मिन थामा बोमो खाजि
मिन आथामा नोन बोमो खाजि
कादे लादोना ताम आपाङ्नि डान्मुला,
गाङदिमला मानेदा सार्की बिमा
पोते बोमो खाबा
पोतेदा
आपाला मिन थासिकेन
‘मानसिङ ताइ हाप्पाला जा’ बिमा
सार्की बोमो खाबा
मेबा ज्योपाराङदा
ह्राङ्लान म्हाकेन गोले पाराङसे क्रिङमा
कोन सोमे बोमो खाबा
सेतेला बुद्धिमानदा
सार्की बिमा औतार ङातेन छेबा
नाम्सारि चुमि चेगाइ चिम,
डेन चिम ।
ङाला आपाला या क्युइबा ताबासे
तामाङ ग्योइरि
‘याक्युइ खेप्पा’ बिमा
गोले पाराङस्या चाङगेनसे
साइलीदा
स्युर्सि स्युर्सि ग्याङबा
गिसेम गिला डोनका चिम ।
नाम्सामि
ख्योल्ना (गल्ती) लासाम केःबा क्रिङ्बा
आङ्यान्साम याफ्लासेन छेप्साइ नोन
आन्होङ्गाइ बिबा दोनाला चेगाइका चिम ।
मेर्सिङ पाराङ ज्योज्यो,
म्योबा पाराङ
वाईबा पोडेसे
ग्याम कासि कासि, स्युर्सि स्युर्सि
अनरपेन स्युपिन्बादा ङान्छे
ज्यादाती छोर्मुबा
ओहोइ ! ज्यादती नोन गा
ङाम ताबा पाले (बहाना) चिम, चेगाइ चिम
ङोबा, क्यालो लाबा नोन चेगाइ चिम….।
ल ग्योइरि,
ग्रेन युङ्बारि क्रेसि फाल छेप्मा
बुङ्जोर स्योङ्ला क्रारि
लङगङ ग्योइरि क्याल्मा
खाइमा प्लोट्टातेन खाइमा
उटुट्याङला ग्ले आग्रा ज्योज्योतेन
खाइमा क्योङ बुङ्जोरतेन
खाइमा क्योङ कुलिया थेन रतनपुरतेन
छेसि ब्राबा
नाम्सारिम,
क्यारआङ मारआङ (पैंठेजोरी खेल्नु) लाबा नोन क्लाङ (खेल) गा चिम
ग्रेडिङ चिम
बाङला, तागतला, चेगाइला… ।
बुङजोरला
बाङ्बा बाङ्बा जुरे म्हेदा
ह्याङ्ला रिठे थेन चौंरेसे डामा
बुङजोरला गोठाला बोमो खाबा
चु मुतेबामि चेगाइ गा चिम ।
गोठालो निमा
रा थेन ङादा स्योङ्से ब्योङमा
गुराउला डुइदिरि
चुन युङ्बाफिग्याम
पाखुरा चुङ्सि सेम दुइसि
स्योङ क्याम्साङ ब्याङ्बा
प्रदीप ज्योज्यो, लोप्चन च्याङ्ब,
जमदार स्याङ्दान ज्योज्योजुगुदा
दान्नाइ सिबा ङादा
थेन्सेन पिन्बा
बु (प्राण) दानरि गा छोन्बो चिम ।
चुमि ङाफिला चेगाइ गा चिम…
ह्राङ्लान ल्हुइ जोखिमरि थान्सि
सोना लाबारि
होनरि फाल छेप्पाजुगु…
एन्दा लाख सलाम मुला ।
दाते
माने तिगा लाबाकेन मुसिम,
पोते खानाङ मुला ताला,
आईते, सोमेजुगु
बुद्धिमान, आग्राजुगु
तिगा तिगा लाबाकेन मुसिम ?
चु क्योङ दार्से
आईराम, खत्री, याक्टाजुगु
तोगो, सुबात, सवालजुगु
रिले, मुन्ना, फ्याङ्दा च्याङ्बा
बल च्याङ्बा, चक्रे ठाइलाजुगु
सानो कान्छा, ठूलो कान्छाजुगु
ठूलो पोते, सानो पोतेजुगु
ठूलो सार्की, सानो सार्कीजुगु ।
म्हेनिङरि दिमरि खासेला मुला ह्रोजुगु डान्सिमाम
ग्यालाम फ्यासि, छाप्सि टिलिक्क ताना लासि
ब्रान्चिबा मुसिम ओन्छ्यान !
म्हेनिङरिम खासेला मुला ह्रोजुगु
स्यान्दो आखासाइ थे मादेमि पक्का खाला बिबान ग्यालाम च्यामुसिम..
फिरग्याप ह्युल निबा जाजामेग्याम होबा (खेपेका)
निरासासे फाकफोक क्युइबा सेमजुगु
पाङ्सिमाम स्हु बो लाबारि आम्याङ्बा स्हु
याङ्बारि (हल्का) आयाङ्मा
बो लाबारि आम्याङमा
थेसे म्हान्मुसिम–
‘थुक्का लाबुह्राङ्बा स्वार्थी ह्रो
एनिकादेसे नोन गा
चेगाइ सेजि (मार्यो) होइ दारेम
नाम्सा खाबारि ख्लाजि ?’
नाम्सारिम चु केःबा आहिन हक हिन्ना
नाम्सारिम,
दात्ते नोन चुह्राङ्बा चुह्राङ्बान ताला
हिन्ना, चुनोन नाम्साला चेगाइ हिन्ना… !’
२०८०÷७÷९ (नयाँ बजार पोखरा)
छिगला अर्थ :
केःबा– गाली/सराप, चेगाइ– माया/ प्रेम
दोःबा : यकिना अगाध
