रुम्बा ज्योज्यो

मकवानपुर जोङला कुलेखानि ङामरिन टेकर मिनला नाम्सारि केबा हिन्ना रुम्बा ज्योज्यो । टेकररि केसाइ नोन ह्राङला आस्याङला तिम याम्बु जोङला फर्पिङ ङामरि खुदुङ (हँुडु) नाम्सारि चिबान खाबा हिन्ना । जाजुबारिन आपा सिजिम थे ताबासे आमासे आस्याङला तिमरि बोर्सि न्हाबाचिम । आमासेन आस्याङलान तिमरि ख्लासि स्यान्दोतेन फादा निजिम थेराङबा आज्याबा अवस्था म्राङसि ह्राङलान आसुसे रानिबन नाम्सारि बासि ह्राङलान तिमरि थान्जिम । आपान सिबासे आमान जाजुबा कोलादा ख्लासि फादा निबा थेराङबा बिजोग अवस्था म्राङसि तिङ स्हुखासि नानाला जा ङालान जा हिन्ना पाङसि सुख याङगाइ पाङबान रानिबन नाम्सारि रुम्बा ज्योज्योदा बाबा हिन्ना रो । म्हिजा नोबान आहिन तुन्बान आहिन तार नोन आहिन म्लाङ नोन आहिन ठिक्काला मुबा पाङ नोन तोमा । ह्रुइजा रुम्बा हिन्ना बिसाम वास्तविक मिनजा कृष्णबहादुर हिन्ना । नाम्साला म्हिकादेसे ङोसि रुम्बा चिबा फुम्बा कामि पाङमुबा । ङाइ पाङतोमा जजुबाहेन्देन म्राङबासे स्याम बोम्जनला तिमरि आचिना गि ङाला आपाला आङिला तिम दिरि वाइबा वाइबा बिबा ङाइ थेबा मुबा थेलान तिमरि रुम्बा ज्योज्यो चिबा मुबा । ङामरिन धनपति स्याङतानला तिम मुबा बोम्बोला के लाबा ङान्छे म्राङमुबा । थे ताबासे रुम्बा ज्योज्योसेन धनपति स्याङतानदा गुरु थान्सि बोम्बोला मन्त्र लोप्जि बबोम्बोन ताजिम बिगे ल्हानान दिङ बोम्बोला के लासि नाम्सा नाम्सारि कोर्सि हाजिम । ङ्हा ह्राप्सि नाम्सा नाम्सारि कोर्बान नागा थासि फुर ताङबान स्या म्लागान चि आइरक थुङम्याङबासे ल्हानान ख्लारि दोम्याङजिम । रानिबन नाम्सारि बोम्बोला के लाबान रुम्बा ज्योज्यो छार्जिम ब्याने ताजिम यागारगि बिसि तिगान आता दारेम तिमनाम लाउ बिसि धनपति स्याङतानसे सुङजिम । ह्राङलान गुरुसे थेराङबा ल्हेङमो सुङमा हेन्दे पाक्कान हिन्ना पाङसि थिङस्यादा ओम्सि चुरोङबा थेराङबा ओराङबा लाबान जालमाया लासि तिमनाम लाजि ।
बोम्बोला के लाबान बालाजु कपडा उद्योगरि जागिर चाजिम । बोम्बोला के लासि ङ्हा ह्राप्सि ह्रामे ओन्सि नारि च्यासि बिरामिदा फान्ना लाबा नागा थासि साइसि थेराङबा आज्याबा के लाला आदे बिबान ह्राङला आस्याङला तिम ङामलान लामा गुरु लोसे थेराङबा ल्हेङमो रुम्बा ज्योज्योदा सुङजिम । चुरोङबा केजा थालाउ तारेम एसे लामा लोप्सि लामाला ग्यालाम चुृङगो ए केवा फयुन ताला तारेम तिनि हेन्दे लामा ङातेन लोपखाम्ला सुङजिम । तिङरि लामा गुरुला ल्हेङमोसे टाजिम वा थुर्जिम थेमा हेन्दे रुम्बा ज्योज्योसे लो लामादा गुरु थान्सि लामा दोबा के लाजिम । नागा साइसि ङ्हा ह्राप्सि चुजा पाप ताजि तारेमजा चुरोङबा आज्याबा के तिनि हेन्दे ङाइ ख्लाजि तारेम लामा दोला पाङसि अठोट