थे म्हाबा मुबा
दुइतेनछ्याम
ह्राङ्ला नाम्सा निबा ग्याम ख्योल्सिमाम
सिमाना क्याम्साङ आहिन, सिमाना जासामनोन
ह्रि ब्ले थेन डुइ ब्लेरि
स्वाभिमानदा आत्मसर्पण आलाना
ह्राङ्लान पौरखला तिसारि
म्हाबा केवादा ब्लाप्बा न्हापुङ्चिजि
ल्हानान म्हाबा दिङजुगु
बेरुजु रहर थेन ताङ्बा पोरेजुगुदा
मौजुदा परिवेशला उमालरि क्योइबान
च्याबा राप उन्बा सारथीला छ्याम
थे दोसि निजि
म्लेसिकेन निसि बुल्कु डान्बारि छोन्बो
ह्राङ्लान ग्लारि
ओम थेदा सेसिआसेना गोल्छेसे
भाइरल छावा ह्राङ्बानभाइरल स्होजि
तिल्दाबिसाम
ह्रेम्बोरछे चु भाइरल जमाना हिन्ना ।
ग्लेठिमला ल्हाम ब्राबाजुगु
ब्लाप्सि ङुबाला कुरि म्हेर्चिबाजुगु
योनान छोर्सि दोसि म्हेर्बाजुगु
झ्यालग्याम थारेङ्ला छितिज च्याबाकेन लाबाजुगु
दृष्य आस्याप्ना अदृष्यरि सेम निना लाबाजुगु
म्योबा लाबारि गिक्खे फ्याङ्सि मुरि म्हाबा
ताम आपाङ्बा चरिजुगु
थेलान ल्हागाब तामाहेन्से लावालस्कर
गिक्खे नाम्सा ह्न्से स्यान्दो नाम्सा
बसाइ ल्हेबा स्याउरिला ताँतीह्राङ
ल्हानान दिङ लिच्छा याङ्बा
आपा आमाला थुर्बाला फुइबा छ्योना लाआम्याङ्मान
थे तामसोरला साङग्यर दोचिजि
क्यार्सेजासे कोर्सि चिजि
कोर्सि चिबारि बाध्य ताना लासि
भाइरल युगला मि मुबा खुट्टे थोबाजुगुसे
हिन्ना ले ह्रेम्बोरछे चु भाइरल युग हिन्ना ।
श्रमला छ्योकु लासि
सिजनजुगुतेन दोसि दोसि खाबा
ज्योमोला सिम्बा थेन ज्याबा ह्वाइजुगु
मुतेबा दुइ थेला लागि स्वर्णिम आनन्द
दिग्गिला परिश्रम रमाइलो म्हान्मुबा
स्योङ्ला स्थायी ब्योङ्बा ह्राङ्बान
शान्त तासि म्हेर्बा लामुबा दुङालदा बिदाइ लासि
चुनाउतला गाङजुगु क्रेसिकेन
थेसे पाङ्बा ग्योइ
चिबा सा
थेह्राङ्बान मुबा ह्याङ क्योङ्ला ह्राङ्बा
मुतेबा स्हे ओस्बा ओस्बान तासाइ नोन
थेतेन नागरिकता आरेमुबा
थेतासिमि थे अनागरिक मुबा
देन्बा दुइ बाङ्बा
थेसे याङ्जि नागरिकता
थे नागरिक दोजि
नागरिक दोबातेन ताजि ह्रुप
ह्युललान मुल मुखियातेन
सौहार्दमयी अनुपम वातावरण
काँचला पर्दारि ताजि सनसनि साङग्युर
हिन्नाले ह्रेम्बोरछे,
चु भाइरल युगला पराकाष्ठा हिन्ना ।
पाँचखाल ११, काभ्रेपलान्चोक, दाते : लिमासोल, साईप्रस
दोःबा : यकिना अगाध
