गुनासाजुगुदा मुद्दती खातारि न्होर पोप्माह्राङ उसि (गुम्स्याइ) थान्बाजुगु
चल्ती खातारि खात्दामान दुइरि मनोनमानी
कारोबार लामाह्राङ गुनासो लाना लानान आब्लाप्बाजुगु
चु थरि ङ्हीला म्हिजुगु ङादा अचम्म छोर्ला
तिल्दा लाला गुनासो ? तिल्दा उसि थान्ना
खाला ह्राङ्ला वशरि आरे
सिबादोना (मरिहत्ते) तिल्दा लाला ?
ङाला आपाला याफ्लारि छ्युल्दुर रेना लाबा हलो
अनौ थने कुरिला युतेन
ङाइ खाइमाइ आलानि गुनासो
छे थामा छेला मुठातेन
ङाला आमाला या थासि का ब्योङ्ना लाबा हाँङ्सुतेन
ङाइ खाइमाइ पौंठेजोरी आक्लाङ्नि
पुर्खाजुगुला ओन्माहेन्सेला
टु ब्योङ्सि खेतपाती लाबा सादा खाइमाइ बदख्वाइँ आलानि
तो, कुरि, हाङ्सु, छाङ, डा, छोदादा
ङाइ खाइमाइ तिरस्कार आलानि
ब्लाप्ना लाबा हान्डो थेन काङ्सु दार्ना लाबा
ग्युरुतेन ङाला खाइमाइ हिम्मत आब्रेनि
तिल्दाबिसाम ङाइ ङाला म्हाङला
स्युग (वेग)दा द्रुत गतिरि नोबारि दोना लाबा मुला
थेनोन नोबासे ङाला म्हाङ्दा ङोन्छुपरि पोपिन्बा मुला ।
स्यान्दोलन ताङ्बारि ताङ्बारि आखाम्बाजुगु
स्यान्दोला दुङालरि उत्सव तेन्बाजुगु
केवारि सुखानुभूति खाराङ लासि किन्से बिबा आसेबाजुगु
गुनासोदा चल्ती खाताह्राङ खात्दामान दुइ
कारोबार लासिन, डाहाला ताङ प्लिङ्ना लासि
खाइमाइ आब्लाप्बाजुगु
मेहनत लातोला, मानवतादा केन्द्ररि थान्तोला
रेमरेम प्रयास लातोला
देन्बारि विश्वास लाबारि लोप्तोला
असफल तामा लोङ्बा थेन सफलतारि म्योसि
साला गा ताङ्ला ताबा बानीदा ख्लातोला
गुनासोला कारोबारदा डिक्ना लासि थान्तोला ।
(छिगला अर्थ : उबा– गुम्स्याउनु, स्युग– वेग)
दोःबा : यकिना अगाध
