(नोट : सिनेमा च्याजिन्मा हेन्से ङाइ ‘च्याबा राप (हेर्ने कथा)’ ला याखारगि बोरि फिचर ‘जोगे लोहारला कोला’ दा नोन डान्चिबा मुला होइ ।)’
‘पुर्ण बहादुरको सारङ्गी’ तिनि च्याजि । शो दान्नाइ दान्नाइ आयाङ्बा । खामआखाम सबा दुइला शो याङ्जि । सिटीसी मल, सुनधारारि । सचिनजीदा टिकटला प्रबन्धला लागि थुजेछे ।
सिनेमाला शिर्ष ह्वाइ थेन ट्रेलरसे किसिम गिला भावनात्मक उद्देलन ह्राङ्बा छोर्ना लामुबा । थेतासि च्याबारि खालगिला हुटहुटी नोन मुबा । आस्सोनमि साम्हिला रापजुगु आउदिन च्याङ्ना ब्रिबाला मुला÷उन्बाला मुला । ब्रिबा÷उन्बा राप÷स्हुजुगु नोन अतिरन्जित लासि, कादे दुइरिम थे वर्ग÷समुदायला अस्तित्व नोन अपमानित ढंगसे प्रस्तुत नोन लाबाल मुला । चु अर्थरि, क्योइबाला (तुलनात्मक) हिसाबसे ‘पुर्ण बहादुरला सारङ्गी’दा ङाइ सचेत प्रयन्त म्हान्बा मुला । चु सिनेमा कमर्सियल मुभी मेकिङलालान बो (हिस्सा) तासाइ नोन चुसे खाजिबा समुदाय÷वर्गला राप पाङ्बा मुला, थे म्हिजुगुसे ह्राङ्ला आत्सम्मानला लडाइला लागि लाबा मिहेनत प्रयत्नजुगु, अपमान थेन लेबाफेबा लिब्रो थेन्से लाबा संघर्षजुगुदा सुताइ सम्मानजनक ढंगसे चित्रण लाबा मुला ।
समाजरि मुबा जात व्यवस्था, वर्गीय ह्वाङ, लैकिङ लेबाफेबादा नोन आम्राङ्बास्हो लाबाजुगुला लागिमि चु सिनेमा नोन ‘फगत आर्ट मुभी’ जेक्खे मुसिम, तासाइ नोन सचेत प्रयत्नला छ्याम ह्राङ्ला बोला लडाइरि आत्म स्वीकृति थान्सि तागाइ ह्वा प्रतिरोधला ग्योइ पाङ्सि, बो किन्बा आकिन्बा सेम लाबाजुजुला लागि चु सिनेमा याखारगि ऐना नोन हिन्ना ।
प्रगतिशील÷क्रान्तिकारी ताबाला ट्याग थोइसि आब्लाप्बा तासाइ रेदाङसेला केवारि थेनोन साम्हिजुगुला कु नाङ्बाजुगुदा नोन चु सिनेमा गतिलो झापड हिन्ना । ‘साम्हिला लागि ग्लेठिम’ बिबा भाष्य वकालत लासि खाइमाइ आब्लाप्बा तासाइ नोन थेनोन साम्हिसे म्हाङजुगुला चाम क्रेबा प्रयत्न लामा, ह्राङ्से याङ्बा विशेष अधिकार म्हासेला लोङ्बासे थेनोन म्हाङजुगुदा च्यार्बा प्रवृत्तिला मुखुण्डो स्युपिन्बा गे नोन चु सिनेमासे लाबा मुला ।
