थेरि
दाते नोन सन्नाटासे ह्वाइ कोचिमुला
उदास, मधुरो काइरि
ब्रेबा आत्माला ह्वाइ ।
उर दिनिरि
ल्हाप्तेजुगु ताइचिबा ताला
चिबु ताङ्से ब्रान्चिबा ताला
चापाकलला दिरिमार
खाइमा ङ्यासे ताला बिसि ।
जोरगि डुइसिकेन खाबा चप्पल
ब्लाप्सि, ब्रेसि दिमरि हाजिर तागाला
दिग्गिला मुतेबा ब्लाप्बा
ल्हुइग्याम फाप्सि ब्लाक्ला
दिम–ख्राङ्गारि ।
ब्रान्बाजुगु मिरिमार फाप्काला
रहर दोसिमाम ।
बिले जाजाबा छाल ह्राङ लासि
खालाइ झोला ह्योङ्सिकेन दिमरि दोगाला
ताङरि पोक्तोङ ताजिबा सिम्बा कान
ज्युम ङेबारि चुला ।
ग्याप्से ङ्ह्याचिबा
उदासीला संगीत मधुरो तानिला ।
दाहसंस्कार लासि दोसि खाबा काङ ह्राङ लासि
आतंक दिमरि दोगाला
ङ्यासेला दोपतेन छ्याम
बल्बला नाबा नाङस्हेररि
अफिसला कागजात तेसि चिला ।
गज्जबसे चिसि चिसि
‘सबक’ डान्बारि चुला
दोसि ख्वाइबारि चुला सन्नाटाला थेनोन संगीत
गोल्छे गोल्छे कर्कश दोसि होङ्बारि चुला ।
यागारगि ब्लाप्बा ब्रान्बा
मझेरीरि उद्देश्य आरेसाइ कोर्सि चिला
कुदाप ताङला गे जिन्ना लाबा लिच्छा ।
सन्नाटासे ह्वाइ कोसि चिला
याखारगि उखास खेप्पाला भजनह्राङ
ब्रेबा आत्माजुगुला ह्वाइ ।
दिला तालारि तारतारबा बाउन्ने राक्षस
खुइया लाला
डेङरि च्योबा तस्वीरला लिच्छा
जाङ स्होसि चिबा परेवा
ब्याप फारफार लाला ।
दिग्गि ब्लाप्बा या
कोर्ला ब्लेबा म्हान्सि म्हान्सि
याखारगि कलिलो ल्हुइरिक्यार
लोङ्बादा धुलोदा ह्राङ फ्यासिकेन ।
चेगाइ प्लिङ्बा म्हेर्बा ङ्योइबा लोरि
रहरजुगु कोबारि चुला ।
ल्हुइ कोबारि चुला
राइ दोसिमाम
खारेरि थान्बा याला खुमरि निश्चिन्त तानिला ।
पृष्ठभूमिरि ङ्ह्याचिबा ताला
ब्रेबा आत्माजुगुला थेनोन ह्वाइ
म्हाङरिक्यार म्लाङम्लाङबा दोपजुगुह्राङ ।
कुदापला मेफ्राला पर्दा गुङ्से
लासि च्याचिबा ताला
जाकि वाला स्हेर फेबाकेन लाबा ।
दोःबा : यकिना अगाध
