ग्याम गाङ्सालरि नुप्पा जुनी

‘आपा ङाए नोन फिरग्याप ह्युल निला ।’

तिक्खुरि जामेला चुह्राङ्बा तामसे आपा चोन निला । ‘तिला बिबा, खुरुखुरु आडोना, फिरग्याप ह्युलला ताम आलाउ लाइनु’, आपासे जाकि छेर्बाह्राङ लासि पाङ्जि ।

जामेसे बिजि, ‘देन्बान पाङ्बा हिन्ना ले आपा ! ङाला ह्रोए नोन निसेला रो । थेतासि ङाए नोन नितोजि बिबा ।’

जुनी गिक्खे जामे आपा आमाला । गिक्खे आङा गोर ङ्हि ज्योज्योला । ज्याबाह्राङ्बान दुइ (अवस्था) मुबा दिमला । गिक्खे ज्योज्यो टे«किङ गाइडरि गेलाबा । स्यान्दो ज्योज्यो बिसाम फिरग्याप ह्युलरि । आपा रिटायर्ड ट्रेकिङ गाइड । आमा दिमला गे लाबाला छ्याम ह्राङ्लान जाजाबा होटल छोङ्खेनरि व्यस्त ।

क्योङ्लान चेगाइरि छार्बा मुबा जुनी । आछ्योबा आरेबा बिबा स्हे खाइमाइ थेला ङामरि दोआपुङ्मुबा दिमम्हेसे । पुख्र्यौली दिम हेलम्बु, सिन्धुपाल्चोक । दाते चिबा जोरपाटी, याम्बु ।

डिक्बा ह्रोला तामसे जुनीसे सेमसे स्वाट्टा युटर्न किनजिन्मुबा । क्योलो प्लस टु पास लासि दिमरिन चिबाकेन लामा थेरिक्यारलान ह्राङ्लान डिक्बा ह्रोला तामरि परतिसि आपा आमासे लाबा ताम आम्लोङ छोर्मुबा थेदा । ह्रोसे बिबा मुतेबा छिगरि जेबा लिउ म्राङ्बा लामुबा ।

जामेला जिद्दीला ओन्छाङ ताआखाम्नि आपा आमासे । जामेसे डाजि । फिरग्याप ह्युल निसेलान ताजि ह्रोतेन छ्याम । ङ्हाच्छा ट्रेकिङ गाइड लाबासे म्हि होबा प्राइभेट कम्पनीला गोर ङ्हि सोम दोप्तादा ङोसेमुबा जुनीला आपासे । थे ङोसेबा गे ल्हागाब ताजि थेदा ।

दिङ परिपक्व आरेबा जुनीतेन तिलाइ गेला अनुभव आरेमुबा । क्योलोलो टिनएज वाइबा, चन्चले अिस्थर लाबाला झोक्कातेन ह्योङ्चिबा ग्रेन दोङ्ला कलिलो हाँगाह्राङ्बान । थेला आपासे म्हि होबा कम्पनीला दोप्तातेन खाजिबा ह्युल निमा ज्याबा ताला ? खाजिबा ह्युल जाकि ज्याबा ताला बिसि ङ्योइमा म्यानपार कमपनीला दोप्तासे ‘तिनिन्हाङ्गार साइप्रस निमा ज्याबा ताला, थेग्याम्से युरोपेली ह्युलरि देःबान सिफ्ट ताबारि खाम्ला’ बिसि पाङ्जि ।

युुरोपेली ह्युलरि देःबान (सजिलै) सिफट् ताबारि याङ्बा तामसे जुनीला आपा ताङ्जि । जामेदा फिरग्याप ह्युल पुइबारि राजी ताजि । उत्साहित तासिमाम पासपोर्ट स्होजि ओम प्रोसेस नोन लाजि । फातोबा दस्तुर ह्रापह्रुप लासि फाजि ।

जामेला भिसा खाजि बिबा तामसोरसे ताङ्बा ल्हेजि । दिमरि लामा ङ्योइसि साङ्गे लाजि । खास्योररि निसि नाङ्साल म्राजि । भिसा खाबा तामसोरसे फिरग्याप ह्युल निसेला पक्का ताजि । खाराङ्बा विडम्बना, स्यान्दोलन ह्युलरि कोर्बारि आहिन सस्तो मस्तो गे लाबारि निम्याङ्मा नोन ताङ्तोबा ।

