स्याप्तेबा क्योङ ज्योमो थेन लादा मोलम ह्रिसि ब्राबा
परम्परावादी रुढग्रस्त समाज पोबारि आम्हाइबा
थेरिन आउदि ताङचिबा
अपराधी डनसेह्राङ असुली लासि तोतेबा छासि ब्राबा
म्लाङ कर्तुत छुम्बारि, गुटला क्लाङरि वाङ्रि
पार्टीदा मेफ्रा दोना लासि ब्लुम्बा
समावेशीला आउदिन बखान लासि भाषण छेप्बा
पार्टी लाईनला मि च्युम्सि बखान लासि कोल्ना लाबा
तासाइ,
थुर्बाफेबा थेन जातीय तोरमारदान सर्वमान्ने सिद्धान्त तेन्बा
जामेकोलादा कमजोर म्हान्सि आज्याबा दृष्टि थान्बा,
यौन दुरुत्साहन लाबा मर्दला बहादुरि म्हान्बा
दलाली आलाना जि हजुरी आलाना ङ्हुबा आखाबा
जामेकोला फिरि सातान लेबाफेबा लासि
ङ्हाच्छा वाङ्बारि काबा
ङ्हाप्बा, दुल्बा, भ्रष्टाचार, ठगि थेन कमिसनला गेरि
क्राफुइदोना ब्लुम्बा
मैमत्ता अपराधी चु खाराङ्बा खालला कम्युनिष्ट
चु खाराङ्बा अनौठो समाजवादी ?
चु मुतेबा वर्ग बैगुनदा नुप्ना लाबा ग्रानफासि
तेन्बारि लोप्के जाम्बुलिङ ह्योङ्बा
देन्बा समाजवादी
अक्टोबर क्रान्ति ।
(कार्तिक २१ गते, सन् ७ नोभेम्बर, अक्टोबर क्रान्ति दिबस)
दोःबा : यकिना अगाध
