ह्युल थेन ह्युल्बाला सुख, शान्ति, समृद्धि थेन उन्नत समाज स्होबाला लागि याखारगि आदर्श राज्य डिछ्या तोला । चुह्राङ्बा डिछ्या बाबारि ह्युलरि ज्याबा दिशा निर्देश लाबारि खाम्बा ग्लेठिमखेन्पो, दार्शनिक, चिन्तक, राजनेता, ब्रिखेन थेन कार्यकर्ताजुगुला तोबा मुला । नेता, लोन्पो, सांसद, जनप्रतिनिधि, कार्यकर्ताजुगु माङहेन्से फिदोनाला तहदोनाला कर्मचारीजुगु, प्रशासनिक थुमरि गे लाबाजुगु ज्याबा थेन इमानदार आताते दोना ह्राङ ह्राङ्ला पदीय जिम्मेवार वफादारीपूर्वक आलादेदोना ह्युलरि न्हा सुशान ताला न्हा ओम विधिला शासन नोन ताला । तासाइ ह्युलला शासकजुगु इमानदार आतानि ह्राङ ह्राङ्ला कर्तव्य थेन अभिारा ह्युलफिरि इमानदार तासि निर्वाह आलानि ।
चु नोन कारण चुरि अराजक गतिविधि ताचिजि । आपराधिक घटनाजुगु दोसिदोसि ताचिजि । भ्रष्टाचारसे नुप्बा लिरि टा क्योचिजि । फेबा थेन लेबा ताचिजि । हिंसा, बलात्कार, संगठित अपराधजुगु ल्हेचिजि । म्हाना लाबा, बोबाफोबा लाबा, म्हि चुङ्बा होबा, ब्यान्बा, घुस चाबा, ह्यो लाबा थेन अनियमितता लाबा गे थेनताबा आरे ।
पूँजीवादी डिछ्यारि न्याय थेन च्योच्यो आयाङ्मुला । शासकजुगु नैतिकवान थेन चरित्रवान आतामुबा । चु कारण कम्युनिष्ट पार्टीजुगु शोषण आरेबा समाज स्होबाला लागि ल्हागतिबा हिन्ना । गिसे स्यान्दोदा आनाङ्बा, शोषण आलाबा, समाजवादी व्यवस्था स्होबारि माक्र्सवाद, लेनिनवाद थेन माओत्सेतुङ विचारधारदा ग्यामउन्बा सिद्धान्तला लिरि किन्बा, नेपालला कम्युनिष्ट आन्दोलनरि म्राङ्बा खोटा विचार लिब्रो संघर्ष लाबान नेपाल मजदुर किसान पार्टी ल्हागतिचिबा हिन्ना । नेपालला कम्युनिष्ट आन्दोलनला दोङरापरि तथाकथित संशोधनवादी थेन वामपन्थी अवसरवादी थेन छद्मभेषी शासक कम्युनिष्ट पार्टीजुगु एमाले थेन माओवादीतेन सैद्धान्तिक मतभेदला आधाररि संघर्ष लाबान नेपाल कम्युनिष्ट आन्दोलनदा सही दिशा निर्देश लाबारि होइस्हेर स्तम्भला लिरि नेपाल मजदुर किसान पार्टी स्हेङ्बा दुइहेन्सेन फेसि सडक थेन सदनरि गेनाम वर्गला काइ थिबान खाजिबा ताम दिनितेबान छर्लङ्ग मुला ।
वर्गीय समाजरि वर्गसंघर्ष ताबा स्वभाविक नोन हिन्ना । बहुमत ह्युल्बाला चाबा, चिबा थेन क्वान्बाला डिछ्या आतातेदोना बिले केवा (जीवन) सुनिश्चित आतातेदोना संघर्ष तासिन चिला । पूँजीवादी व्यवस्थारि प्रजातान्त्रिक अधिकार तासाइ नोन शोषण आनुप (अन्त्य हुँदैन) । वर्गीय च्योच्यो आतादेदोना संघर्ष थेनचिसेला आरे । समाज ङ्हाच्छा बोर्बारि छार पुस्ताला युवा लोप्डाजुगु सक्रिय तातोला । छार पुस्तारि सैद्धान्तिक थेन ग्लेठिम कक्षा संचालन लाचितोला । ह्युल्बासे न्याय थेन च्योच्यो जेक्खे आहिन छाना, क्वान थेन चाबा आयाङ्तेदोना चुरि शान्ति तासेला आरे । कम्युनिष्टला सरकारसे योग्यता आन्सारला गे थेन गे आन्सारला ज्याला याङ्बा डिछ्या लाला, छ्याछ्यामरि उत्पादनला प्रमुख साधनजुगु सामाजिकीकरण लाबा, व्यक्तित्व विकास थेन अवसर पिन्बा, शिक्षा, स्वास्थ्य क्योङलिरि निशुल्क लाबा, क्रान्तिकारी भूमि सुधार लागूलाबा, ह्युलदा औद्योगिकरणला दिशारि छेङ्बा थेन सम्पत्ति निजी स्वामित्वला नुप्ना लाबा संघर्ष लाबा गे लामुला । थेतासि ह्याङ्ला ह्युलरि रेमरेम सरकारला नेतृत्व लासि चु मुतेबा प्राङ्बो गेलाबा ह्युल्बाला हिततेन सम्बन्धित गे आलाबा थेन संघीय