ताङ्बा केवा स्होबा
रहरजुगुला बोरि जुसि
बिचौलियाजुगुला चङ्गुरि न्हुस निबान
खालाइ ह्राङ्नोन चुङ्बारि तयार मुला
ओम खालाइ दोतोबा मुला
ङोआसेबा म्हाङ्ला सहररि
बागबाग रुङ्बा ह्रिला ग्यालाम जुबान
ङोआसेबा सहरला ल्हाम स्होतोमा
पुइतोबा नारकीय दुइला
खाजिबाइ पर्वाह आरे
जेक्खे दोतोबा मुला गन्तब्यरि ।
ह्युलरि सोबा ल्होलो उपायजुगुदा
म्हाइबा जमर्को ख्लासि
ङिस समुन्द्र क्याम्साङ्ला ह्युलरि
म्हाङ्ला ब्लु ड्वाबारि तयार मुला
लिउला कर्णाधारजुगु ।
सभ्यताला विकास छ्यामछ्याम
म्हिजुगु सजिलोन लिरि चुङ्मुबा
खालाइ बँधुवा दोसि
ओम खालाइ यौन दासी
विज्ञान थेन प्रविधिला युगतेन
चुला लिजुगु पोबाकेन मुला
बिचौलियाला केरि खिनिमा
ल्हुइ चुङ्बारि बाध्य मुला
खालाइ दिमला गेनाम
खालाइ अफ्रिकी ह्युलला डान्सबाररि
स्याबास्या दोसि
पोचिबा मुला केवाला स्योप
दोचिबा मुला आधुनिक दास ।
खालाइला म्हाङरि खेतीजुगुम ल्हेजि ताला
तासाइ ल्हानाला भाग्यरि बामाला बज्र परतिबा मुला
दिमथेमे थिबाला ह्याम वाङ्बातेन
ह्युल दोसि खाबारि आम्याङ्जिमान
टुला छाबा थानथान ताबा मुला
खालाइदा ह्युलरि दोसि खामा
सौता उपहार याङ्बा मुला
खालाइ खालाइदा जार ।
विश्वासनीयता थेन आधिकारि निकायदा बेवास्त लासि
ल्होलो बिचौलियाजुगुला कुरि परतिबान केबाग्ला ख्लाबा मुला
ङोआसेबा ह्युलरि कष्टकर केवाला
तामसोरजुगु ल्होमा (छताछुल्ला तामा) नोन
सामाजिक संजालजुगुरि
दुःखद भिडियोजुगु भाइरल तामा नोन
आझाइ ह्राङ्दा दाउरि थान्सि
बिचौलियाला फो प्लिङ्ना लाबारि
तिल्दा लालयित मुला म्हिजुगु ?
ङेङ्गोर थेन ज्याबाडान्बाजुगुला ग्रोइदा
तिल्दा वेवास्ता लाला ओथेबा घमण्डीजुजु ।
होशियार ! ब्योनजुगु
हचुवारि बिचौलियाजुगुला लिच्छा थावाङ्गो
आम्राङ्गो म्हाङ ग्रेन
खाजिबा म्हाङ ओन्छोपरि पोबारि आखाम
म्हाङ थे म्राङ्गो थेसे
समाजदा पोबारि खाम्गाइ
अन्धविश्वास, विकृति थेन विसङ्गतिदा क्लेबारि खाम्गाइ
ह्राङ्से ह्राङ्दान आधुनिक ग्याप्पा दोबाग्याम ब्लाबारि खाम्गाइ ।
दोःबा : यकिना अगाध
