फ्युक्पाला दरबार सिंहशान
अठारा कोसला रानिवन
ह्याङ तामाङला कोला मि
साइलुङ माबर ग्यागरदान
प्रङबो तामाङ ह्युल्सारि
ढाक्रेम बासरि जा याङमा
चु पापि ज्यार्दिला सासनरि
खाइमाइ सुख आयाङमा
अझै ह्याङदा आख्लाजि
बामरिम बन्डा थोबोरि डा
तामाङ ह्युलदा च्यासिमाम
मिख्लिला ग्योइरिन क्याल्मुला ङा ।
दुख मि याङबा बेलारि
मायासे ख्लाबा ताम डान्म
प्रङबोला ग्यालाम काङ थान्थान
पुजुसे ब्लोबा ग्याम डान्म
जोरिम बैरिला ङोन्साङरि
मिख्लिम जोर्सि थोसाइ नोन
एसे ङादा ह्राङला आबिनि खाइ
सिबाला टुङगारि दोसाइ नोन
डेबाम आङरे ख्याबाम कोट
ज्यार्दिला सासन पोथान्साम
सिमाइ दोसेला थार्बेलिङ
तामाङ ह्युल्सा स्होथान्साम ।
म्हे स्या पाङबाङ गाइ नाङ नाङ
चाजाम मार्चा कानसिम्दा
खाइ तिला बिसि सम्झप लाइ
आगोबा स्होबा मायादा
यारिम हाङ्सु थोबोरि डा
बासेरि गाङरि रा छासाइ
बैगुनि ह्राङ्ला आताबा जिम
तिङ नोन क्लेसि फ्लेक पिन्साइ
ल्हासाला जिपजिप काराला दोङ
टारिम थासाम बासिला
तामाङ दोङराप स्हेङथान्सि
केवाला ह्युलरि ङा सिला ।
भद्रकाली– ६, खोल्मागाङ, सिन्धुली
