ङ ह्रप ब्रिपरि टिडिचि अहँ सेमरि ताइनो अख । दिमाग थेनथेन तनेम । ग्यमरि ङिचिम टिडिचि । तितिङकि चुनावरि सेप्रा युपल ग्यमरि मोटरसाइकलचे दुलु ठमपिनचि । ङ बोमो रप्चिम दोखचि । कथा ब्रिगे पङचि खनो अख । हैट ! ता ब्रिप ता ब्रिप तपिन्क्योर दिमकी न्यापो खेक्पा खचि । ‘कथि करैछि हौ सरुचि ?’ थेचे ता स्हेङ्डिप बि ङत ङ्योत्खचि असेम ङइ रेरि टिचि । ‘ठण्डी है खैनी खवोइ ?‘ सूर्ती चपो बि ङ्योत्चि । ङ कथा म्हेन्लुस्यरिटपल तचिम क्र मलिङ मलिङल्या य्होङ्पिन्चि । ‘अरे सरुचि कुछ त बोलुु थेचे तम पङ्पे मेसो किन्चि । ङत तम पङ्के नो अमेन । कुरिल्या टिडिचि । ‘ए सरुचिके कथि कहुँ कथि नकहुँ ?’ पङ्जिम थे डोङ्यर्चि ।
थे यरमम ङचे कोला चिताक्योरकी तम गी व्हल खचि । फो क्यरङक्युरूङ पङ्मु ।
ओतेक्योर ङइल ग्यु गोर मुपल । सुइटेककी डेपचेतरि गोर फेत्युमम ङइ नो ङिचि । सुइटेकस्याचे खट्टे, उस्युप, तिया प्रो जोर्पिनप मुपल । कोलाक्योर रोङ्प चप यङ्पे लोभचे अपतिङ गोररि ङिपमुपल । पङप रङ्ल्या ममचे तङमरे सित पित्खजेत्नेम । म्हेनिङकी स्य नरि । ङेसेरि य्होचिम चिच । तोपा रोङ्मम फो थियम्नल्या चिच । म्हुनाक्योर फो डगडुग पङचि । रेचि निकीत प्रुङपिन्चि । तिया तेमे चपल तचिम तल म्हुनगीरि नो सोमखेप फिर्लो खम्सङ डोङतोचि ।
न्हम्स्योदङ कठेतिङ ख्लङचिम ग्यु सुङडिपलम फो कुच्युच्यु ङ्यचि । ङ छ्योङचिम यरपलम स्योङटी अफेत्ननो धोतीरि तेचि । धोति पारचे गेचिचमोर सिमसिमल्या तेचि । कठे सिििचसचि ङेत्चि । ङ पेत्पचे लि ङोन्अखम ।
चोतेपे ताम व्हल खमम ङेतके म्हेतचि । दरे नो फो कुच्युच्यु ङ्अचि । दरेनो होततल बि ख्योङख्योङले ब्रइडचि । होल्या चोल्या रेतमा यरिडप ह्रप ब्रिपनो अखम । तले यिन्चि म्हेनडिपरि । देपे नो ग्यमक्योर ङिचि, दोखचि । खिम्सेकि दिम सेङ्प च्याचि । सेम अछ्या । चोङक्योर होङ्क्योर कोर्ड्चि । ख्यामम अम व्हल खप । ख्यामम अप व्हल खप । म्रिङ, कोला, अन, अङ, च्योन व्हल खचि । थङखपे म्हीम्हातिङ गी नो दोप । गङ, स्योङ, ब्ले, ह्री व्हल सेङचि । अहकक ह्रप ब्रिपनो अखम । छरो, ब्योन रो, छमे रो व्हल खचि । फूर्तङचिम स्यपल व्हल लचि । तिनम्स्यो चोलेनो दिन यर्प । दिङकी न्हुडिल्या सेम खन खन फेत्प । ओसेम दुप ।
तायिन्ल्या चोङक्योर खप यन्सो अलेङ मलेङल्या नो जागिर मिनचि बि तङप खप छोर्प । तिङिदोन चोलेनो ओलेनो दिन तइडिसम म्योल बि लोङप खप । ह्रप ब्रिप अखम तै अलेङ मलेङ यर्डिप रेत म्हा ।
