थाहा आरे ङादा !

ङाला ह्युल खाइ !
खाइदमा दोना ग्युरु ल्हागतिचिसेला मुला ताला ?
ओम खाइमा दोना अलच्छिन ल्हागतितिसेला मुला ताला ?
ह्राङ स्याबारि आसे,
ओम ख्राङ्गा कोल्डेङ खाइमादोना म्राङ्सेला मुग्याम !
ख्राङ्गादा खाइमादोना पाले लाचिसेला ?
ह्राङ ख्योल्ना लाचिबा स्यान्दोदा ख्योल्बा उन्सि उन्सि
ह्राङ ङ्हेसे स्याल्बा साङ्बा सावित कादे लाचिसे ?

थाहा आरे ङादा !
दोप थेन अन्धविश्वासला रेखा दिरि
चु, थेला मिनरि कादे भ्रमला खेती लासि लासि
ह्राङ्ला अनुकुलला दुनोन सोज्याब लाचिबा ?
अन्धविश्वासला अवशेषजुगुदा छिङ्सि छिङ्सि
खाइमादोना सार युचिला ?
ङ्हेला साक्षी तावार स्होसि
वकपत्र पिनचिला ?

थाहा आरे ङादा !
खाइ खाइमादोना !
ख्योल्बादा ख्योल्बा आबिना
ख्योल्बादा देन्बा स्होला ?
कादे छुबा !
आहा ! कादे ज्याबा बिचिला ?

थाहा आरे ङादा !
तिनिदोना ले
अन्धविश्वास थेन एकात्मक राज्यसत्ताला
प्रभावरि खाइमा दोना कोल्सेला हिन्ना, ङाला ह्युल !
बिबाम सतिसे केःबा ह्युल बिमुला
तासाइ सतिसे केःबा बिमा एकात्मक राज्यसत्तासे
डामतिबा, सेकाप लाबा ओम पिल्साप लाबा ङाला ह्युल
एकल ङोसेबा थेन धर्म ठिमसे छ्योल्बा ङाला ह्युल !
चुनोन वास्तविकता !
स्यान्दो वास्तविकता थेन यथार्थ चित्रण
भ्रष्टाचार थेन बेतिथि ओम नीतिगत विसंगतिसे
खोक्रो स्होबा मुला ङाला ह्युल !
खाइ खाइमादोना कोला
चुह्राङ लासि ङाला ह्युल नेपाल ।
उखान टुक्कारि उ… चाबासे ङाला ह्युल
बंगलादेश स्होला कि बिबा चिन्ता मुला ।
र्याले थेन स्यालेजुगुसे च्युइछा ताजि
ब्यान्बा छेङ्बा लासि लासि चाबा ङाला ह्युल
खाइ खाइमादोना लाचार तासि च्यासि चिसेला मुसिम ?
टुलुटुलु च्याचिमु ?
माना गि थेन छाक गि
ओम सरो गि स्वार्थरि !

थाहा आरे ङादा !
चारोजुगुरि चराजुगु ताङ्बा ह्राङ
ताङ्बा मुला टनक्क म्रेन्सि !
खाल्दा तिला मतलाब चुरि
चारोजुगु चाबारि म्याङ्बान मुला
तिल्दा स्हुखाना लासेओम थोबो
उखान टुक्केदा ह्रो पिन्बाला पिन्बान मुला
लिब्रोला लागि लिब्रो लाबान मुला
खाइ खाइमादोना हिन्ना !

थाहा आरे ङादा !
थाहा आरे ङादा !
देन्बा थेन यथार्थदा खाइमा गोसेला हिन्ना ?
म्हेर्बाग्याम क्योङ नेपाली ह्युल्बा खाइमा छोर्सेला हिन्ना !
देन्बादा ह्रो ओम ख्योल्बादा ख्योल्बा बिसेला हिन्ना ?
खाइ खाइमा खाल्से गोलसेला मुसिम ?
चेतना ब्लु खाइमा ड्वासेला मुसिम ?
ल्होलोरि गिक्खे कायम लासि
च्योच्योला विगुला खाइमा ह्राप्सेला मुसिम ?

ङादा थाहा आरे !
खाइमादोना ग्युरु ल्हागतिसि चिसेला मुसिम
जेक्खे ! अलच्छिन ल्हागतिचिसेला मुसिम ?
थाहा आरे ङादा…
थे कारण
ङाजा कासाल आरे ।

दोःबा : यकिना अगाध