लासि लामा दोना लोप्पा के लासि धानेछोन नाम्सा नाम्सारि दोबा मुला । लामा लाप्पा हेन्दे रानिबन नाम्साला ह्रोकादे बुधे लामा कुम्भकर्न लामा, जुठे लामातेन छ्याममा प्रासि पुजा लामा म्हि सिमा घेवा लामा ख्लागिरि पोत तासि लाबा ङाइ म्राङमुबा । ङाच्छाला थिङस्या खुयु माबा हेन्दे रुम्बा ज्योज्योसे ङिच्छा ग्लानस्यातेन ब्रेल्साङ लाजिम । थेबिमा लिच्छाजा निघरे नाम्साला गोलेस्यातेन सेम निसि ह्राङला तिमरि खुयु मुना मुनान च्याङबा स्या बाजिम । ग्लान स्यातेन गोले स्या ग्याम्से जा ब्रे केबा मुबा बिसाम दाते थेनिकादे खालाइजा लामा दोसि खेन्पो ताबा मुला । खालाइजा फिक्र्याप ह्युलरि जागिर चाबारि निबा मुला दुबइरि । रुम्बा ज्योज्योसे सुङमुबा ङादा च्यागो आले थेबा ०४६ साल बिमा ङाच्छा ङाइ लामाला के लाबा दुइरि लामाला गोइलो खोन्मा, पुजा लामा, खापसाङ लामा, छेवार लामा, ब्रेल्साङ लामा, घेवा लामा जेक्खेन खोन्दोबा के जिन्बा हेन्दे गोइलो स्युसि झोलारि पोरे लासि छुम्सि थान्तोबा अवस्था मुबा । ह्याङदा दातेला ह्राङ लासि खुल्ला रुपरि प्राबारि बन्देज लासि थान्मुबा बिगेवा आपिन्मुबा । राज्यसे ह्याङदा नाङसि प्लेसि थान्मुबा कारन ह्याङ तामाङ ताबासे लासि । रुम्बा ज्योज्यो तामाङला कोला तासाइ बाइग्योइ, शेर्पा ग्योइ, भुटानि ग्योइ, हिन्दि ग्योइ ज्याना लासि पाङखाम्बा मुबा ख्यालखट्टा लासि बिगेवा सवाल जवाफ लाबारि लिच्छा आताबा म्हिला रुपरि रुम्बा ज्योज्योदा ङाइ म्राङबा मुबा । ख्याल ठट्टा लाबारि खालाइसे आस्याप्पा बाइस्याकादेदा बाइ ग्योइरि ङोबा मुबा, तामाङस्या कादेदा तामाङ ग्योइरि, शेर्पेनिकादेदा शेर्पा ग्योइरि, मगरस्याकादेदा मगर ग्योइरि, गुरुङस्याकादेदा गुरुङ ग्योइरि सवाल जवाफ लासि ङोबा मुबा । जाजुवा हेन्से ब्योन थेन खेप्पा खुयुदा न्हेना प्रतिभा मुबा रुम्बा ज्योज्योतेन । निबा दिङ सोम ङाच्छा ङाला जा च्याङबाला ब्रेलसाङरि रुम्बा ज्योज्योदान ङाइ ङ्योइबा मुबा । रुम्बा ज्योज्यो ङाला तिम चाबहिलरि दोखाजि ङाइजि ताम्बा थेन डम्फु ह्राप्बा ह्याइकोबा डम्फुरे म्हेन्दो कु बासि सेरगेम लाबान मुबा । रुम्बा ज्योज्योसे म्रापग्याम्से कोठा न्हाङरि थेराङबा ज्याबा के लासि तामाङ रिमठिम सोना लाबा के कुडिसि स्युजिम आउदिन ताङजिम । ताइ बिसाम ङा याम्बुरि चिबा तामाङला कोला तासाइ नोन ह्राङला रिमठिम ख्लाला आदे बिसि प्रबा म्हि थेताबासे ङाइ थेराङबा ठिम दाङबा हिन्ना । रुम्बा ज्योज्योसे तिगा मान्बाचिम एमि याम्बुरि चिबा एला जा च्याङबाला ब्रेल्साङ लामा बैन्ड बाजा ह्राप्सि जन्ति बोर्बागा बिबा सेमरिर ङाइ मान्मुबा थेला लिसो ताजि । बेनान जन्तिकादे बसरि ख्रेसि चाबहिलग्याम्से चक्रपथ महाराजगन्ज गोगंबु बसपार्क