना सोबारि छोदा टाङ्सि ह्यार्बा राँगाला चित्कार म्राङ्सि ।
आम्राङ्बा बाङवान दोसि भाला थेन खुँडासे छ्याक छ्याम ताना लासि थासि गुर्ना लाबा म्हिजुगुदा स्याप्सि गोर्खा दक्षिणबाहु तक्मासे डेन लाबा सेम ताला । ह्राङलान म्हि चुङ्सि छाबा न्होररि सफलता म्राङ्बा म्हिजुगुदा डेन मुला ज्याबा चेगाइ मुला बिबा सेम ताला ।
लिसो ताम आलिसो म्हि, मुतेबा लिसोन लिसो । नाम ताइबा मौसमरि ग्लिङ ताइला । ग्लिङ ताइमा दुइरि डुइ निला । दार्से ल्हानान स्हे लिसो ताबा याङ्मुला । गाङ थासि केक खाराङ लासि ग्युर्ना लाला । स्योङ स्यान्दोलान झोलारि दोना लासि ह्राङ्ला बु ह्वारादा बाँझो स्होला ।
खाइ तिला चुह्राङ्बा चुह्राङबान आज्याबा ठिमला ताम ताजिबा दुइदा ‘अधुनिक युग’ बिमुसिम ? चु ङाला ङ्योइबा आहिन आसेबा जिज्ञासा ह्राङ्दान हिन्ना ।
ओ होइ !
ख्लापिन्गो ताजि चुह्राङ्बा बेफजुलला स्यामो ह्राङ्बा तामजुगु तिला दाम्मान ताबा आताबा मुतेबा ताम खात्दामान लासि लातोबा ताजि ।
(पाँचखाल–११, काभ्रेपलान्चोक, दाते– लिमासोल, साइप्रस ।)
दोःबा : यकिना अगाध