लोकतान्त्रिक गणतन्त्र बिबान जातीय मुक्तिला ताम लाबान सम्प्रदायवादला पक्षपोषण लासि पूँजीवादी गणतन्त्रला सरकाररि निसि गेलाबा वर्गदा शोषण थेन शासन लाबा शासक पार्टी एमाले थेन माओवादी कम्युनिष्ट पार्टी आहिन । बरु चुकादे कम्युनिष्टला खोल न्हान्सि ब्राबा पूँजीवादी पार्टीजुगु हिन्ना । थेतासि प्रजातान्त्रिक थेन कम्युनिष्ट बिबा शासक दलजुगु सिद्धान्त थेन विचाररि आराप्ना अवसरवादी दोमा ह्युल थेन ह्युल्बाला हितरि गे आतानि । बहुमत ह्युल्बाला सेवा लाबा मिनरि कम्युनिष्टि शासक दलजुगु पूँजीवादी व्यवस्थारि वाङ्माहेन्से नेपालला कम्युनिष्ट पार्टी थेन नेपालला कम्युनिष्ट आन्दोलन कमजोर थेन रक्षात्मक दुइरि दोबा हिन्ना ।
पूँजीवादी व्यवस्थाला सरकारसे पूँजिपति वर्गला सेवा लाला, थेन्ना हक हितरि ऐन, कानुन स्होला । मोही आयाङ्चिमान द्वैध स्वामित्दा जिन्ना लाबा ताम कमैयामुक्त घोषणा किसान थेन उत्पीडित ह्युल्बाला हितरि आरे, चु पूँजीपति थेन जमिनदारजुगुला हितरि मुला । योग्यता आन्सारला गे थेन गे आन्सारला ज्यालाला बन्दोबस्त आलाबा गिक्खे प्रकारला आर्थिक शोषण नोन हिन्ना । ह्युलरि मुबा श्रोत थेन साधन नोन ह्युलसे उपयोग लाबा बिले सरकारसे उपयोग लाबारि आखाम्नि । ह्युलदा तोबा आरेनान आताबा स्हे फिरग्याप ह्युलला म्हिजुगुतेन ह्रिसि फिरग्याप ह्युलम्हिला ह्रोग्याम बजेट स्होसि ह्युल खाइमाइ नोन आत्मनिर्भर तासेला आरे । ह्युलला शासकजुगु नेपाल थेन नेपाली ह्युल्बाला बिमा नोन फिरग्याप ह्युलला बाङ मुबा राष्ट्रजुगुला स्वार्थ छ्योना लाबारि वाङ्जि । नेपाल थेन नेपाली ह्युल्बाजुगुदा ताबा मर्काफिर नेपाली शासकजुगु भारत थेन अमेरिकाला ओन्छाङ तिलाइ आबि, बिबा हिम्मत आला ।
स्यान्दो म्राङ्सि लोङ्बा शासक दलजुगुसे ह्युल स्होबा आहिन ह्युल ब्लुम्बा गे लाचिबा मुला । कम्युनिष्ट पार्टी श्रमजीवि वर्गला हकहितला लागि पयत्नशील तातोला । ह्युलला सार्वभौमिकता, भूअखण्डता थेन स्वतन्त्रता सोना लाबा गेरि समेलासि वाङ्तोलामुला । शोषित पीडित ह्युल्बाला संघर्षरि बिले गेलाबा वर्गला न्यायपूर्ण संघर्षरि ह्रो पिन्तोला । ऐक्यबद्धता उन्तोला । मुतेबा देन्बा कम्युनिष्टजुगु अन्तर्राष्ट्रियवादी ताला । अन्तर्राष्ट्रिय भावना आन्सार फिरग्याप ह्युलला नाङ्बा प्लेबा, हस्तक्षप, शोषण थेन दमनला लिब्रो लातोला । कम्युनिष्ट पार्टीसे वर्गशत्रु ताङ्ना लाबा गे आला ।
वामपन्थी अवसरवाद थेन दक्षिणपन्थी अवसरवादला लिब्रो लातोला । ग्लेठिमदा निस्वार्थ लिरि इमानदारीपूर्वक ह्युल थेन ह्युल्बाला सेवारि समर्पित लातोला । अराजक, आत्मसमर्पण, संकीर्ण र जातीय साम्प्रदायिक भावनाला निन्दा थेन लिब्रो लातोला । भ्रष्टाचार लिब्रो आन्दोलन थेन जालीफटाहा लिब्रो आन्दोलनला मर्म आत्सामत लासि गन्तब्यरि ओन्छाङ वाङ्तोला । ग्यालाम उन्बा (मार्गनिर्देशक) सिद्धान्त आन्सार पार्टीसे गे लातोला । सिद्धान्त थेन विचार बन्धक थान्सि गे लासाम ह्युल ख्योल्बा ग्लारि दोला, ह्युलरि अराजक थेन अस्थिरता खाला । शासकजुगु न्होर थेन बोठाबारि कोल्सि ह्युल्ला आर्थिक अवस्था आज्याबा तासिकेन आर्थिक संकट म्राङ्जि बिसाम ह्युल खाराङ लासि स्होला ? चुकारण ग्लेठिम थोबा दलला सिद्धान्त थेन विचार बहुमत ह्युल्बाला पक्षरि तातोला ओम थेआन्सार गे लातोला बिले ग्लेठिम स्होतोला ।
काभ्रे