ताबान बालाजु सिंगुन, कलंकि, स्युचाटार ताबान तोरतोर जिवन हसनटार मिनला नाम्सारि ब्रेल्साङ लाबा तिमरि दोजि । थेरि ह्याङ जन्ति निबा कादेला लामासे डेन लासि म्हेमे वाला टिका ख्याप्सि बे्रल्साङला डाजाङरि थान्जि । थेरि ह्राङला ह्राङला ङेवाङगोर ङ्योइसाङ लाबा कादेसेन वाला टिका ख्याप्सि मोलम पिन्जि । डम्फु ह्राप्बा डम्फुरेतेन तामाङ ह्वाइ कोसि फुरफुर ताङसि जन्ति निबाकादे आउदिन स्याजि । पाल न्हाङरि जन्ति निबाकादे बेनासेन थुङबा सिम्बा कोक, स्प्राइट, आइरक छ्याममा पुलाउ सोल्सि यामजाकि लिच्छा ह्याङला ताम्बासे तारेम ह्याङसे तामाङला रिम ठिमला ताम लातोजि सुङजि थेराङ तासि ङाइ सम्धिदा ह्राङला ताम्बादा न्योइ स्हिगो बिसि म्होइजेन लाजि । तारेम ह्राङला ताम्बातान ङा पट्टिला ताम्बा ख्लागिरि पोप तासि तामाङला चारदामला के जिन्ना लातोजि । सगुनपोङ थान्सि म्हेम, माम, आङि, आस्याङ, आपा आमा, आपाथेबा, आमाथेबा, नाना म्हागेन बेनादान ङोसेना लादोला । हसनटार नाम्साला ताम्बा ज्योनखासि कुर्सिरि थ्यानस्युजि न्हेबेङजा ज्याना लासि आथेबारो थे ताबासे जाकि अप्ठेरो ताजि तारेम तिगा लासेदा बिसि काठुइ लाजि । काठुइसे समस्याला हल लाजि जन्तितर्फ ग्याम्से बोर्बा ताम्बाकादेन ह्योन्जन ह्याङला बुसिङ ताबासे लासि ह्याङजा मयुङ तर्फ ग्याम्से ताम्बाला के लाला स्याङदान थेन मोक्तानकादे तर्फ गि चिसि सवाल जवाफ लाजि । रुम्बाय ज्योज्यो डोङ रेसि सिगो ताम्बा जुगु ङाइ ह्राङकादेदा मोइजेन लाला ताइ बिसाम चु नाम्साला तामाङकादेसे तामाङ ताम आगोबागा थेतासि तुन्बारि लासिगो । ङाइ ङाला ह्रो थेन ह्रोला ज्योज्यो दार्जिलिङ ग्याम्से न्योइलाङ लासि तामाङला रिमठिम चुराङबा मुला होइ तिरेम स्हिबारि ज्योनस्हिगो बिसि जन्ति बोर्बा मुबा । तामाङ ताम आसेबाला कारनसे लासि ङाइ ताम्बा सत्तलसिं ह्योन्जनदा ज्यार्दि ग्योइग्याम्से चार दामला बारेरि ह्राङसे प्रष्ट रुपरि केवा हेन्दे डोङबा दुइ दोना चुरोङ चुरोङ लादोला बिसि थानपिनस्हिगो बेनासेन ज्यानालासि गोबारि खाम्ला बिबान ङाइ मोइजेन लाजि । ज्यार्दि ग्योइ ग्याम्सेन दातेला ब्योन दार्दो तामाङ पुस्ताकादेदा छोरङान छोरुवा स्यांगुर पिन्दोला ओन्दोला मासि निलाबा रिमठिम ह्याङसे सोना लातोला बिसि रुम्बा ज्योज्यो ङादा ल्हानान थुजेछे बिबान आउदिन ताङसि न्हेसि न्हेसि य पक्कन वास्तविक तामाङ ङाइ म्राङसि सुङजि । चारदामला के जिन्ना लाजि दार्जिलिङ ग्याम्से ज्योन्खाबा डोन्बोजुगु आउदिन ताङजि ताइ बिसाम थेकादेसे थेरेङबा रिमठिम दातेदोना आम्राङनि रो । थे ताबासे ङादा ल्हानान थुजेछे मुला बिबान हाप ख्वाइजि ङादा । हसनटारला ज्यार्दितेन वामनकादे छक्क ताजि थेरेङबा तामाङला बाजा डम्फु ह्राप्सि तामाङ ह्वाइ कोसि फुरफुर ताङसि स्याबा खाइमान आम्राङबा मुबा रो तामाङला वास्तविक ठिमजा ह्याङसे च्याम्याङजि ल्हानान ताङजि ह्याङला तर्फग्याम्से ताम्बाकादेदा फ्याफुल्ला सुङजि । तामाङला गोइलो खोन्सि तामाङ पहिचान ओनबारि ह्राङकादे सफल दोनस्युजि थेला लागि ह्राङकादेदा दोसिन फ्याफुल्ला चु नाम्साला तामाङकादेसेन तारेम गोला ह्याङसे मान्बा मुला । ज्यार्दि थेन वामनकादे छक्क ताजि । रुम्बा ज्योज्यो लामा तासि तामाङ नाम्सारि कोर्बान गोबान ख्ला ख्लाला रिमठिम ल्होलो ल्होलो मुला आले थेबा सुङमुबा । ङाला जा च्याङबाला ब्रेल्साङ लासि सोम प्लि लिच्छाला ताम हिन्ना ङा नाम्सारि निबा बिसि माइक्रोबस ख्रेबारि पर्यटन बोर्डला ङामरि चिचिबा मुबा ङाला ङामरिन रनिबन रानिबन पाङबान खलासिसे ङ्योइजि । माइक्रोबस ग्याम्से फुत्त ताइसि रुम्बा ज्योज्योसे ङादा म्राङजिम ओ आले ओ आले सुङसि ताइ ज्योज्यो ङाइ ज्योज्योदा प्रश्न लाजि । रुम्बा ज्योज्योसे ओइमा एला जा च्याङबाला ब्रेल्साङ लाबा ताम्बाकादे ङादा तोजि । दातेजा ङादा फुर्सद आरे ज्योज्यो लिच्छा ह्राङदा फोन लासि खबर लाला पाङबान ङा रानिबनरि दोजि । सोमरे लिच्छा ङाइ रुम्बा ज्योज्योदा फोन लाजि ओइमाजा ङादा फुर्सद आताबासे ह्राङतेन ताम लाबारि आम्याङनि तारेम ह्राङसे सुङगो बिसि ङाइ रुम्बा ज्योज्योदा मोइजेन लाजि । च्यागो थेबा आले एसेजा एला जा च्याङबाला ब्रेल्साङ लामा ङाला तिङ थुर्जि तामाङला रिमठिम एसे तामाङ नाम्सारि ओन्सि ङामि आउदिन ताङजि थेताबासे ङाला ह्रोलान ब्रेल्साङ लाबान मुला एला जा च्याङबाला ब्रेल्साङ लाबा ताम्बाकादे ङादा तोजि सुङजि । ताइ आता रुम्बा ज्योज्यो थेला बन्दोबस्त ङाइ लाला म्हेर्सि चिबा ब्योन तामाङकादेदा ह्याङसे तामाङ रिमठिमतेन ह्वाइकोसि छिङतोला ङाइ ज्योज्योदा पाङजि । तुरुन्तान ङाइ ताम्बा सत्तलसिंह ह्योन्जनदा फोन लाजि । ङाला नाम्साला लामा रुम्बा ज्योज्योला ह्रोला जाला ब्रेल्साङ लाइ लाबा रो थेताबासे ह्राङदा ङाइ फोन लाबा हिन्ना याङलाकि आयाङ ताला योनान सुङगो बिबान ङाइ मोइजेन लाजि । ताम्बासे ङादा सकारात्मक जवाफ दोन्जि ताइ आता ज्योज्यो जिम्मा ह्राङसे किन्दोला सुङजि थेला जिम्मा ङाइ किन्ना ढुक्क लासि सिगो ङाइ पाङजि । बालाजुबिमा जाकि तोर जन्ति निदोबा चिम ङ्हाच्छाला तिमजा रानिबन पौवारि रो दातेजा गहिरिगाउ रो तिम स्होसि थेरिन स्ह्युबा रो । तारेम रुम्बा ज्योज्यो खाइमा ब्रेल्साङ लासेदा ठागनला पोङ थान्दोजि ताम्बादा ज्योज्योसे बालाजुरिन खाउ सुङजि । ताम्बा थारेङग्याम खादोबा मुला थेताबासे ह्राङसे ङाला तिमरिन बासि ज्योनस्हिगो रुम्बा ज्योज्योसे घन्टा गिरि ह्याङ चाबहिलरि दोखाला सुङजि । ताम्बा सत्तलसिं योनान ज्योनखासि ताम लासि चिबा