जुनी थेन थेला ह्रो ङ्हिसेन लाबा कोसिस सफल ताजि । चाँजोपाँजो डिक्ना लासि याम्बुग्याम फ्याङ्जि याखारगि जाबा टापुला ह्युल साइप्रसला लागि । थेन्ना लक्ष्य साइप्रसरि चिसि गे लाबा आताना कादेखाम्दे योना युरोपेली फ्युक्पो ह्युलरि वाङ्बा मुबा ।

एजेन्टजुगु ग्याम्से देःबान साइप्रस दोसाइ नोन दिमग्याम छ्याम नोन थोन्बा थेनिकादेला गे लाबा ग्ला बिसाम साइप्रसरि फेसि फेसि मुबा । फेसि फेसि तासाइ नोन थे दुरीदा ङामरि ताना लाबा प्रविधिसे लामा ङामरि न मुबा आभास छोर्ना लामुबा थेन्दा । साइप्रस दोसि गे लाचिबा थेन्ना रेजुगु हप्ता थेन ला दोसि दिङ दोबा तरखररि मुबा । चुदुइ दोनारि जुनी जाबा ह्युल साइप्रसला बारेरि छ्योआछ्यो ङोसेजिन्मुबा । गोल्छे गोल्छे साइप्रसला रहन सहनरि वाङ्जिन्मुबा । छारछिर थिबा अंग्रेजीला छ्याम ल्हाना च्याङ्ना ‘सिप्रेट’ (साइप्रसला ग्योइ) पाङ्बारि नोन सेजिन्मुबा ।

म्हाङ्दा योना ओन्छुप स्होबारि बिदाला रेरि सुताइ ओभर टाइम गे लास न्हो पोप्बाकेन मुबा, ङोआसेबा ग्लाला ङोआसेबा एजेन्टदा फाबाला लागि । बिबा न्होर पिन्साम थेदा युरोप ह्युलरि दोना लापिन्सेला एजेन्टसे पाङ्बा मुबा । जुनी साइप्रसरि ओभर टाइमला छ्याम १७÷१८ घन्टा गे लाचिमा ओर्से नेपाल बिसाम शरद ऋतुला छ्याम म्हेनिङ तिहारला माहोलरि प्लुम ब्लुमचिमुबा ।
जुनीदा ह्राङ्ला ह्युलरि तिला तिला ताचिमुला बिबा ताम क्योङ थाहा मुला । हिन्बाम थेन्से म्हेनिङ तिहार बिमा ल्होछार नोन ल्हाना ताङ्सि तेन्बा लामुला ।

म्हि खाइमा ह्राङ्ला ह्युलहेन्से थारेङ ताला, थेदुइरि गोबा लाला– ह्राङ्ला ह्युलला राष्ट्रियता थेन ह्युल्ला साप्राला बारेरि, ह्राङ्लाजुगुला छ्यामला बारेरि । जुनी क्योलोलो सार्गे लाबा ल्हुइ थोसि थारेङ दोबा मुबा ह्राङ्लाजुगुग्याम । थारेङग्याम्से दाङ्बाकेन मुला म्हेनिङ थेन तिहार भिडियो च्याटरि च्याटिङ लाबान । भिडियो कलग्याम्से ताबाकेन मुला अमूल्य मोलम आपा आमाला । म्हेनिङ निबातेन तिहार नोन भिडियो कलग्याम्सेन ज्योज्योतेन तेन्ला ।

जाजाकि रहर, जाजाकि बाध्यतादा पाले लासि ल्हानान जुनीजुगु फिरग्याप ह्युलला ङोआसेबा गल्लीजुगुरि कोर्बारि विवश मुला । जुनी खाइमा ताङ्बातेन ङाम ताला, खाइमा दुङालतेन छेला । समस्यातेन आकुर्ना फिरग्याप ह्युल गेसा (कर्मभूमि)रि मेपरिक्षा पिन्बाकेन मुला भाग्यला । तमासा च्याबाकेन मुला तक्दिरला ।

‘मोलोसपार्क’ साइप्रसला लिमासोल शहररि मुबा समुन्द्रतेन थुइबा जेबा पार्क, थेरि बिदाला रे ल्हानान नेपालीजुगुला ह्रापह्रुप ताबा लामुला ।

