म्राङ्जि तिनि दृष्यजुगु नोन
अचम्म अचम्मला
ह्योसे ह्योला काङ थाबा
याखारगि ह्योसे स्यान्दो ठगदा चुङ्सि
ह्राङ क्युइफिला फ्रुबा (ओभानो) दोबा ।
खालाइ फेजि (उदाए) ग्लेठिमरि
बर्खाला नामरि ताइबा सेर्बाह्राङ लासि
खानाङ निसे ? खानाङ दासे ? तिल्दा निसे ?
आरे विचारला ग्याम थेन गन्तव्यला स्पष्ट टुङ्गो
ब्राबा मुला थामथोम (अन्धाधुन्ध) लक्ष्यहीन तासि ।
भ्रष्टाचारीदा कारबाही लाबा
समाजदा सुधार लाबा
थेला योजना थेन उद्देश्य मुला रो
जादुला काडिह्राङ डान्बाचिम थेसे
ह्रेच्छाकरिन गन्तव्यरि दोबा दुस्साहस लाजि ।
नाइबा (फोहोर) क्युइरि स्याल्सि (नुहाएर)
साङ्बा (सफा) ताला बिसि छोर्बा
स्यान्दोला बाम क्रेसि
जिन्ना लाबा कल्पना लाबा
भ्रष्टाचारीला तोक्मा जुसि
भ्रष्टाचारला टा स्योइला बिसि छोर्बा
थेला रेम्हाङ (दिवास्वप्न) जेक्खे हिन्ना,
ग्लेठिम मुर्खताला पराकाष्ठ हिन्ना ।
थाहा आरे थे
खानाङ ग्याम परिचालित हिन्ना,
खाल्से खाराङ लासि पुइगाबा हिन्ना ?
लाला थेसे कुटिसि समर्थन
ह्युलघाती एमसीसी सम्झोताला
एसपीपी सम्झौतारि नोन
थे कुटिसि चिला ।
लाला आलोचना सर्वसाधारणसे
फिग्र्यापह्युल ठग बिसि
लाजि मतदान ह्युल्बासे
ह्युलला लिउ थेन ज्याबा (असल) युवा नेतृत्व म्हान्सि
मुला रो मुद्दा थेला
अमेरिकी अदालतरि कर लुबा (छली)ला
दुस्साहस फुइबाकेन मुला थेसे
चुरि नोन मुद्दा ताजि सहकारी ठगीला ।
सरकार मिन लाबा ठगसे आम्राङ
नेपाली नागरिकदा नक्कली भुटानी
शरणार्थी स्होसि चुङबा,
आम्राङ थेसे
ललिता निवास सा काण्डा
गिरिबन्धु टि स्टेटला सा काण्डा
वाइडबडी काण्ड
अरबौं न्होरला
सहकारी ठगी काण्ड
काण्डान काण्डरि सरकार ज्योप्पा ।
स्वार्थ डिक्ते
सदाचारला लाथान बिसि कुख्वाइबा
स्वार्थ अडिक्मा ह्रो ख्लामाहेन्से
भ्रष्टाचारी बिसि गिसेम गिदा ल्याक्पा छेक्पा
याखारगि ठगदा ह्वाङरि युसि
ह्राङ छाङ्मा दोबारि म्हाइबा
ठगदा चुङ्बा कोलकोले (कोकोहोला) काइ लासि
ह्युल्बादा थेरिक्यार नोन कोल्ना लाबा
ह्योफिरि चन्डाल ल्हागतिबा ह्राङ्बान हिन्ना ।
(छिगला अर्थ : फ्रुबा– ओभानो, पर्सिनु, कोलकोले– कोकोहला)
दोःबा : यकिना अगाध
