एसे आगो प्रिय !
ङा चोन निसि लोङ्सि
अलास तलास ताबान
मिख्लि पुइसि,
तिक्खुरि ङ्हुबाग्याम छोर्बा
ङा नासि आहिन !
ए रेगि गि
चुनोन म्हान्मुसिम
ङाला म्हि नाबा दोजि !
आमाला या, ह्रोला ह्रो
प्रकृतिला चेगाइ,
क्युइ, सा प्रकृतिला नाता !
एदा तिला थाहा मुला ले प्रिय !
ए सहररि केजि
गुडिया थेन क्लाङ्बा स्हेतेन क्लाङ्जि
धाइ, बाइजुगुसे ख्वासि चाजि !
ताइस्या !
साप्रारि चिसि, साप्रारि छ्योल्बा
गाँस गि साप्राला थाङ
मिलग्लोङ्सिम च्यागो
मि च्युम्सि
सर्को गि ह्रो बु बुन्सिम च्यागोम
हिन्बान ङाला थोपसाङ आरेबा
प्रिय !
खाइमा आमासे
योला नाकाला गिक्छा ङ्योइबातेन
स्योला ह्यालाला आतामान
पोकोरि ह्रोबा
माकाइ, मोठेला काइसे म्हेर्बा छोर्मुबा !
ए मोबाइल, रिङटोन थेन अलार्मला ताम लाला
वाहा प्रिय !
प्रकृति ह्राङ्सेन
कोबा ह्राप्बा थेबा मुला, मुला ले ?
प्रकृतिला छ्याम
थे केवागा केवा !
एसे आगो प्रिय !
लर्को ल्हागतिसि
नाम्सानाङ्ला ह्रोजुगुतेन छ्याम
माकाइ, मोठे ङेबान
छे, सिङ, मेलापात, छ्योकु, तिथी, जात्रा !
प्रिवा, स्याकाकोबा, भजन, चुड्का, ङेबा क्यालो ।
उफ,
एसे दार्से ताङ्बा डिस्को
दोहोरि ङ्यासे, कक्टेल पार्टी
ओम पिकनिक मुलाले पिकनिक
न्होर आरेना
सातान ताला मेलापात, थेरि ङान्ना नाम्सारि !
नाम ताइबा डान्ना
ह्रो आलेजुगु
दिनि प्रामा छ्याम नोन मुला
ग्योइ, स्योङ झरनाला कुरि
सिल्बा क्रिप
ब्राना ब्रानान गोङ्माइ दाङ्से डान्बाजुगु ।
वाह प्रिय !
रेमरेमरि म्हान्ना,
ङा बन्दीगा मुलाकि, सहररि ?
ताला झल्याँस्सा !
बस ! चोदे हिन्ना चोन थानिउ
जेक्खे दुखेसो केवारि
एतेन आहिन, ङा ह्राङ्तेन छ्याम
खाल्से आडोनि क ख ग घ नाम्सारि
ए ह्राङ्नोन जेबा बखान लाला ।
हिन्बान ! ग्रान फाला
नाम्साला ताइस्या ठेउकी नोन
मुला ए बिमा गुणा
काङ्सासे लि जेक्खे तिला ख्रुजि बिसाम
मेकअपलाम तिला ताम,
फेसबुक जेक्खे चलप लाबारि सेबा हिन्साम
भाइरल नोन तासेला
प्रिय ! चु दुनियाँरि
क्यार नाम्सारि !
एसे आगो प्रिय
ङान्ना फेबा जाम्बुलिङ ताला
थरि ङान्ना नाम्सारि ।
निजगढ १२, दाते :नयाँबजार पोखरा
(छिगला अर्थ : नाबा– रोगी)
दोःबा : यकिना अगाध
