हिंसाला क्राबा क्रिङबा थेसाइ नोन
या ह्राप्सि चिबा
क्रुरतासे खारे नाङसि
काइजुगु डुङचिबा
चु ह्युल
खाइमा
खाइमा ङालाइ नोन ह्युल दोला ?
फेबादा ह्राङला कुरि सुसि
पासबिकता फुइना लाचिबा
बर्बरता रुइचिबा
चु ह्युल
खाइमा ङालाइ नोन ह्युल दोला ?
ङाइ ङादा स्हुखाजि बिमा
ङाला स्हुरि ग्लाडाक्टिबा
ङाला पोररि चाचाचुक ड्वाबारि उद्दत ताबा
चु ह्युल
खाइमा ङालाइ नोन ह्युल दोला ?
ङादा दुब्र्यबहार ताजि बिमा
ङाला कुरि स्होन्बो ब्याबा
ङादान दुनियाला ओन्छाङ स्युर्बा
चु ह्युल
खाइमा ङालाइ नोन ह्युल दोला ?
ङा फेबारि (बिभेद) परतिजि बिमा
ङाला ल्हेरि म्युङगुर क्युपिन्बा
ङाइ मुक्तिला कल्पना लामा
ङाला क्रास्या ख्राङपिन्बा
चु ह्युल
खाइमा ङालाइ नोन ह्युल दोला ?
ङाइ न्याय ह्रिमा
ङालान अपराधिजुगुदा कुख्वाइबा
ङादान माङग्यार ब्याङबा
चु ह्युल
खाइमा ङालाइ नोन ह्युल दोला ?
चेतनाला म्हेदाङ म्रासि
ङाइ ह्यालरि सोला बिमा
ङादा दोप उरि क्युपिन्बा
ए पाखन्डिजुगु हिन्ना !
चु ह्युल
खाइमा ङालाइ नोन ह्युल दोला ?
तिला ङाइ थिनोन तोबा हिन्ना कर्दा, तारि
तिला ङाइ ग्रेनोन तोबा हिन्ना एला ताज्यारि चुलेसि, हाङसु ?
तोङजा दिङ नासि ख्योल्बा ङाला बामसे
पुइनोन तोबा हिन्ना मिसाइल ?
दारे दोङजाऔं दोसि
ङाइ मे दिसेला मुला बिद्रोहला !
ओम च्यासेला मुला रमिता एला क्रासि मेफ्रा दोजिन्बा
ढोङ्गि, प्रतिगामि अस्तित्वला !
