ओइ माइ थेबा
खाङबारि थुरथुर दार्सि
सिल्बा पाङरि बालि डुट्सि
बुङ्गुरुङ क्रा, फुङ छार्बा लि थोसि
खानाङ ब्राबा ओइ सम्दिस्या
च्यागो सम्दि
वाला ता क्रात्पा म्हि गिक
ङामरि खामु
ज्यानाले च्यामु
कादे जेबा ज्योमोस्या ह्राङ्बा बिमु ।
ह्वाम्मु– ‘चाबारि, थुङ्बारि, चिबारि, क्वान्बारि
दुख आता आइदा, खालाइदा
ङातेन निगे ।’
‘होस्पा ताम लाआतो’ बिजि ।
दोसिन थेसे–
‘गोइजेनला गोइलो पिन्ला
थोपोरि म्हारम्हेन्दो
म्हारलान माठि यारि, बालिरि
आइतेबान म्हार पिन्ला’ बिसि ह्वाम्मु ।
ङाइ नाबिङ आतानि
तोर–मार च्याबान पाङ्मु–
‘ङाला म्हेमेसे डाबा सा याइसि पिन्ला
मार्सि म्लाला कान थेन म्हेला स्या चाबा
आइला म्हेमेउमेला म्हाङ छार्ना लाला
आइ ह्राङला साला चोहो दोला ।’
‘इस आइ पाजिला ताम’ बिजि ङाइ
‘देन्बान लुबा आहिन’ बिसि ग्रान चामु ।
ङादा ङ्हाम्जि, ङा ताङ्जि
थेला यारि या थान्जि
थेसे ङादा बाकह्वामु ।
थेसे ङाःमु, तामजुगु कुल्मु
सेतथिसि ताथोरि थान्मु
गोजा, तुम्बाक खेत्छि
ङा ह्यार्जि, ङ्हार्जि
नाम्सा नाम्सारि
ह्रिरि, डिहिरि
ब्रारि, ब्लेरि
स्योङरि, गाङरि
दिन म्हुन आसेनि ।
ङाला गोजा स्यामा
ङाला तुम्बाक फोमा
ङाइ एसएलआर थोमा
बाइरिज्युगु थुरथुर लोङ्जि ।
ङाला तासे नाङ्मा
कादे म्हि क्राजि
कादेला या काङ म्हाजि
कादेला खारे टाङ्जि
कादे सिजि, कादे क्याजि
कादे भिप्चि कादे
कादेला दिम सा फोजि
कादेसे नाम्सा दिम ख्लाजि ।
सा आन्हाना, ब्लाप्पा आह्याना
सेर्खा बार्खा तिकाइ आबिना
ह्राङला वा म्हिला खालाइ आसेना
च्युइ दिङदोना
या गिक टाङ्माए
खोक्टो छ्योङमाए
च्यागो सम्दि
फ्याबाला फ्याबान ताम्बाला ताम्बान लाजि ।
फ्याना फ्यानान ताम्बाला ताम्बान
ङाला ता गात्बारिमार थुुस क्याजि
म्हाङरि ह्राङ छोर्जि
केरमार च्याजि
ङाला ङाच्छा
तार ता थोरि
होजा म्हि म्राङ्जि
ङेत्मु, फ्लिक दिङ्सि निुम
ङाम च्याबाला च्याबान ताजि ।
बोमोसे ङा थुरथुर दार्जि
भितनाइबा म्हिदा
थो छ्वाबारि सुत्ताइ आम्याङ्नि ।
म्हाङ्दोङरिन ब्राजिम
ङाम चुरिगा दोखाजिम
बुकिम्हेन्दोला पाङरि
म्हेमेउमेला दुर्सा ङामरि
दोसि ब्रात्चि ह्याङ
दामा तिक लासाइ सम्दि ।
माघ २०७०, याम्बु
