लानि दिनि मुबा वाला राष्ट्रिय दाज्र्यु, छोङ ङ्हाला शान्तिला दूत बुद्धला दाज्र्यु फेर्बान । बुद्धला ग्रेन थाङ्का थेन ज्योमोगाङ, लुम्बिनीला फोटो मुबा ब्यानारला छ्यामरि हुल गि म्हि ।
बौद्ध धार्मिक लामा गोइलोरि, नेपाली गोइलो ढाका कुलाकि, स्हुर्दाम सुरुवाल, तामाङ गोइलो, शेर्पा थेन ह्योल्मो गोइलोरि सजप तासि सउल महानगरला ब्यस्त सडकला छाक्कालला प्राबा दिनिरि शान्ति काङल्हाम (पदयात्रा) लाचिबा मुबा ।
चु दक्षिण कोरियारि मुबा नेपाली गुम्बा, नेपाली दूताबास थेन नेपाल पर्यटन बोर्डला ङ्योइसाङरि ताबा ‘२५६७ छा बुद्ध केवासाङ थेन नेपाल डे परेड’ गेताङला दृष्य हिन्ना ।
बुद्ध कवासाङला दुइसाङरि कोरियारि मुबा नेपालीजुगुसे गिक्छा रेम शान्ति काङल्हामतेन औपचारिक गेताङ लासि बुद्ध केवासाङ तेन्बारि तिबा मुला । ङ्हाउरि सउल नेपाल गुम्बा, नागर्जुन गुम्बा थेन कोरियाली बौद्धमार्गीजुगुला ग्रेन फेस्टिभल लोटस लान्टिनरि जेक्खे बो किन्सि तेन्बा बुद्ध केवासाङ चु दिङ हेन्से सामुहिक लिरि तेन्बारि चुबा हिन्ना ।
गुम्बा थेन फेस्टिभलरिक्यार बो नोन किन्ना, चुपाल्छे हेन्से तिलाइ सन्देश, बुद्ध केवा लुम्बिनी थेन नेपालरि हिन्ना बिबा भाष्य स्थापित लाबारि चु केवासाङ तेन्बारि चुबा आयोजकसे पाङ्मुला ।
छाक्काल बाह्र बजे सउल जोङ्गारि मुबा झोगेसा बौद्ध गुम्बाला ख्राङ्गाग्याम थोन्बा काङल्हाम जोमोन ग्लेवंशला दरबार ख्याङ्बुखोङ तासि छ्योआछ्यो किलोमिटर गि कोरो लासि थेनोन ग्लारि दोमुबा । शान्ति काङल्हाम लिच्छा गुम्बालान हलरि औपचारिक गेताङ ताबा मुबा ।
औपचारिक गेताङरि बुद्ध केवासाङला ज्याबाम्हान्बा पिन्बान गेताङला ग्रेन डोन्बो नेपाली दूताबास सउलला उपनियोग प्रमुख पुष्पराज भट्टराईसे अन्तराष्ट्रिय समुदायरि बुद्ध केबा नेपाल हिन्ना बिबा च्याङ्ना म्हिदा जेक्खे थाहा मुबा उल्लेख लाबान थेला लागि ह्याङ्से बुद्ध नेपालला लुम्बिनी थेन जाम्बुलिङला नोबा जो ज्योमोलोङ्मा नेपालला हिन्ना बिबारि चु खालला गेताङजुगुला गुङग्याम्से तिलाइ तेन्बा (टेवा) तासेला बिसि पाङ्जि ।
थेसे खातेबा दिङ ‘नेपाल डे परेड’ गेताङ थेन स्टेजरि बहुजातिय मुबा ह्याङ्ला ह्युलला बहुसांस्कृतिक स्याबा उन्तोबा बिसि पाङ्जि । खाबा रेरि दुइरिन प्रचार प्रसचारला छ्याम आयोजकजुगुसे ङ्हाच्छान तयारि लासि बृहत स्होतोबारि थेसे बाङ लासि पाङ्जि । बुद्ध सम्बन्धि सैद्धान्तिक पक्ष थेन नेपालला बहुजातिय, भौगोलिक थेन थुम आन्सारला बहुसांस्कृतिक पक्ष नोन अन्तराष्ट्रिय समुदायदा उन्तोबा थेन उन्सेला थेसे पाङ्जि ।
नेपाल पर्यटन बोर्डला कोरिया प्रतिनिधि केपी सिटौलासे कोरियाला पाठ्यक्रमरि बुद्ध केबा लुम्बिनी बिसि ब्रिबा मुला, तासाइ लुम्बिनी भारतरि परतिला बिबा उल्लेख लाबासे थेनिकादेसे गलत गोबा मुला बिसि पाङ्जि । ‘पाठ्यक्रम थेनोन मुला, थेनोन डोबा हिन्ना, थे नोन गोजि, ह्याङ्से थेन्से गलत गोजि बिसि बिबारि आता । हिन्ना चु पाठ्यक्रम सच्याप लाबाला लागि दुताबास थेन नेपाल सरकारसे पहल थेन ध्यान पिन्तोबा’ पाङ्जि । थेसे ह्याङ्से चुर्ला केन्द्रीय सरकार थेन शिक्षा मन्त्रालयदा ङ्यान्ना लाबारि, प्रमाण गोना लाबारि खाम्जि बिसाम पाठ्यक्रम सच्याप लाबारि खाम्ला बिसि पाङ्जि । चुपाल्छेहेन्से ह्याङ्से तिलाइ सन्देश पिन्बाला लागि तिबा मुला, बिमुलाले ‘तिबा नोन गाङ्साल हिन्ना’ हिन्ना थेनोन लाबा थेसे बिजि ।
गैरआवसीय नेपाली संघ, कोरियाला चोहो बुद्धि गुरुङसे ह्याङसे आतोबा गेताङ वा ग्लाजुगुरिजा ल्हाना भीड लाबा बानी मुबा बिसि पाङ्जि । चु खाल्ला प्रचारक, बुद्ध केबा देश हिन्ना बिबा सन्देशला गेताङरिचा च्याङ्ना संख्यारि उपस्थित ताबा म्राङ्मा दुङाला छोर्बा बिसि पाङ्जि ।
सउल नेपाल गुम्बाला लामा प्रमुख कुन्साङ दोर्जे लामासे चु खालला गेताङ लाबारि दिङ सोम ब्लिहेन्सेन तयारी लाबा हिन्ना बिसि पाङ्जि । तासाइ दुइ परिस्थिति ल्होलोसे लामा चुपाल्छेहेन्से तिम्याङ्बा बिसि पाङ्जि ।
गिक्छा रेम ताबासे प्रचार प्रसारला छ्याम ल्होलो पक्षला कमजोरिसे बो किन्बा थेन उपस्थिति च्याङ्ना ताबा हिन्ना ताला, खाबा दिङजुगुला गेताङला लागि बृहत अन्तरक्रिया, काठुइ, बहस, ग्रोइ, सुझाब किन्बान न्हाङ्ला तयारि ज्याना लासि तेन्सेला मुला’, लामा कुन्साङसे बिजि ।
दक्षिण कोरिया
