(‘मानसिक वार्ड’ न्हाङरि ब्रिबा व्हाइखाजुगु) :
नर्स : गि
थेदुइरि ङाइ
एदा
खाजिबा अर्थरि पाङ्बा मुबा
दाते
यकिन आतानि
मानसिक वार्डह्राङ्बा
स्वर्ग ङादा
स्यान्दो आछोर्नि ।
नर्स : ङ्ही
स्यान्दोसे ङादा ‘म्योबा’ बिला
स्यान्दो नोन बिला
तिला तिला बिला
बिला
एसे
जेक्खे एसे आबिनि
‘थुजेछे (आभार) ।’
नर्स : सोम
एला मिला नुप्बारि (गहिराइ)
ङाइ ङादा स्याप्जि ।
नर्स : ब्लि
ङादा
थाहा
आरेमुबा
जाजाकि नोन
थाहा
आरेमुबा
एसे हापख्वाइमा हेन्से गा
थाहा
याङ्जि
क्योलोलो
थाहा याङ्जि
हापख्वाइबाला लेप्बाडोइ ।
नर्स : ङ्हा
ङा थोमनिचिमुबा
ङाला मिला ङोन्छाङ
एला
ङ्यामङ्याम्बा जुम्बिजुगु कोबा तिला म्राङ्मुबा
ङा देन्बाला
देनरि (धरातलरि)
खुत्रुक्क
फाप्जि ।
नर्स : डु
एसे बिमुबा–
‘ङाला फिरि नोन
ह्वाइखा
ब्रिउ ले !’
एसे ओराङ बिबा ङ्हाच्छान
एला मिनरि ङाइ
तिलाइ ह्वाइखा ब्रिजिन्बा मुबा ।
नर्स : ङिस
नामा (अस्वस्थ) नोन
ङाइ ह्वाइखा ब्रिबारि आख्लामुबा
ब्रिचिमुबा
ब्रिसिन चिमुबा
रेमरेम ब्रिचिमुबा
ब्रिबाला
चोदे डोइखाबा उर्जा ङाइ
ए ग्याम्सेन याङ्बा मुबा ।
नर्स : ब्रे
स्यान्दोसे ङादा बिबाकेन मुबा–
‘म्योबा,
बहुला,
मगज स्योर्बा…’
स्यान्दोसे चोदे बिना बिनानोन
एसे
ङादा
थेन्नान गुङरि चेगाइसे हापख्वाइजि
ओम गर्व लासि पाङ्जि–
‘ङाला प्रिय ह्वाइखाब्रिखेन ।’
नर्स : कु
ङा क्राबा म्राङ्बातेन
ह्राङ्ला
रुमालसे ङाला मिख्लि फ्यापिन्सि एसे बिमुबा–
‘क्राला देला ओम ?’
एसे
ङादा
ओते बितेमा
एला मि नोन
थाहान आताना
च्योर प्लिङ्जिन्बा तामुबा, ङाला मि ह्राङ्नोन ।
नर्स : च्युइ
एसे
ङादा
एला डायरीरि
(ब्रिउ,
तिलाइ ताम, चेगाइसे ब्रिउ ।) बिजि ।
ङाइ
ङाला
छोनछोन दार्चिबा जुम्बिजुगुसे
ब्रिपिन्जि, चोदे ब्रिपिन्जि–
‘ङाइ एदा चेगाइ लाला ।’
नर्स : च्युइसे गिक
एसे ङादा पाङ्बाकेन मुबा–
‘ए गिक्खे आरे,
ङा मुला ।’
‘जाम्बुलिङ मुला, मु मुला,
दिनि मुला, लानि मुला,
हान्डो मुला, ग्युरु मुला,
सुस्केरा मुला, उमङ्ग मुला,
लाक्र्युङ मुला, ग्यालाम मुला,
क्योङ क्योङ मुला… ।’
‘तिला थे क्योङ एला प्रियजनजुगु आहिन् ?’
नर्स : च्युइसे ङ्ही
तिर्यामला ह्रुपरि
एदा
ङाइ सुटुक्क बिजि–
‘मानसिक वार्ड न्हाङरि ल्हानाः ङा उदास तामुबा,
तिला तिला डान्सि क्रामुबा ।’
एसे
नोन
ङादा बिमुबा, गर्व लासि सुटुक्क बिमुबा–
‘मुख्य ताम मि,
एसे ह्वाइखा ब्रिमुबा, ह्वाइखा ।’
नर्स : च्युइसे सोम
एला ङ्होरि ङाइ
चोदे च्योजि
चोदे च्योजि
चोदे च्योजि कि
कादे एसे ङाला जुम्बिजुगु च्योबा मुबा ।
नर्स : च्युइसे ब्लि
एसे ङादा ल्हानान स्हे पिन्जि
चेगाइ
विश्वास
ङोसेबा
प्रेरणा
सद्भाव
उत्साह
केवा
ह्रो
क्योङ क्योङ पिन्जि
ङाइ बिसाम एदा
‘थुजेछे !’ बिमा
तिलाइ पिन्बारि आखाम्नि ।
ङादा माफ लाउ ह्या !
नर्स : च्युइसे ङ्हा
मुरि
खासुसे
दुइदुइरि जेबा लिजुगु (आकृती) कोरतिचिबा ह्राङ्बा
ह्रिरि
चराजुगुसे
छेमनिबा काइरि चिरबिर चिरबिर चिरबिर लाचिबा ह्राङ्बा
गाङग्याम
झरना
सुमधुर सङ्गीतरि छङ छङ छङ छङ लासि मार मार ताइचिबा ह्राङ्बा
गुम्बारि
याखारगि
पवित्र मन्त्र “ओम माने पेमे हुँ …” नासगिसे होङ्चिबा ह्राङ्बा
एला मुस्कान ।
नर्स : च्युइसे डु
एसे ङाला ङ्होरि
केवानाङ
चुह्राङ नोन लासि
एला डोइखाबा या थानपिन्साम
ङा धन्य तासेला मुबा ।
(छिगला अर्थः केवा– जीवन)
दोःबा : यकिना अगाध