ल्हानान लिच्छा ह्रुप ताबारि खाबा मुला जुनी ह्रोदा, ह्रापह्रुप रमाइलो ताला । रमाइलोला छ्यामछ्याम लिउला योजनाला बारेरि गम्भीर तासि काठुइ लाला । ब्योङ्चिबा दुइतेन छ्याम ब्योङ्ला, थे गोर ङ्हि प्राणी । खाइमाइ आदोबा ग्लारि गिक्छारेम स्याप्सि । ल्हानान स्याप्ला नेपालीजुगु । वैदेशिक रोजगारीला ताङरि प्रवासी तासि केवा सोबाकेन लामा ताबा फाइदा गुङ्ला प्रमुख फाइदा हिन्ना, ह्रुप तामाहेन्से ताम पाङ्सिन ख्लाबा, थेरि जात, धर्म, भूगोलला बिमा नेपाली ताबारि गर्व छोर्ला ।

जुनी जेबा पार्कला पिङ नार्कपाङ्दा राडि म्हान्सि स्योन ताला, कोर्ला, रमाइलो लाला । आस्याप्बा न्हाङगार रेनिङला ह्राङ्लान ल्हुइरि समर्पित राप ब्रिला । ल्हानान स्हु थेन कष्ट म्लेसि ताङ्बारि बाङ लाला ।

क्यार्से ह्राङ्लान दिमरि मुमा गुर्बा आमखोरा रेन्बारि ब्लेखु जुनी थेन जुनी ह्राङ्बान कलिलो दिङला आङाजुगु ह्राङ्ला दिङबिमा ल्हिबा जिम्मेवारीजुगु जिन्ना लाला, बाध्यता मिनला कठोर परिवेशतेन सम्झौता लासि ।

दिनि न्हुप क्षितिज दोसि नुप्के लाबाकेन लामा जुनी दोसि खाला गे लाबा दिमरि, थेदिमरि गे लाबाला बोरि याङ्बा न्होर खर्च लासि नितोबा मुला सम्पन्नशाली युरोपेली ह्युलरि ।

तिलाइ आतामाहेन्से ओस्सोन म्राङ्बा म्हाङए नोन गज्जबला ह्रो दोबाचिम, गिक्खे तासि सोबा ताङरि । जुनीला अनुभव हिन्ना चु । थेदा खात्दामा लासि दोतोबा मुला युरोपेली ह्युल । थेरि दोसि किन्तोबा मुला थेदा युरोपेली पीआर । थेतासि खात्दामान आदेःबा (गाह्रो)दा नोन देःबा (सजिलो) छोर्बा मुला । संघर्ष लाबाकेन पिरआख्लाना ।

दिम ख्लासि खाबा छ्योआछ्यो ङ्ह् िदिङ्ला आमदानी ङोआसेबा एजेन्टदा पिनजिन्बा मुला । नितोबा न्हाङ्गार ब्रान्ना ब्रान्नान ल्हानान न्हाङ्गारजुगु तिनि थेन तिल्मा दोसि थाल्जिन्मुला । ङोआसेबा एजेन्टला भरोसारि सोना लाचिमुला आशाजुगुदा । आताङ्बाला म्लाङ स्हेर (किरण) न्हान्बा ल्हानान म्हुनजुगु आङ्हुनान (निन्द्रा बिना) थाला ।

नोभेम्बर लाला तिरेकुनु योरि जुनीला ह्रोसे म्यासेज लाजि ।

‘जुनी ! दारेम तिलाइ रेरि ह्याङ्ला फ्लाइट ताबाकेन मुला रो । तिल्मा ङादा तामसोर पुइगाबा मुला एजेन्टसे ।’

जुनीसे नोन ताङसि म्यासेज दोसि पुइजि, ‘चुमि ताङ्बाला ताम हिन्ना । दारे ह्याङ्ला म्हाङ योनान छ्योसेला ह्राङ्मुला ।’

ह्रोसे तामसोर पुइगाजि, ‘एजेन्टसे बिबा, ह्याङ चुग्याम्से एथेन्सदोना फ्लाइटरि निसेला रो, थेलिच्छा बस, ट्रेन ओम खानाङ खानाङजा ब्रासि नितोबा ताला रो ।’

