प्रत्यक्ष प्रसारन लाबारि
ङादेन आरे आधुनिक क्यामेरा, माइक्रोफोन, टेलिभिजन,
रेडियो, अनलाइन या युट्युव च्यानल
मुला, तिगाइ छिगकादे जेक्खेन
थेन छिककादे डिक्सि दोसेला मुला
म्लेला आखाम्बा गोरगिक ह्वाइखा ।
किर्तिपुरला गेटथेङान
दुगु लाला ख्रोबा छेप्पादा ब्रेबन
तेरेरे जेक्खेन गुर्बा मुला, गोरगिक खेप्पादोबा जाम्बुलिङ
थेला गोर ङि सिबिरिक्बा मिकादे
आबोल्ना
ब्यान्बा, आथुम्बा थेन टिन्बाला
बिभत्स तोसोसे सेबा म्हाङकादे
माइबान च्यासिन चिबा मुला
तोर तोर मुरिक्यार ।
ङाइ म्राङसि चिबा मुला
आरेबाला दोइ पुइना पुइनान थेला चिवारि
चु ह्युल्ला नक्साबिमा ह्रेङबा म्हे्र छ्याबा मुला
ङ्होला ङेर्माङकादे
चु ह्युल्ला क्षेत्रफल बिमान च्युगुरुक्क ताबा मुला ।
सार्लान आम्याङना थोबोग्याम
सुप माबा मुला गाङसाल क्रा ।
ग्राम्बारि मुला थेला नाम थेग्यारला बिमा ग्रेन पोगोल
ल्हानान दिङहेन्से फोइदानला स्योङ
थोनोन ग्याम तासि ब्योङचिबा तातोला
थोला पेक्पा ना
सोङ हार्बा सुङ फिमि
ग्लिङ म्युसि जिन्बा युङबाह्राङ काम्सिङ हार्बा खारे
लेबाफेबाला साम्राज्य पुइना पुइनान म्रिप्पा बाम
नाङबा प्लेबाला दोइ पुइना पुइनान कुदुरु ताबा छिङमा
सडकपेटिरि स्योन्दोलोङ थेला सिबा ल्हुइछेन्देसे
ङोसिचिबा मुला ह्याङदा
ह्याङ सोसिचिबा व्यवस्थादा ।
थेला छ्युल्दुर मुख्खुनला यासे
थे गुर्साइनोन
ख्लाबा आरे चुङबारि डा
अझ कुङना लाबा मुला चु दुइरि या कुन्दुर
सायद थे छेबान मुला फोइदान साम्राज्यविरुद्धला युद्ध
खिगे मान्बा मुला प्राङबोदा सेबा ब्यवस्थादा प्रेछान्सि
थेन ख्लुप्सि ब्लिङबारि ब्राग्याम ।
बिडम्बना ! चु दुइरि थे
डा बामरि हाल्सि गुर्सिचिबा मुला किर्तिपुर गेटङामरि ।
थेला काङसु लिङगडि मुला
पुर्गुल जाम्बुलिङ पुइसि राप्पा
थेला काङ फ्लानोन लिङगडिन मुला
जसरि लिङगडि मुला
सत्तारि चिसि कुल्बा हत्याराकादेला कासे ख्रुबा लि
खाचुबाइ हल्ला आलाना
आरे शोक धुन
कुटिसि ! कुटिसि !
देप्पेन खाइमाइ आछोर्ना लासि गुर्बा मुला थे ।
म्हि पोप्पा मुला थेला ङामरि
कुनिरि राप्सि सेल्फि किन्सिचिबा मुला रमितेकादे
हस्याङ फस्याङ लासि छ्योङसि दोगोबा मुला युट्युबरकादे
हतारहतार स्योङबा मुला क्यामेरा
थेन, एक्स्क्लुसिभ लाइभ तासिचिबा मुला चुग्याम ।
ह्युल या शितलनिवास
ह्युल या सिंहदरबार
ह्युल या बालुवाटार
फुइसिन चिबा मुला ……
चु ह्युलरि खालाइ फोइदान तासि सिसेला आरे ।
फोइदानसे, नाबाछाबासे, आरेबासे
अपमान थेन घृणासे तेरेरे जेक्खेन गुर्बा मुला
गोरगिक खेप्पादोबा जाम्बुलिङ
या, सुर्यबहादुर तामाङ ।
फापरबारि, मकवानपुर
