ङा थारेङला फिरग्याप ह्युलरि फाप्बा मुला ।
ह्राङ्ला ताङ्बाससे जेक्खे आहिन !
जाजाकि बाध्यता
जाजाकि लालच
जाजाकि महत्वकांक्ष थोसि खाबा
ल्हुइ जेक्खे थोसि सोबा मुला
बु मुबा मेसिन ह्राङ्बा दोसि
सेममि थेरिक्यार नोन मुला ले…
अन्तरी नाना एतेन छ्याम नोन
ङा फुइबा, ए फुइबा
ङाला ह्युल हिन्ना बिसि पाङ्बा हक थोबा
ग्लाला प्रिय नाम्सारि ।
अन्तरी नाना…
थोपसाङ्से डुइसि दोगाना लाबा
चु स्यान्दोला ङोआसेबा ग्लारि
ज्युम ङेबाकेन लाबा ज्योमोगाङ आरे ।
ज्योमोगाङ्ला कुरि सोचिबा
ग्यु थेन चौरी छाबा ब्लाक्पा पिङ खर्क आरे ।
पिङ्पिङ्बा गाङजुगु
टेलिभिजनला स्क्रिनरि म्राङ्ला ।
मु थुर्बा महलजुगु टन्न मुला
तासाइ सुखला ङ्हुबा आरे ।
आधुनिकताला होेडबाजीरि
ल्होलो ल्होलो आश्चर्य मुला
क्युइ दिरि जेबा बस्ती मुला
मु थुर्बा आँट थोबा
खलिफाजुगु नोबाकेन मुला ।
तासाइ सेमरि शान्ति आरे ।
ह्याङ्लारिक्यार ह्राङ
सा थुर्बा खाज्युलसे न्हान्बा सादिम
गुन्द्रिरि म्हेर्मा
छिङ्गाइ साप्रा थेन म्हेख्लिला तिक्खर थाङ
खाइ खानाङ हिन्ना ! खानाङ..
अन्तरी नाना…
सेमरि विरहला खासु छ्याबा मुला
भावनारि खडेरी ल्हागतिबा मुला ।
लोङ्खेप्पा खण्डहर ह्राङ तासिकेन निबा
अधवैंसे म्हाङजुगु
मरुभुमिला वाला बालुवातेन फ्याङ्सि
थारेङ–थारेङ थोबाकेन मुला ।
ह्याङ्लारिक्यार नोन फेबा दिनि लानि
चुरिक्यार नोन फेला ।
तासाइ नोन ह्याङ्लारिक्यार ह्राङ्बा ताङ्बा आस्याप
योला ह्यालालारि
ङ्यासेला दोपोपोरि ।
अन्तरी नाना…
ए छाइला छाङरि
आउदिन ज्याबा छेला दोइ पुइसि
उजेली म्हेला सेम ताङ्ना लाबाकेन मुला
ङा
गैंती थेन बेल्चा चलाप लाबाकेन
ङाला हिन्ना बिबा हक आरेबा बालुवा घारी
सिंगार तिसि
मनमोहक स्मारक स्होबाकेन मुला !
पाँचखाल, काभ्रे ।
दोःबा : यकिना अगाध