जुनीसे बिजि, ‘खात्दामान लासि दोतोबा मुला ह्याङ्दा ह्याङ्ला गन्तब्यरि । तिलाइ फेबा आता, खात्दामान दुङाल खासाइ नोन ।’

बिमाह्राङ नोन तिलाइ रेलिच्छा निबा रे पक्का ताजि । ल्होलो बाहाना स्होसि रिलिज पेपर ह्रिसि पासपोर्ट यारि पारतिसि जिन्मुबा । जुनी गे लाबा दिमग्याम बिदा किन्सि थोन्जि । ओम थेनोन ङोसेबा ग्ला नेपाली ह्रापह्रुप ताबा मलोसा पार्करि दोजि । जुनी दोमा थेला ह्रो ङ्हाच्छान थेरि दोसि ब्रान्चिबा चिम । थेनि ङ्हि ह्रुप ताजि । कल लाजि एजेन्टदा । एजेन्टसे एनि ङ्हि नोन सोझोन एयरपोर्टरि खाउ बिसि ङ्योइजि । एजेन्टला ताम थेसि थेनि सोझोन साइप्रसला इन्टरनेसनल एयरपोर्ट लार्नाकारि दोजि । जुनी थेन थेला ह्रो एयरपोर्ट दोमाबिमा ङ्हाच्छान एजेन्टसे तोबा डकुमेन्ट, हवाइ टिकट किन्सि थेन्दान ब्रान्चिबा मुबा । एजेन्टतेन स्यान्दो गोर ङ्हि छामेजुगु नोन मुबा । थेनिचा भारतीय मूलला मुबा । दारे ग्रीस तासि पोर्चुगल निबा म्हिला संख्या गोर ब्लि ताजि । चुह्राङ लासि छ्याम नोन निबा स्यान्दो ह्रो स्याप्बासे जुनी ताङ्जि । केवारि गिक्छारेम ह्रुप ताबा ङोआसेबा ऐजेन्टतेन तिलाइ दुइ ह्रुप तासि पिन्बारि लेङ्बा न्होर ङ्हिसेन फाजि ओम थे ऐजेन्टग्याम किन्बारि लेङ्बा ट्राभल डकुमेन्ट किन्जि ।

एजेन्टसे ग्रीस दोमाहेन्से रिसिभ लाबा एजेन्टला मिन थेन फोन नम्बर पिन्जि । ङोआसेबा ग्याम झान नोन ङोआसेबा ह्युलरि म्हाङजुगु म्हाइबारि थोन्बा गोर ब्लि छामे ऐजेन्टजुगुला गिक्छा ह्रुपदा लिच्छाला ह्रुप स्होसि बाई बाई लाबान टिकट काउन्टर निसि बोर्डिङ पास किन्जि ।

अध्यागमन अधिकारीसे साइप्रसग्याम एक्जिट ताबाला लागि स्ट्याम्प ल्हागाप लापिन्जि पासपोर्टरि । गोर ब्लि चेली बोर्डिङ गेटरि निसि चिजि, फ्लाइट टेक–अफ ताबा दुइ ब्रान्सि ।

ब्रान्बाला दुइ जिन्जि । फ्लाइट क्रेजि । एयर होस्टेजसे सिट उन्जि । चिजि ह्राङ ह्राङ्ला सिटरि । म्हाङजुगु साकार ताबा गन्तब्यरि दोबारि ।

हवाइ जहाज फ्याङ्जि खासुदा पर्दा क्लेसि । झान नोन न्हुपला मु ताकतिसि । लाबारि ब्याज फ्लाक्सि फ्याङ्बाकेन लाबा बिमानतेन फ्याङ्बाकेन मुबा जुनी डान्बाला स्यान्दोन मुरि ।

छ्यो आछ्यो घन्टा ङ्हि फ्याङ्बालिच्छा दोजि एथेन्स इन्टरनेसनल एयरपोर्टरि । चुर्सेला एजेन्टसे बिमाह्राङ नोन ग्रीसला एयरपोर्टरिन थेन्दा किन्बारि याखारगि बंगाल ह्युलला बंगाली ब्रान्चिमुबा ।

एजेन्टतेन ह्रुप ताजि । थेला लिच्छा वाङ्सि ब्राचिजि । याखारगि सस्तो खालला गेष्टहाउसला कोठा बुक लाबाला चिम ।

