मुतेबा देन्बा कम्युनिष्टजुगु सिद्धान्तनिष्ठ थेन ह्युलभक्त जेक्खे आहिन, फिरग्याप ह्युलवादी ताला । कम्युनिष्टजुगु ह्राङ्ला आमाह्युल रक्षा लाबारि अन्याय थेन अत्याचार लाबा खात्दामान ग्रेनबाङ (महाशक्ती)तेन नोन छेला । कम्युनिष्टजुगु आलोङ्बा थेन निस्वार्थी ताला । कम्युनिष्टजुगुसे यमग्लेला म्राप आङ्निबा साहस लाला । अन्याय थेन अत्याचार लाबा न्हाङह्युल (राष्ट्रिय) थेन अन्तर्राष्ट्रिय खात्दामान बाङ (शक्ति)ला ङोन्छाङ संघर्ष लाबारि लोङ्बा, थोबो कुर्बाजुगु थेन आत्मसमर्पण लाबाजुुन्हा कम्युनिष्ट हिन्गाइ, न्हा ओम थेनिकादे प्रजातन्त्रवादीन हिन्गाइ । थेनिकादेम जेक्खे कायर थेन सच्चाइला लागि छेबारि आखाम्बा क्लिछिर हुतिहाराजुगु जेक्खे हिन्ना । थेतासि खाजिबाइ फिरग्याप बाङबा ह्युलसे लाबा आक्रमणला कम्युनिष्ट पार्टीसे सातान लिब्रो लाला थेन भत्र्सना लाला । साम्राज्यवाद थेन विस्तारवादला कम्युनिस्ट पार्टीसे लिब्रो लानोन तोला । जाम्बुलिङरि साम्राज्यवादी ह्युल थेन विस्तारवादी ह्युल मुतेदोना खाजिबाइ ह्युलला ह्युल्बासे शान्ति थेन सुरक्षाला अनुभुति लाबारि याङ्सेला आरे । थेनिकादे जाजाबा स्वाधीन थेन सार्वभौम ह्युलजुगुरि आक्रमण, अतिक्रमण, प्लेबानाङ्बा थेन दबाब पिन्चिबा ताला ।
जाजा ह्युलदा खाइमा आर्थिक ह्रो ओम खाइमा विकासला योजना उन्सि च्योच्योआताबा (असमान) सन्धि सम्झौता लाबा ताला बिसाम खाइमा ह्युलला स्रोत साधन ह्राङ्ला नियन्त्रणरि थान्बा ताला । बिले, पुँजीवादी ह्युलजुगु अमेरिकी साम्राज्यवादसे भारतीय विस्तारवाददा ह्राङ्ला दलाल स्होबा थेन भारतीय विस्तारवादसे नेपालला सरकाररि निबा शासक थेन शासक दलजुगुदा दलाल स्होसि खाइमा गिसेम गिरि डिक्ना लाबा, खाइमा गिसेम गिरि छेना लाबा लासि ह्युलरि राजनीतिक अस्थिरता लाचिबा, ल्होलो विकासला लोभ लालचजुगु उन्सि नेपालला स्योङ गान्दिजुगु कोशी, गण्डकी, महाकाली, टनकपुर, माथिल्लो कर्णाली, अरुण तेस्रो थेन पश्चिम सेतीला छ्याम जलस्रोतजुगु ह्युलघाती च्योच्यो आरेबा सन्धि, सम्झौताजुगु लासि एकाधिकार पँुजीला कब्जारि थान्बा, नेपालला सिमानाजुगु नाङ्बा थेन म्हुक्गिरिन सीमास्तम्भजुगु छुम्सि तोङ्जा हेक्टर नेपाली सा भारतरिक्यार दोना लाबा गे भारतीय विस्तारवादसे लासि नेपालदा दुङाल पिन्बा गे लाचिबा ताम दिनि तेबान छर्लङ्ग मुला । ओस्बान लासि अमेरिकी साम्राज्यवादसे नोन नेपालीरि दिङ दाङ्से ५५ अरब अमेरेकी डलर आर्थिक अनुदान पिन्बा थेन नेपालला आर्थिक उन्नती बाङ्से ताबा लोभ उन्सि दातेला थेन लिउला अमेरिकी नीति थेन कानुनदा ङ्यान्तोबा ह्यलघाती एमसीसी सम्झौता थेन अमेरिकी सेनासे नेपाली सेनाला ब्यारेक सोझोन कब्जा लाबा ह्युलघाती एसपीपी सम्झौता नोन नेपालला संसद्ग्याम कानुन च्योच्यो लासि अनुमोदन लाजि ओम पारित नोन लापिन्जि । चुह्राङ्बा ह्युलघाती सम्झौता सजिलोन पारित लासि ह्युलफिरि घात लाबा नेपालला शासक दलजुगु कांग्रेस, एमाले, माओवादी छ्याम मधेशवादी दलजुगुसे ह्राङ्दा ह्युलघाती थेन ह्युलद्रोही दलला लिरि राप्ना लासि ङोसेना लाजिन्बा मुला ।
दारे ह्युलभक्त न्यायप्रेमी नेपाली ह्युल्बाजुगुसे चु ह्युलघाती शासक दलजुगुदा ङोसेसि निर्वाचनरि सचेत तासि ह्युलभक्त दलजुगुदा मतदान लासि संघर्ष लाबा थेन ह्रो पिन्बान ह्युलघातीजुगुदा दण्डित लातोबा दुइ मुला । चुह्युलघाती शासक नेता थेन पुँजीवादी पार्टीजुगुला लुबा आश्वसन, भोजभतेर, न्होर थेन स्यान्दो स्हेजुगुरि ह्राङ्दा पशुला साइरि चुङ्सि चुनावरि भोट पिन्ना आदे । चोदे पिन्बा खण्डरि नेपाली ह्युल्बाजुगुला ह्राङ्ला ह्युल थेन ह्राङ्ला अस्तित्व म्हाना लातोबा स्थिति खासेलारि खाजिबाइ शंका आरे । ह्राङ्ला काङरि ह्राङ्सेन तारि छेप्बा सबित तासेला मुला । थेतासि कम्युनिष्टजुगुसे आक्रमण, अतिक्रमण थेन प्लेबानाङ्बाला बहादुरी थेन दृढताला छ्याम लिब्रो लातोला तासाइ ह्याङ्ला ह्युलला रेमरेम सरकाररि निबा कम्युनिष्ट बिबा पार्टीजुगु माओवादी, एमाले थेन ह्राङ्दा लोकतान्त्रिक दल दाबी लाबा नेपाली कांग्रेससे नोन फिरग्याप ह्युम्हि आक्रमण, अतिक्रमण थेन प्लेबानाङ्बाला लिब्रो आलाबा थेन ह्युलला उद्योग कलकारखानाजुगु निजीकरण ला िह्युलला जाजामेजुगुदा रोजगारला मिनरि फिरग्याप ह्युलम्हिदा ग्याप्पा स्होसि चुङ्बा थेन क्योङ ह्युलदान फिरग्याप ह्युलपाःला छेला पासोरि पारतिपिन्बासे चुनिकादे कम्युनिष्ट, प्रजातन्त्रवादी थेन ह्युलभक्त आहिन । चुह्राङ्बा किसिमला फिरग्याप ह्युल्पाः आक्रमण, अतिक्रमण थेन प्लेबानाङ्बाला प्रतिकार आलानि बिसाम खाजिबाइ दुइरि नेपाल ह्राङ्बा स्वाधीन थेन सार्वभौम ह्युलजुगु साम्राज्यवादी थेन विस्तारवादी ह्युलजुगुसे ह्राङ्ला नियन्त्रणरि किन्बारि खाम्ला ।
