तिन्हाङ्गार नाम्साला म्रापजुगु डुङ्बा म्राङमु
बस्तुभाउसे च्योरप्लिङ्बा
गोठेजुगु थानथान मुला
दिमला छाना ब्रेसि
काङ्सा (कमेरो) से च्युर्बा डेङ
ह्याल्बा (खुइलिएको) म्राङमु
दलानला फलैचाजुगु
बर्खे नामसे बामसि
जीर्ण ताजिन्बा म्राङमु
बु ह्वाराजुगु बाँझोन मुला
चौताराजुगुसे बटुवाला अभावरि
ह्राङ्ला धर्म किन्बारि ख्लाजिन्जिम
गन्तव्यदोना डुइसिकेन बोर्बा ग्यामजुगुदा
बनमारा थेन च्यानछिनसे गापजिन्जिम
म्हिजुगुला पाबा उपस्थिति म्राङ्सि
बनमारासे ल्हेबा माउका याङ्जिम
ब्रेल्साङजुगुरि जन्ती च्याङ्ना म्राङमु
ज्याबाआज्याबारि घाटदोना निबा मलामी
च्याङ्ना स्याप्मु
तिल्मादोना गुल्जार नाम्सारि
म्हिजुगु पाबा म्राङ्मु
पाबा बस्तीरि म्हुना थाबाजुगु
ह्राङ ह्राङरिन ङोआसेबा म्राङमु
बस्तीग्याम सहरसे म्हिजुगुदा छेङचिमुला
सहर वाङ्माहेन्से म्हिसे
नाम्सादा म्लेबारि चुबा मुला
साहुला छे फाबा थेन छाक ङ्ही चाबारि
छाबा (जोहो) सेम थोबाजुगु
बाध्यतासे लामा ह्युल ख्लाबाकेन मुला
फिरग्याप ह्युल निबा म्हिजुगु दोसि खासि
सहरदा दाम्बा मुला
सहरला म्हिसे बिसाम शिक्षाला पालेरि
समुद्र क्याम्साङ्ला ह्युल दाम्बा मुला
केबा ग्ला म्लेबा मुला
नाम्सा नाम्साला युवाजुगुरि
फिरग्याप ह्युल निबा रसायन फ्रुप्बा (बर्सेको) मुला
नाम्सादिम थानथान ताबा मुला
रैथाने अन्नाला बो ख्युन मुबा
अन्न वाङ्काबा मुला
ल्हुइ जीर्ण मुला
मोबाइल थेन इन्टरनेट आरेना
केवा अकोसेला तामुला
आत्मियता च्याङ्बा मुला
दिमगिक्खेला दिमम्हे न्हाङरि
कलह ल्हेबा मुला
सामाजिक साइतेन्बा (मूल्यमान्यता) म्हाजि
सामाजिक सन्जालतेन नाता थुइसि
ङेङगोरजुगुतेन नाता टाङ्बा मुला ।
दोःबा : यकिना अगाध