‘लाउ आङानि हिन्ना, फ्रेस ताउ । थेलिच्छा ङाइ तिलाइ ताम पाङ्ला एनिकादेदा’, जाजाकार हिन्दी पाङ्बा बंगाली एजेन्टसे गोना लाजि गोर ब्लिदान, ‘तिनि चुरिन चिला, न्हाङ्गार योरिन ल्हात तिला बसग्याम्से एन्ना । चुग्याम्से बुल्गेरियादोना बसरि नितोला । थेलिच्छा साइबेरियादोनाला ल्हान ट्रेनग्याम्से तासेला मुला । थेलिच्छा एनिकादे हंगेरी ताबान स्लोभाकिया दोसेला मुला । स्लोभाकियाला बोर्डररि जाकि बाङ्से जाँच लामुला, थेतासि तिलाइ दुइ काङसे ब्रातोसेला मुला ह्रिला ग्याम । स्लोभाकिया वाइमाहेन्से अस्ट्रिया, स्वीजरल्याण्ड, फ्रान्स ताबान स्पेनलिच्छा एनि ह्राङ्ला गन्तब्य बिले पार्चुगल दोसेला मुला ।’

एजेन्टला ताम थेसि ब्लि नोन हाथोम्जि ।

थे बंगाली एजेन्टसे काप्जि, ‘चिन्ता आलउ, ङाए नोन एन्तेनछ्याम तासेला मुला ।’

थेनि ब्लि नोन ताङ्जि । ह्युलजुगु ल्हानान तासाइ नोन जा जा ह्युलजुगु डिक्सि स्होबा मुला युरोप महादेश । ह्युलजुगु जाजा तासाइ नोन आर्थिक लिरि ल्हानान कोङ्बा मुला युरोपेली ह्युलजुगु । थेतासिमि स्योन्दो ह्युलला म्हिजुगुला लागि आकर्षक ह्युल ताबा मुला । तिलाइ घन्टाला ल्हामलिच्छा दोल ागि ह्युल ग्याम्से स्यान्दो ह्युल ।

न्हाङ्गारदाङ्से एजेन्टतेन छ्याम थेनि ब्लि थोन्जि रोडम्याप फलो लाबान । ल्हामरि दुविधा मुबा । लोङ थेन डोबा मुबा । दोमु कि आदोमु बिबा लोङ्बासे सताप लाबा मुबा बाङ्से । एजेन्ट पाको दिङला मुबा । इमानदार नोन मुबा । ह्राङ्लान आङाजुगुदा ह्राङ्बा व्यवहार लामुबा ।

थेतेन युरोपेली पासपोर्ट मुबा । मुतेबा युरोप ङोसेबा मुबा । थेला गे ग्रीसहेन्से पोर्चुगल दोना म्हि सानिबा मुबा । खाजिबा ग्लाग्याम्से, खाजिबा ग्यामग्याम्से नितोबा हिन्ना, मुतेबा थाहा मुबा थेदा ।

तिलाइ रेला ल्हामलिच्छा दोजि स्लोभाकिया । स्लोभाकियाला बोर्डर थाबारि जाकि मुस्किल ताबासे थेन्से दाम्बा मुबा काङ्से ब्राबा ग्यालाम । अबैध ग्यालाम तासि सफल म्हाङ्ला ह्युल दोबारि केवादा जोखिमरि थान्सि ल्हामदा ङ्हाच्छा बोर्बा ताङ जारी मुबा ।
स्लोभाकियाला चर्चित ह्रि ब्रेजिनाला ह्रिग्याम ताबान अस्ट्रिया दोबारि ङ्हाच्छा निबाकेन मुबा थेनिकादे । ल्हाम कठोर मुबा । नोभेम्बर लारि ल्हानाह्राङ्बा रेदाङ्से ग्लिङ ताइमुबा । ग्लिङसे गाप्बा अनकन्टार हान्डो ग्युरु ग्यालाम । ल्हानान कष्टकर ताबाकेन मुबा ग्यालाम । ल्हाम खात्दामान कष्टमय तासाइ नोन सेमन्हाङरि फुइबाकेन लाबा जाबा सफल आसाला मन्जरीसे छोर्ना लाबाकेन मुबा शिथिल तासिकेन निबा ल्हुइ थेन सेमदा ।