ल्हानासे चुदा आपा कोलाला सम्बन्धला राप जेक्खे बिसाइ नोन देन्बारि चु नुप्बा (गहिरो) वर्गीय ह्वाङ स्होबा समाजरि पिल्सप ताबारि बाध्य ताना लाबा ‘निम्न वर्गीय’ आपा कोलाला राप हिन्ना । खाजिबाइ याखारगि जाती वा समुदायरि केबालान आधाररिन पुस्तौंहेन्से थेनिफिरि कथित डोबाब्रिबा, नोबा जातीय, नोबा वर्गीय थेन ह्राङ्दा प्रततिशील दाबी लाबा तप्कासे जबरजस्त लेबाफेबा पुस्तान्तरण लाबारि म्हाइचिमा थेतान ओतेबान जबरजस्त ढंगसे प्रतिरोध लाबा हरसम्भव प्रयत्नरि ल्हागतिबा याखारगि दृढ संकल्प सोना लासि थान्बा आपाला राप हिन्ना । बिले जब्बर जात÷वर्ग व्यवस्था लिब्रो ह्राङ्ला बाङ्से खाम्देदोना प्रतिरोध लाचिबा लडाकु आपाला राप हिन्ना ।
चु जब्बर दासताला ओन्छाङ आत्मसमर्पण लाजिन्बा आपाजुगुदा म्हाङ म्राङ्बारि छिङ्बा आमाला नोन राप हिन्ना । तासाइ नोन सताब्दिछा हेन्से थेनिकादेला अस्तित्व जेक्खे ‘म्रिङ्कोला’रि सिमित मुला थेन्ना विचार थेन चेतना नोन ‘फजुल तामजुगु’रि सिमित लाथान्बा मुला । चु थे मुतेबा जामेकोलाजुगुला रापला याखारगि अंश नोन हिन्ना थेन्ना बिद्रोही ल्हामजुगु सातान सातान काङ्फ्लाला धुलो दिरिमार नाङ्थान्बा मुला ।
दारे लाइ मानवीय संवेदनाला ताम :
ह्राङ्से छिग ङो आसेसाइ नोन ह्राङ्ला सन्तानसे डोगाइ, ब्रिगाइ ओम ब्लाक्पा जाम्बुलिङ म्राङ्गाइ बिबा दृढ संकल्पला पुर्ण बहादुरला जाजाबा प्रयत्नजुगु, आपा म्हेमेसे भोगतिबा लेबा थेन तिरस्कार खाबा पुस्तारि पुस्तान्तरण आतागाइ बिसि प्रतिवाद लाचिबा आमा, आपा आमाला आशाला नाङ्साल कमल गन्दर्भ थेन थेनि गुङ्ला तामसे अन्तस्करण दोना थुर्सि निला ।
प्राविधिक तामचा ङा ह्राङ्सेन ओते आगो, तासाइ नोन, विजय बरालसे स्यान्दो मुभीजुगुरि याङ्बा भुमिका म्राङ्मा थे टाइप कास्टला सिकार दोमुवा बिबा छोर्चिमुबा । तासाइ ‘पुर्ण बहादुरला सारङ्गी’से थेला अभिनय कौशलताला उत्कृष्टतादा नोन ह्याङ्ला गुङरि एभिबकबलत कगचउचष्कभ ला लिरि थानपिन्बा मुला ।
मोक्कोन आपा आमादा छोर्बा मुसिम, ह्राङ्ला सन्तानसे ह्राङ दोबारि आखाम्बा गन्तव्यरि दोगाइ । ह्राङ्से याङ्बारि आखाम्बा ताङ्बा, सहजता, मान सम्मान थेन प्रतिष्ठा याङ्गाइ तासाइ उत्पीडित वर्ग समुदायला म्हिजुगुला म्हाङ्ला आयतन काथेबा ताला ? रहरजुगुला फ्याङ्बा कादे ब्लाक्पा ताला ? राज्यला नीतिसे संस्थागत लाबा संरचनागत प्लेबानाङ्बासे थेदा कादे ब्याप ब्लाक्पारि (फैलाउन) पिन्ना ? चु मुतेबा ताम गोबारि नोन ‘पुर्ण बहादुरला सारङ्गी’ च्यास्ह्युगो ।
दोःबा : यकिना अगाध
