तामाङ बौद्ध सेवा समिति पोखरा–१३, संगमटोलला १२छा अधिवेशन ओम ३७छा दिङदाङ्सेला साधारणसभा असोज १२ कुनु ताजि । ।
अधिवेशनसे विष्णु योञ्जन तामाङला चोहोदानरि १५ मुल्मि कार्यसमिति स्हेङ्बा मुला ।
कार्यसमितिला ह्रोचोहोरि अमर घरा, गौराइरि शान्ति तामाङ, ह्रोचोहोरि बुद्धिमाया तामाङ, न्होरचोहोरि हर्कसुबा न्हेगीदा दाम्बा मुला ।
मुल्मिजुगुरि बोस बहादुर पाख्रिन, शेर बहादुर स्याङबो, लिला तामाङ, आस बहादुर स्याङबो, चित्र बहादुर थिङ, धनराज डिम्डुङ, तिर्थमाया लामा, राम बहादुर लोप्चन थेन डिलप्रसाद तामाङदा दाम्बा मुला ।
गेताङ्ला ग्रेनडोन्बो गण्डकी प्रदेशसभा मुल्मि राजकुमारी भुजेलसे छ्युमे म्रासि ठ्वाङ्सेन लाबान बिजि, ‘आदिवासी जनजातिजुगु मुतेबा स्हेसे समृद्ध तासाइ नोन ह्युलला प्रशासनिक थुमरि पहुँच दोना लाबारि बिसाम लिच्छान मुला ।’ ह्रोसे बिजि, ‘तामाङ बौद्ध सेवा समितिला तिनि दाम्बा छार कार्यसमितिसे दारे चु समाज जेक्खे आहिन ग्लेठिमरि नोन वाङ्सि ह्युल हाँकतिबा हिम्मत थान्तोला ।’
गेताङरि नेपाल तामाङ घेदुङ संघीय ह्रोचोहो दीपक वाईबा, नेपाल तामाङ घेदुङ जिल्ला समन्वय समिति कास्कीला गौराइ मिनमाया तामाङ, बुद्ध जयन्ती समारोह समिति कास्कीला चोहो टेक बहादुर तामाङ, गेन्दुनला ग्रोइपा ताम्बा ना.सु. रामप्रसाद सम्देन, घेदुङ महननगर पोखराला गौराइ अन्जना डुम्जन, तामाङ बौद्धसेवा समितिला ग्रेन ग्रोइपा टेकबहादुर स्याङ्बो, बुद्धि बहादुर रुम्बा, आमा समुहला चोहो सीता सम्देनला छ्याम ल्होलो डोन्बोजुगुसे ज्याबाम्हान्बा सेमल्हेङ्मो थान्बा मुबा ।
गेताङरि गौराइ सचिव पवित्रा तामाङसे गेन्दुनला वार्षिक कार्यप्रगती प्रतिवेदन थेन न्होरचोहा बुद्धि तामाङसे आ.व. २०८०÷०८१ ला आर्थिक प्रतिवेदन प्रस्तुत लाबा मुबा । प्रतिवेदनदा भेलासे अनुमोदन लाबा मुबा ।
शेरजङ लामासे डेनताम थान्बा चु गेताङला संचालन गौराइ पवित्रा तामाङ लाबा मुबा ।
गेताङला गिक्छा सत्र जिन्बातेन चोहा विष्णु योञ्जनसे ङ्हाच्छाला कार्यसमिति बोबा मुबा ।
१२छा अधिवेशनलागि बिसाम गोर ङ्हाला निर्वाचन मण्डल स्होबा मुबा । थेला संयोजक ताम्बा ना.सु. रामप्रसाद सम्देन मुबा बिसाम मुल्मिजुगु टेक बहादुर स्याङ्बो, अन्जना तामाङ थेन केस बहादुर थिङ मुबा । गेताङ्ला सहजीकरण मिनमाया डुम्जनसे लाबा मुबा ।
छार कार्यसमितिला पदाधिकारीजुगुदा संयोजक रामप्रसाद सम्देनसे ग्रान फापुङ्बान कार्यकाल सफलताला ज्याबाम्हान्बा पिन्बा मुबा ।
ह्राङ्दा ङ्हिच्छारेम चोहोरि दाम्माहेन्से झान ल्हाना जिम्मेवारी थेन चुनाउति काप्बा छोर्साइ नोन ह्राङ्ला समुदायला लागि कर्तव्यनिष्ठ तासि गेलासे प्रतिबद्धा चोहो विष्णु योन्जनसे पिन्जि ।