मुबा रुम्बा ज्योज्योतेन ह्रोनोन ज्योनखाजि । ह्याङ म्हेन्दो प्लि चिसि सरसर्ति ताम लाजि खाइमाकुनु लासेदा बिसि सगुनपोङ बिगेवा ठगानला पोङ थान्सि ताम्बासे छ्योत लास्ह्युजि ताम पक्का ताजि । लासोम ताइ लाजिन्जिम ब्रेल्साङ लाबा दिङ ङामरिन खाजिन्जिम थे ताबासे ङाइ रुम्बा ज्योज्योदा फोन लाजि ब्रेल्साङ ताबाकि आताबा ज्योज्योसे ताइ आता आले थेबा सुङजि ताबागा । रेनिङ आठ बजे चाबहिलरि दोखाउ ह्याङ बेनान ह्रुप तासि छ्याममा जन्ति निदोला बिसि ङाइ ताम्बा सत्तलसिंदा फोन लाजि । थारेङग्याम्से खादोबाला कारनसे लासि दुयीरन चाबहिलरि दोआखाम्नि जाकि गाइजि । ह्याङजा चाबहिल ग्याम्से बसरि ख्रेसि माछापोखरिदोना बसरि निजि । माछापोखरि ग्याम्से ह्याङसे ट्याक्सि नि चुङजि गैह्रिगाउ नाम्सारि दोजि फोन लाजि रुम्बा ज्योज्योदा जाकि तोरखाउ क्यामरिन तिम मुला सुङजि ब्रेल्साङ लाबा तिमरिन दोजि । ताम्बाकादेसेन सेरगेम लाजि चिया थुङसि तारेम थोन्दोला बिबान डम्फु ह्राप्बान क्यामरि खाजि ङ्हाच्छाजा दमाइ बाजा ह्राप्सि जन्ति कादे लिच्छा निबान मुबा ङाइ रुम्बा ज्योज्योदा पाङजि ङ्हाच्छा ह्याङ निदोला थेनिकादे निजि । रुम्बा ज्योज्योसे ङ्हाच्छाजा डम्फु ह्राप्बा ताम्बातेन डम्फुरेकादे सेगो सुङजि । तामाङ गोइलो खोन्बा ताम्बा गान्बा लामा थेन डम्फु ह्राप्बा डम्फुरेकादे ह्वाइ कोसि फुरफुर ताङसि स्याबान टुङना ह्राप्बान क्यामरि च्याबा कादेन ल्हानान म्राङजि । कौसिग्याम्से तामाङला पहिचान ओन्बा डम्फु ह्राप्सि तामाङ गोइलो खोन्सि स्याबाकादेदा म्राङसि नाम्साला म्हिकादे आउदिन ताङजि । डम्फु ह्राप्बा ङ्हाच्छा ङ्हाच्छा थेला लिच्छा लिच्छाजा जन्ति थेलान लिच्छा लिच्छा दमाइ बाजा ह्राप्बा दमाइकादे मुबा । ब्रेल्साङ तिमरि दोसि पाल न्हाङरि डाजाङ सेङबा चिम ह्याङजा थेरिन निसि चिजि बाजा ह्राप्बा दमाइ कादे फिरक्याप चिसि बाजा ह्राप्जि । ब्रेल्साङ लाबा डाजाङ ङामरिन टेकुन थान्बा टेबुलला फिरि स्टिलला बाटारि वाला टिका थान्बा स्याप्जि काङख्रुबा खडकुलो थान्बा ताम्बातेन डम्फुरेकादेसे प्रष्ट रुपरि म्राङजि । बेनासे ङाला लिरि च्याजि खाराङबा ज्यार्दिला ठिम दाङबाचिम चु याम्बु पोकोल ङामला तामाङकादेसे ङादा सुङजि । गोर्कि आलेसे ङादा सुङजि ज्योज्यो तिनिजा चुरि अवस्यान झगडा ताबा ह्राङ ङाइ म्राङजि तिगा तिगा ताला वा मान्जि । ङाइ आलेदा पाङजि ए कुटिसि चिउ एसे मान्बा ह्राङ तिगान आताबागा थेला बेबस्था ङाइ लाला लोङ आतो । छेबा बाङबा काठे ख्लारि ङाइ लाला लोङ आतो । ब्रेल्साङ लाबा डाजाङरि खासि खेप्पा म्हिसे तारेम टिकाटालो लादोजि सुजि । ह्याङला ताम्बा धावाकृत घिसिङसे ज्योर्दि ग्योइ ग्याम्से हामी यहाँ त्यसै आएका होइनौं डम्फु बजाएर गित