ल्हाम गोल्छेसे ङ्हाच्छा वाङ्बाकेन मुबा । सिम्बा माउसम थेन ग्लिङ ताइबाला असरसे जुनी नाबारि ((विरामी) चुजि । सिम्बा क्यासि सिबा न्हा सोबा ताजि । अबैध ग्यालाम तासि ब्राबा कारणसे तिक्खुरि अस्पतालरि बोर्सि उपचार लाबा सम्भावना आरेमुबा । छ्योआछ्यो स्लोभाकियाला सिमाना वाइसि अस्ट्रियाला सा ङ्हेबा दुइरि थेला नाबा (विरामी) डोङ्बारि पोजि (परिणत भयो) । लेङ्बा स्यान्दो ह्रो थेन एजेन्ट लोङ्सि दार्बारि चुजि । तिला लासे, तिला आलासे । ग्रेन फसादला ह्वाङरि ताइबारि दोजि, थे ह्वाङग्याम थोन्बारि ल्हानान कठिन मुबा ।

छ्याम निबा एजेन्टसे साङग्युर पुइजि साइप्रसरि मुबा एजेन्टदा, ‘याखारगि डोङ्जि गाङ्साल ग्यामरिन ब्राना ब्राना बिरामी तासिमाम ।’

तामसोर याङ्बाला छ्याम थेर्ला एजेन्टसे ग्रोइ पिन्जि, ‘थेरिक्यारलान पुलिस चौकीरि निसि आत्मसमर्पण लाउ । ह्राङ्ला ख्योल्बा (गल्ती) स्वीकार लासि माफी ह्रिगो । ओम थेन्से समस्या समाधान लासेला मुला ।’

बिमाह्राङ बंगाली एजेन्टसे लाजि । पुलिसजा दोसि मुतेबा ताम सेजि । ख्योबा स्वीकार लासि क्षमा ह्रिजि । ग्रेन ह्युलला म्हाङ थोसि ब्राबा आप्रवासीदा पुलिससे शरण पिन्जि ।

ङ्हाच्छाम क्रिङ्जि पुलिससे । डोङ्बा ल्हुइदा प्रहरीला रोहबररि हस्पिटल बोर्जि । स्यान्दोला पुलिस शिविररि थान्सि केरकार लाजि । थेन्से मुतेबा ताम आलुना पाङ्जि, ‘ङानिकादे पोर्चुगल निबारि ब्राबा हिन्ना । ङान्तेन लिगल कागजात आरे । एजेन्टसे थेदोना दोना लाबा बोरि न्होर किन्बा मुला । थेरि दोम्याङ्साम देःबा (सजिलो) टीआर याङ्ला ओम लिच्छा पीआर याङ्ला बिबा थाहा तासि चुह्राङ्बा कठिन ग्यालाम दाम्बा हिन्ना ।

जुनी तिक्खुरि सिबासे छोन्बोजुगुला नोन म्हाङ चकनाचुर ताजि । पुलिससे गोर ब्लिलान बारेरि वाणिज्य दुतावासरि तामसोर पुइजि । दुतावासग्याम खाबा पदाधिकारीजुगुला पोपरि ह्राङ ह्राङ्ला ह्युलरि डिपोर्ट लाजि । जुनीला डोङ्बा ल्हुइदा बिसाम अस्ट्रियारि मुबा नेपाली दुतावासला रोहबररि नेपाल पुइबा निधो लाजि ।

अस्ट्रियारि मुबा ल्होलो गेन्दुन थेन दुतावासला ह्रोरि डोङ्बा तिलाइ ला लिच्छा दोसि निजि जुनीला पार्थिव ल्हुइ नेपालरि । कादे ल्हाना चेगाइ थेन स्नेहला छ्याम छार्बा जुनी ग्रेन म्हाङजुगु थुबारि ब्राबा सम्पन्नशाली ह्युलग्याम दिङ सोम छ्योआछ्योरि याखारगि वाला बाकस दोसि दोसि खाजि ।