हिन्ना कम्युनिष्टजुगु देन्बा माक्र्सवादी थेन लेनिनवादी तातोला । खुश्चेभला ह्राङ्बा माक्र्सवाद, लेनिनवादला जामा क्वान्सि देन्बा कम्युनिष्ट पार्टी आता । ह्राङ्दा ग्रेन थेन शासक दल बिसि कम्युनिष्ट पार्टीजुगु कम्युनिष्टला सिद्धान्त थेन विचार व्यवहाररि आखा । माक्र्सवाद थेन लेनिनवाददा ग्यालाम ओन्बा सिद्धान्त तेन्बा थे दलला नेताजुगु खाइमाइ नोन आमूल पोबा ताम आला । वर्गसंघर्षदा तोबास्हे आम्हान । थे दलला नेताजुगु बहुमत गेलाबा ह्युल्बाला पक्षरि आराप, बहुमत गेलाबा ह्युल्बाला पक्षरि कानुन आस्हो । थे दलजुगु खाइमा सत्ताला नेतृत्व लाला, ओम खाइमा प्रमुख प्रतिपक्षरि चिला । थेन्ना उद्देस्य बिबा नोन कम्युनिष्टला भजन कोसि सत्तारि निबारि बाङ लाबा, सत्तारि चिबा थेन प्रतिपक्षरि चिमा सरकार गुर्ना लाबा ताला ।
प्राबा प्राबा ताम लासि सत्ताला लागि चलखेल लासि ह्युलला लि आपो । चु संघीय लोकतान्त्रिक गणतन्त्रसे बहुमत गेलाबा ह्युल्बाला सेवा लाबारि आखाम्बा दुइसे ओनजिन्बा मुला । तिल्दाबिसाम चु पुँजीवादी डिछ्या हिन्ना । पुँजीवादी डिछ्यासे पुँजीपति वर्गलान सेवा लाला । जाम्बुलिङरि ताचिबा ङ्हाप्बा, दुल्बा, अन्याय, अत्याचार, सेबा, हिंसा, ब्यान्बा, विध्वंस थेन युद्धला कारक नोन पुँजीवाद हिन्ना । विश्व सर्वहारा वर्गला महान गुरु कार्ल माक्र्ससे बिस्ह्युमुला, ‘पुँजीवादी व्यवस्थारि सरकार बिबा पुजीपति वर्गला संचालक समिति जेक्खे ताबा लाला । ओम थे समिति बिबा पुजीपति वर्गसे ह्राङ्ला स्वार्थ अनुरुप ह्राङ्ला हितरि चलप लाला । गेलाबा वर्गला सेवादा थेसे वेवास्त लाला । थेतासि पुजीवादी डिछ्यारि पुजिपति वर्गला हालीमुहाली ताबा स्वभाविक हिन्ना । थेकारण बहुमत ह्युल्बाला सेवा आलाबा पुँजीवादी डिछ्या पोबारि कम्युनिष्ट पार्टीसे पुर्वाधार स्होसिकेन नितोबा हिन्ना । माक्र्सवाद थेन लेनिनवाद फिरि कम्युनिष्ट पार्टी थेन कम्युनिष्ट सरकारला उद्देश्यफिरि ह्युल्बादा सेना लातोबा हिन्ना, संगठित लातोबा हिन्ना । तिला गैन थेन शासक बिबा कम्युनिष्ट पार्टीसे थे जिम्मेवारी छ्योना लाचिबा मुला ? छ्योना लाचिबा आरे बिसाम ह्युलरि खाराङ लासि कम्युनिष्ट शासन चलप ताला ? खाजिबाइ कम्युनिष्ट पार्टीसे सरकारला नेतृत्व लाबातेन कम्युनिष्ट शासन आता । थेतासि मुतेबा कम्युनिष्ट पार्टीजुगु समाजवादी गणतन्त्र स्हेङ्बारि ङ्हाच्छा वाङ्तोला । समाजवादी डिछ्याला लागिरि ग्लेठिम लातोला ।
काभ्रे
दोःबा : यकिना अगाध