गाएर नाचेर रमाइलो गर्नको लागि मात्र होइन तामाङ संस्कृति र रितिरिवाज जोगाउन आएको हो त्यसकारण हाम्रो विधिअनुसार चारदाम गर्न हामीले स्यालगार ल्याएका छौं । गर्न दिनेकि नदिने यसको उत्तर पाउ सुङजि । ङाला नाम्सा रानिबनला म्हिकादेन थेरि ङाइ म्रङमुबा थेनिकादेन कुटिसि चिजि तिगान आपाङनान । टेबुलरि थान्बा वाला टिका काङख्रुबा खडकुलो खानाङ बोर्जिम खानाङ बोर्जिम थेरि ह्याङसे आम्राङनि । रुम्बा ज्योज्योसे ताम्बाला ताम ठोनसिगो के लाबारि बाधा समस्या आथानो आगोबा कादेसे तारेम गोतोला आसेबाकादेसे लोप्तोला तामाङला रिमठिम चुराङबा बिसि । ह्याङला आखे म्हेमेसे ओइमा हेन्दे दाङसि खाबा ठिम म्लेला आदे तारेम ह्याङसे सोना लाबा दुइ खाजि । ताम्बा गान्बा लामा बोम्बोतेन ङेवा ङेङगोरकादेसे तालि ह्राप्सि समर्थन लाजि ताम्बाला ताम ठिक्कान हिन्ना बिसि ताम्बादा डेन लाजि । चाङछारला आखे म्हेमे माम आपा आमा आङि आस्याङ ङेवा ङेङकोरकादे बेनानसे जेनसिगो सगुनपोङ थान्सि बेनादान फ्या लाजि बिसि तामसे सुङजि । ताम्बाला ताम थाबारि आमाइनि तारेम आपा आमा म्हेमे माम आङि आस्याङ ज्योज्यो चाङगेन ङेवाङेङकोर बेनासेन टिका ख्याप्सि म्हातेन जामेदा मोलम दोन्जि । ङाला ङामरिन चिबा डम्फु ह्राप्बा ह्वाइ कोबा डम्फुरे आले आउदिन ताङजि आले खाल्से डाजि ओ ? आलेसे ह्राङसे पाङबा ह्राङ ताजि ज्योज्यो ह्राङदा ल्हानान थुजेछे ङाइ फुल्जि पाङजि । ताम्बाकादेन आउदिन ताङजि काठला ठिमजा ह्याङसे सुधार लासि बोर्तोला बिबान ङादा चुराङबा के लाबारि ह्रो लास्हिगो सुङसि मोइजेन लास्युजि ।
ताम्बातेन डम्फुरेकादे आउदिन ताङजि म्हेर्सि चिबा आछोर्बा आसेबा छार पुस्ताकादेदा छोरङान पिनखाम्बारि सफल ताजि बिबा ङाइ म्हान्बा मुला बिसाम सेमजा फुर ताङसि तामाङ नाम्सा नाम्सारि चु रोङबा ज्याबा के लादोला बिबा ङाइ बङ लाला बिसि ग्रान चाबा मुला । ब्रेल्साङला डाजाङरि ताम्बातेन डम्फुरेकादे ताङसि ह्वाइकोमा नाम्साला ङेवाङेङकोरकादे जन्ति निबाकादेन ताङबान स्याबा म्राजि । मि च्युम्बा कादेदा तिनिजा तामाङ ह्वाइ, तामाङ गोइलोला माध्यमग्याम मि आम्राङबा तामाङ ब्याने थेन छामेकादेदा पाठ लोपम्याङजि । ङादाजा ताम्बा थेन डम्फुरे गैह्रिगाउला म्हिकादेसे ल्हानान डान्जि ह्राङबा छोरमुला । चाङछार तिमरि बोर्सि आउदिन फुर ताङसि ह्वाइकोसि स्याबान स्याबान के जिन्बान बिदा किन्सि ताम्बा डम्फुरेतेन ङा दोसिन तिमरि दोखाजि । ङाइ खाइमान म्ले आखाम चुरोङबा घटनादा रुम्बा ज्योज्योसे ह्याङदा छोरङान पिन्बा अवसर दोन्बासे ल्हानान ल्हानान थुजेछे । ओन्छ्यान रुम्बा ज्योज्यो ७६ दिङरि डोङजि । सिङखामरि दोगाइ बिसि ङाइ साङगेदा डान्सि नाङसाल वा छ्युमि म्राजि ओम माने पेमे हुँ पाङसि ।