थेचे खो पङमम ङिचि । खन्टो पिटटु खनटो पिटटु ब्रचिम बोस्योरो गङटी दोचि । अदोगते ता ता नो पङल म्हेनडपलम दोमम पेतप रङ तमु सर्म खप रङ छोर्मु । ‘ता मुप सिम सोनम?’ बिमम ‘ज्यपनो मुप’ पङचि । ओते पङमम या कङ करङकुरूङ तनेम । काकर ङ्हिङ्हि तम पङचि दोयुचि । दिमरि युचिम योक्कोखेप रङत नो चिच्याचि । लेमपरङ तनेम ।
तोपा रेतक्योर थ्यामु न्हपसङचे ब्रेलसङ स्यङचिरो ! सोनम ब्राचे तेप रङ तचि, सिमपे यि रि ब्लुमपरङ तचि । सेमटि ङिचिम ता लप, दोपरि तम स्हेङप अखम ता लसे !? बोरि अरेम, ङोरि अरेम होल्या म्हेनचि सोनमचे ।
नमसल क्रतेनखोरटी बोस्योरो दोङपो गि मुपल । हुचु गङत नो बोस्योरो गङ पङपल मुपल । बोस्योरो चपे ङ्युङल्या योककोचे मायाई छो ख्रेमपल बि थ्यापल । सोनम छेङल्या बोस्योरो गङटी ङिप तिपचि । न्हपसङ अख । न्हपसङचे चुङपे या च्याचि, टिचि । छरोचे ह्वललप पितख्लाको पङचि थेचे अखम । अहँ खम्नो अखम । व्हइ गी ब्रिचि ः
बेङगुलुचे जङ स्हेङ्चि बोस्योरो गङटी
न्हपसङ यात म्लेत अखम असिपे दङटी
तोपा नो ब्रिचि । मिचे मिखलि पितचि । टिडिचि ह्रपह्रिप दोन ।
टिपे घ्लाचे रेचि सोनम । रेक्योर स्यर्र स्यर्र बि थ्याम च्याचि थेचे । ब्रोनतो वला फिपे नाग ह्रङ्पे सर्पा थे जनक्योर खइडिपलिम । सर्पाचे थे ल्हपचि । खमप गि छ्योङचि । तेपाक्योर दिमरि दोयुचि । केन चइ अमेन । ओल्यानो न्हुचि ठिटा ।
नमस्योदङ स्योरिनो दुङ फुतचि । नेतपो म्हचि बि थ्यामु खलु यिनचि बि रेके पङमम अखममु । पकरिक्योर ‘अपअम चे करल्या फत पिनचिम न्हपसङ च्योचिम सिनेम रो !’ पङप थ्यामम सोनमचे ह्रङकि तिङटि कुनतुरचे प्रुङिच । थेचे ह्रङ म्लेतचि । न्हपसङकि म्हिलि च्याङिप अखम । रेप अखम । क्र ङ्योर्चि । जमबुलिङ कोरोरो स्यप छोर्चि । थे रपपे घ्लारिनो गुर्चि । ‘आमोई’ बि थोलचि ।
बोम्बोचे ब्ल ङोतचि अख, लमचे ब्ल म्हेचि अयङ । लिपग्यम लपताअप सुइटेकचे ब्ल ङोतपरि बोस्योरो गङ फेतखपरि छ्यकचि, दरखचि । न्हमस्योदङ लम बोम्बो डिचिम बोस्योरो गङटी खोय खोय खोय खोय बि ब्ल म्हेङिचि । बोस्योरो दोङपोइ दुङकि युङ्पारि थे ब्ल टिम । ब्ल ङ्होतबेचि । गोलेल्या सोनम फेन्सिनो बोर्चि ।
सोनम कि म्हपे ब्ल यङचि । थेत न्हपसङ अयङ । तिङिक्योर बोस्योरो गङटी कोलाम्हा अङि । ब्ल म्हप बि ।
