निबा म्हेनिङ (असोज) १०–१२ गतेदोना ताइबा नामग्याम खाबा होन, डुइग्याम ल्हुइ डोङ्बा दिमम्हे थेन डुइग्याम प्रभावितजुगुदा नेपाल तामाङ घेदुङला ह्रोगे थेन अन्तर्राष्ट्रिय तामाङ परिषद्ला समन्वयरि राहत बोलाजि लाजि ।
कार्तिक २० गते काभ्रेला तेमाल गाउँपालिका वडा नं. १,२,४,७ दिमम्हे थेन नमोबुद्ध नगरपालिकाला वडा नं. ५ ला ङोङ्बा दिमम्हेदा म्हिदाङ्से २४ हजार रुपैयाँ न्होर राहत बोलाबा हिन्ना । डुइग्याम प्रभावित दिमम्हेदा ३ हजार ५ सयला बोसे राहत बोलाबा मुबा । राहत परिषद्ला ग्रेनगौराइ टासी लामा थेन घेदुङला ग्रेनगौराइ जगतमान लामा दोङसे गिक्खे लिरि (संयुक्त रुपमा) पिन्मुबा ।
घेदुङला क्योलोलो चिबा सचिवालय चिसाङसे होन, डुइग्याम आउदिन प्रभावित काभ्रेला रोशी, तेमाल, बेथानचोक, नमोबुद्ध थेन ललितपुरला कोन्ज्योसोम, महांकाल थेन बागमती गाउँपालिकाला डोङ्बा दिमम्हेदा राहत बोलाबा निर्णय लामुबा ।
नेपाल तामाङ घेदुङ थेन अन्तर्राष्ट्रिय तामाङ परिषद्तेन छ्याम मुबा ल्होलो गेन्दुन थेन नेपाल तामाङ घेदुङला ग्रोइपा थेन कार्यसमिति छ्याम लासि क्योङ रु. १७,१८२९०।– (छिगरि सत्र लाख अठार हजार दुइसय नब्बे जेक्खे) न्होर पोप लाबा मुबा ।
डोङ्बा दिमम्हेदा राहत बोलाबाला लागि घेदुङला विपद् डिबा (व्यवस्थापन) समितिला मुल्मि हिरालाल तामाङ, घेदुङ काभ्रेला चोहो राजकुमार तामाङ, गौराइ निमा ब्लोन, घेदुङ इजरायलला ह्रोचोहो कुमारी गाल्देन, तामाङ समाज जापानका प्रतिनिधि दिपेन्द्र योन्जन, घेदुङ तेमाल गाउँपालिकाला चोहो इन्द्रजीत लोप्चन थेन स्योमि (पत्रकार) अनिस तामाङ नोन गेताङरि दोबा मुबा ।
चु अभियानदा घेदुङ इजरायल, घेदुङ रोमानिया, नेपाल तामाङ समाज जापान, तामाङ समाज पोर्तुगल, तामाङ समाज युके, तामाङ समाज बेल्जियम, घेदुङ मलेशिया थेन प्रवासी सृजनशील महिला समूह इजरायलसे ह्रोलाबा मुबा ।
चु मुतेबा ह्रोलाबा गेन्दुनजुगुदा घेदुङला संघीय गेदिम, याम्बुसे विशेष थुजेछे फुल्बा मुला ।
काभ्रेला रोशी, बेथानचोक, ललितपुरला कोन्ज्योसोम, महहांकाल थेन बागमती गाउँपालिकाला डोङ्बा दिमम्हेदा तिलाइ रेलिच्छा राहत बोलासे घेदुङला ग्रा मुला ।
