शिशिरसे लिखन्डि ताना लाबा खेप्पा दोङला डालीरि
क्योलोलो पालुवा बुबाकेन लाबा दुइ
ग्लिङ्ला न्हान्बा ब्याङ्सि
गो छेङ्बाकेन लाचिबा पहाडरि
पिङ्छुप फुइबारि म्हाइबाकेन लाबा दुइ
तिरेकुनु मुबा ।
प्रतिपदाला म्हुन
गाङ्साल अधुरो म्हाङ्दा
अबोध स्योला बार्दलीरि फ्लाक्सि
बलिदानसे बोल्बा डान्बा
गाङ्साल खाली तिसला ग्यालाम ताबान
डान्बासे ओसतिबा
ओसिलो सेमला डेङरि
तस्वीर दोसि लेपताबारि दोगाजि ।
सनाखत ताबारि लेङ्बा
ङोआसेबा क्रिपतेन वाङ्गाजि
थाल्सि निबा दिङजुगुरि ह्राङ्नोन
ङाला म्हाबा ताङ्बा
ज्युमङेसि ताङ्बा बोलासि ब्राबा
जात्थाररि जात्थाररि
हटिया मेलारि, सौतेनी लेबारि
निजीकरण लाबा निजी केवाजुगुरि
लाथान, चैत्य, गुरुम्रापहेन्से गुम्बारि
म्हुनला लानि होइसेररि
अस्थिर अस्थायी सेमला तरेलीरि
उदास ङ्यासेजुगुरि
छ्योल्बा म्हाङजुगुरि
विपत्तिसे गाप्बा म्हाङजुगुरि
बिना सर्त
बिना कारण
खामुबा ओम निमुबा
ङाला म्हाबा ताङ्बा ।
दिङ्छा ताजि ताङ्बादा म्हाइबारि
ङ्होदा तमासा स्होसि सोबा
खालाइला हिक्गु आदोना
खालाइलाई साङग्युर ङ्योइबारि परआतिना
थानथान तासि चितोबा मुला ङाला नियति
घात थेन आघातला लाबासे
पोरपोर तासि थिबा मुला कु ।
कारण आरेनान थारेङ ताबा मुला ।
ल्हानान ह्रो
ला आरेबा लाथान ह्राङ्बान
नाम आताइसाइ यारि थोबा
छाता ह्राङ्बान
ताइबान, पाप्बान, रेबान
आडान्बाजुगुला डान्बा दोबान
मिख्लि ह्रुप्बान
उमङ्ग, उधारो किस्ता किस्ता ग्लुबान
म्हाइबाकेन मुला
ङाला म्हाबा ताङ्बा ।
पाँचखाल, काभ्रे
दोःबा : यकिना अगाध
