खाइमा खाला फिसे कुल्सि
ल्हानान ह्रेङ्बा दुइदोना जोर्सि थान्बा
तासाइ क्योलोलो दम पिन्मा कोबारि चुबा
ओन्माला मोडलला घडीला पुर्जाजुगु ह्राङ
कोबारि चुला सरकारी संयुन्त्रजुगु
ओम दिरि चिसि फिसे कुल्बा ङ्यान्बारि
कु ब्लाक्ना लासि रापचिबा रोबोटजुगु
लाबारि चुला एखाम ङामख (तँछाड मछाड)
खाइमाइ आम्राङ्बा फुर्तिला लिखन्डि उन्बान
बिले थेसे क्योलोलो गाङ फोसि चे स्होला
‘कुल्बा’ फिरि ‘कुल्बा’ काप्सि थेन्से
‘कुल्बा’ जारी लाला
दिरि लाइन ल्हागतिसि चिबा फिला कुल्बाला इशारा ब्रान्चिबा
जाजाबा क्लाङस्हे (खेलौना) ह्राङ्बा रोबोटजुगुदा
थे ओतेबान आतुर मुला फिरि चिसि कुल्बाजुगुदा ताङ्ना लाबारि
थेदा चोदे थाहा मुला
ह्युलला सेवा लाबा बिबा
फिलादा ताङ्ना लाबा हिन्ना ।
खाइमा खाला फिसे कुल्बा
ओम तिबारि चुला टिप्पणीला क्लाङ (खेल)
प्रिवारि नाम्सादिमरि स्याबा रोटेपिङ ह्राङ
स्याला टिप्पणी
फिला इशारारि
रोबोटजुगुसे गुच्युलटारी ख्वाइसि सुपम्हाना लाला टिप्पणी
ओस्सोन स्याप्ला टिप्पणी
फिरि निला टिप्प्णी
दिरि खाला टिप्पणी
तिला आउदिन गोप्य चिसाङजुगुला ताङ
थेनिजेक्खे दाखिला ताला चिसाङरि
खाल्दा लाबा मुला ह्युलसे भरोसा
कुल्बान कुल्बासे चोदेनोबा टिप्पणी
म्लाङ
पिङ
वाला
अक्षररि प्लिङ्सि
डोबारिन आखाम्सेला ह्राङ लासि
दोसि फिरि दोला
ओम मुतेबा क्लाङ नुप्ला (टुङ्गिन्छ)
खाइमा रोबोटला नायकसे
फिरि चिसि कुल्बासे म्हाइबान ग्योइरि
लिच्छाला हस्ताक्षरला फुर्बा ठोक्सि ब्रिला
‘फिला कुल्बा आन्सार सदर ।’
फिला कुल्बासे ख्योन (विषाक्त) दोबा
ह्युल चलप लाबा संयन्त्र
फिलान कुल्बारि चलतिला
चिबा रेबा लाला
कोसोक कोसोक ब्राला
छ्योङ्ला
ब्लाप्बा न्हाला
काइ प्राबा स्होला
काइरि डेन लाला
फिलान कुल्बारि खतरा किन्ना
फिलान कुल्बारि बिटुलप ताला ।
फिला कुल्बा ङ्यान्बारि
नियुक्त लाबा
चु इन्टेलिजेन्ट रोबोटजुगु !
क्योङ फिरि दोबाजुगु आता
ह्युल थेन ह्युल्बाला भरणपोषण लाबा ‘उपरवाला’
फिरि दोते दोमा
थेन्से धर्म ख्राङ्सि चाजिन्बा ताला
ब्रम्ह ख्राङ्सि चाजिन्बा ताला
खाल्से धर्म ख्राङ्सि चाबा मुला
थेदा तिलाइ लोङ्बा आता
खाल्से ब्रम्ह ख्राङ्सि चाबा मुला
थेला खाजिबाइ भर आता
च्याङ्नारि थेनिकादे
रोबोटला स्युप (खोल)ग्याम माङग्यार थोन्सि
चु ह्युलला रखबारी लाउ
फिरि चिसि कुल्बारि पल्काप ताबाजुगुदा
खबरदारी लाउ !
फिला कुल्बामि
बेमौसमरि खाबा नामसे बाबा खहरे ह्राङ्बा हिन्ना
थेसे डुइरि ल्हुपिन्बा नाम्साला क्रा
ओम मार नाम्साला मेरि लापिन्ना ब्लुम्ना (डुबान) ।
दोःबा : यकिना अगाध