थेला डोङ्बाला तामसोरसे स्हुला महासागररि ब्लुम्बा मुबा थेला दिमम्हे । गिक्खे जामेला अविश्वासनीय डोङ्बाला तामसोरसे छ्वाछ्वा ताबा सेम थोसि ताबा मुबा जामेला डोङ्बा ल्हुइसे प्लिङ्बा वाला बाकस । वाला बाकस दिमरिन बासि ओर्सि च्याजि आपा आमासे । जामे ङोसेबारि आखाम्बा ताजिन्बा मुबा । सार्गे लाबा पुपुह्राङ्बा जामेला लि थेरिक्यारलान ङोआसेबा ह्युलला ङोआसेबा डाक्टरसे पोष्टमार्टमला मिनरि कुरुप स्होसि पुइगाबा मुबा ।

थेदा ङोसेना लाबा बिबा थेला मिन थेन ठेगाना जेक्खे मुबा । बस्, थेदा ङोसेना लाबा बिबा थेला खिचप लाथान्बा तस्वीर मुबा । क्रासि, क्रिङ्सि, बिलौना लासि जुनीदा दोसि बाबारि आखाम बिबा थाहा ताना तानान ल्हानान क्राजि आपा आमा थेन थेला ल्हानान ङेङ्गोरजुगु ।

चलप तासिकेन खाबा रिम किन्सि बौद्ध तामाङ गुम्बाग्याम लामा ङ्योइसि बाजि । लामासे विधि आन्सारला मुतेबा रीत छ्योना लासि कर्मकाण्ड जिन्ना लाजि ।

ङोआसेबा ताजिन्बा जुनीला पार्थिव ल्हुइदा सिंगार तिसि ‘ढोम’ बिले छिङ्गाइ ख्रिनग्याम स्होबा प्रकार गिला खटरि थान्सि मलामीला छ्याम बिदा लाजि सातानला लागि । ङ्हाच्छा ङ्हाच्छा लामा । लामाला लिच्छा लिच्छा मलामीला बामरि क्रेबा जुनीला पार्थिव ल्हुइदा जोरपाटी, नयाँबस्ती ताबान दोना लाजि जम्बुगाङरि । जम्बु गाङ मंगोल वर्ण मुबा म्हिजुगुला सिबालिच्छा दाहसंस्कार लाबा ग्ला हिन्ना, थेग्याम्से तिला म्हिजुगुला महाप्रस्थान–महायात्रा ।

क्योलोलो केवा ङोसेगे लाबा दिङरि डोङ्बा जुनी नुप्बा निद्रारि मुबा । थेला डोङ्बा म्राङ्सि ल्हानान ह्राङ्लाजुगु कु ठोक्सि ठोक्सि क्राचिबाकेन मुबा । केवाला उत्तरार्धरि दोबा ह्राङ्ला म्हिसे मिख्लि पुइसि बोमो ल्हुबाकेन मुबा यमराजतेन, ‘बरु ङातान बोर्बा हिन्साइ तासेला’ । सेमदा कठोर स्होसि जुनीला केवाबिमा ल्हानान ङ्हाच्छाला केवाजुगुसे सतलरि चित्ता स्होबाकेन मुबा जुनीदा ख्राङ्बारि । चिता स्होजिन्माहेन्से लामालसे लातोबा मुतेबा गे जिन्ना लाजि ओम लिच्छारेम मुतेबासे श्रद्धान्जली पिन्जि जुनीदा ।

दुइला सेम थिबा मुबा, थिबा दुइ आताबा सेम थिना लाबारि बाध्य तामा । दुइतेन छ्याम ब्योङ्बा दिनि न्हुपला छितिजरि दोसि नुप्बारि म्हाइबाकेन लामा पिन्जि दागबत्ति जुनीदा ह्राङ्लान आपासे । गोल्छेसे मे ल्हेजि चित्तानाङ । म्हार थेन चिनिला छ्याम ह्वार लुङ्बा मेला ल्हामसे क्रोसि मेफ्रा दोना लाजि जुनीदा ।

दुइ ल्हानान थालजिन्मा नोन जुनीला डान्बा थेर्ला थेरिन मुला, थे दिमम्हेरि । थेसे सुबा बगैंचाला अम्बक रोबारि चुबा मुला । थेसे सुबा म्हेन्दोजुगु सिजन आन्सार सार्ला ढकमक्क । थेसे दाम्सि बाबा लुसी नाकि खुयु दोबाकेन मुला ।

दोःबा : यकिना अगाध