ओइ सरकार !
मानवता ङान्ना विचार जेक्खे आहिन
ह्रिक्पा थेन कर्म नोन हिन्ना,
पीडित थेन विचल्लीरि
ताबाजुगुदा ह्रोलाबा
ङान्ना मानवीय धर्म हिन्ना ।
किन्जि एसे मतदानरि पक्ष
रुस लिब्रोला अमेरिकी छद्म युद्धला,
किन्जि एसे पक्ष
युक्रेनी छारनाजीवादला,
लाजि एसे समर्थन
अमेरिकी प्रोक्सीवारला,
बोजि एसे धम्कीरि
सार्वभौम ह्युलला
तटस्थ फिरह्युल (परराष्ट्र) नीति नोन ।
आपङ्नि एसे
संयुक्त राष्ट्रसंघरि
गुङस्यार (मध्यपूर्व) ला लुङ्चिबा
अमानवीय नरसंहारला
मे सेबा पक्षरि,
आम्राङ्बास्हो (उपेक्षा) लाजि एसे
गाजापट्टीरि ताचिबा
इजरायली फासिवादला
नरसंहार थेन बर्बरताला,
च्याबारि आम्हाइनि एसे
जातीय सफायाला
मेरि क्रोचिबा
थे प्यालेस्टिनी
म्रिङ्कोला थेन बिजाबुमोजुगु,
आम्राङ्नि एसे
क्योङ प्यालेस्टानइन
म्हि सेबाग्ला (मानव वधशाला) दोबा दृष्यजुगु ।
पीडकदा कुरि
पीडितदा ब्लेरि लाबा,
चु खाराङ्बा मानवता ? सरकार एला !
आलानि एसे
राष्ट्रसंघरि मतदान
दशक डु बिमा ह्रेङ्बा
क्युबाफिरि अमेरिकी साम्राज्यवादला
अमानवीय नाकाबन्दी हेङ्बा (हटाउने) पक्षरि,
आलानि एसे लिब्रो
समाजवादी ह्युल
प्रजग कोरियाफिरि
साम्राज्यवादी अमेरिकाला
अमानवीय नाकाबन्दीला,
दोजि ए
अमेरिकी साम्राज्यवाद थेन
भारतीय विस्तारवादला
कुल्बा ङ्यान्बा (आज्ञापालक) जेक्खे ।
दोसि एसे ह्राङ्दा बिला
कम्युनिष्ट थेन प्रजातन्त्रवादी नोन,
आकिन पक्ष न्याय थेन मानवताला
आला लिब्रोरि संघर्ष
साम्राज्यवादी थेन विस्तारवादी
प्लेबानाङ्बा
अन्याय थेन अत्याचारला ।
खानाङए शासक नेताजुगुला
कम्युनिष्ट थेन प्रजातन्त्र छिग
ट्रेडमार्कमि सावित ताबाम आहिन ?
थेतासि,
ओइ ङाला ह्युलला सरकार
ङाइ एदा तिला बिसे ?
मानवतावादी बिगे कि अमानवीय बिगे ?
साम्राज्यवादला ता बिगे कि नेपालला प्रतिनिधि बिगे ?
काभ्रे
दोःबा : यकिना अगाध
