बिसंगतिला म्लाङ स्ह्याल्गापसे
काबारि आखाम्बा
चु निर्दोस आरेबा स्ह्यालकादे
जेबा जाम्बुलिङदा
च्याबा चुमा हेन्से
स्योङला कुनिरि
ठेराला युङ्बारि
क्युइला छ्योछ्योसे ठोक्सि
युङम्लाङ दोमा ह्राङ
चु तिङ तामा हेन्से
प्लेबा खोन्माकादे
तिक्खुरि छोर्बा चुमा हेन्से
एदेन च्योल्बा चु सेमकादे
एला डान्बा आरेबा सेमतेन
म्हाबारि म्हाइमा हेन्से
एनोन भरतुप्बा चेकाइदा म्हान्सि ।
ङा ह्राङतेन छ्याम
जिक्तेनदा सोबा सेमसे
सेम जो ! ङाइ एला
चु तिङ्ला गुरि ग्यान्बान हिन्ना ।
एदेन ङारि
ल्हामान आडिक्बाकादे मुला
ल्हामान ल्होलोकादे मुला
ल्हामान सेम अनिबाकादे मुला ।
ङाइ जिला !
एलान नाङ्बा प्लेबासे
ङाला ना प्लेक ताबा हिन्ना
एसेन लासि
दाङपो हेन्सेन नाङसि खाबा हिन्ना
एसेन लासि
ठिग्याम रेरिनदान ताइबा हिन्ना ।
ङाइ जिला ।
एसे ङादा दुल्सि थान्जि
ठिला तेन्पु क्रेजि
ङाला गोरि क्रेसि फाप्जि
ना प्लेगकादे ल्हुइ क्योङ
रेनोन आखम्ना लासि प्लेबा
कास्किकोटरि केवा
ङ्हाच्छाला ग्लेला ह्युल्बाम ए ।
ओसिम
एसे ङादा बिला
तामाङ लिच्छाला ग्लेला ह्युल्बा
गान्दि रोसिला क्रेफुइतेन छ्याम
तेमालला गाङरि
लाजाङ क्लाङसि छार्बा प्लेक्चे
चोदे आडिक्बा मुना मुनान
चोदे ल्होलो ताना तानान
साल्हाम थाहेङ साँद थिङ म्हुस्यापलासि
थे सेम चु सेमरि सुटुक्क चिखाउ
थे सेमदा चु सेमरि बास पिन्ना
आडिक्बा म्होकोन म्लेगो
ह्रुइबा प्रागा वाइगो
एदेन ङा गेक्खेन ताबारि म्हाइबा आहिन ओम ?
खाउ
ए ङा
ङा एला ताला
गान्दि रोसि हाङ
दुइतेन छ्यामछ्याम ब्योङ्ला
ओर्स एला अन्नपूर्ण
चुर्से ङाला जुगल ह्राङ
कल्प कल्प अफेना टिला ।
(थोर्बा दोखाङ ह्वाइखा पोपग्याम)
