‘ह्वाइखा, गेङ्ह्राङ्बान, क्योङ म्हिला लागि ताला’
–रोखे दाल्तोन, अल सल्वाडोरला क्रान्तिकारी ह्वाइखाब्रिखेन
गेङ्से फोला फोइदान म्हाना लाल, ह्वाइखासे ह्याङ्ला सांस्कृतिक–आध्यात्मिक ख्रेन्बा म्हाना लाला । चुगुङरि गिक्छा फोख्रेन्बा जैविक हिन्ना, आदिम हिन्ना । ङ्हिछा फोख्रेन्बा देन्बा अर्थरि ‘मानवीय’ हिन्ना, म्हिला मुतेबा ऐतिहासिक विकासला उपहार हिन्ना । समस्या चु हिन्ना कि वर्ग फेबा समाजला श्रम फेबासे केना लाबा अलगाव, विसांस्कृतिकरण थेन विमुखीकरणला सार्वभौम परिघट्नासे बहुसंख्यक जनसंख्याग्याम थेला सांस्कृतिक–आध्यात्मिक फोख्रेन्बाला अनुभूति नोन ह्योलाबारि खाम्ला ।
स्यान्दो, खाइमा फोला ख्रेन्बा थेन आधारभूत आवश्यकताजुगु छ्योना लाबारि नाख्रुजुगु म्ह्युना लातोबा ताला, थेदुइरि सांस्कृतिक ख्रेन्बा सिला वा विकृत ताला । ख्रेन्बाजुगु गेङला लागि देबाःन (सजिलोसँगै), स्वचालित लिरि छेबारि तयार ताला, तासाइ वास्तविक अर्थरि मुतेबा मानवीय व्यक्तित्वसे प्लिङ्बा म्हि समाजला स्हेङ्बाला ह्रेङ्बा लडाइला लागि, मानवताला आवश्यकताला राज्यग्याम ह्राङ्बाङ्ला राज्यरि संक्रमणला ह्रेङ्बा लडाइला लागि, व्यक्तला मुतेबा व्यक्तिगत ह्राङ्बाङ्बा थेन मौलिक व्यक्तित्वला लागि तोबा शोषणमुक्त सामाजिक संरचना थेन सामुहिकताला थारेङ लिउदोनाला ल्हाम लाबा मुतेबा दीर्घकालीन संघर्षला लागि जेक्खे थेदुइरि जेक्खे ह्युल्बा तयार ताबारि खाम्ला, खाइमा थेन्दा विस्मृतिग्याम मुक्त लाला, थेन्दा म्हाङ थेन कल्पनाजुगु पिन्ना, थेन्दा ह्वाइखासे नोन ख्रेन्बा खाना लाला ओम थेलिच्छा थेरि ख्रेन्बा म्हाना लाबारि तोबा डिछ्या लाला ।
क्योङ्से ह्वाइखा म्ह्याङ्बारि म्याङ्बा जाम्बुलिङ दातेइ थारेङ मुला । तासाइ थेह्राङ्बा जाम्बुलिङ्दान ङामरि बाबा काव्यात्मक संघर्षरि नुप्बा काव्यात्मक तिङ्से अनर्थक प्रयास लाबारि खाम्ला । थेतासि चु काव्यात्मक लडाइला भागीदारजुगुला लागि ह्वाइखा याखारगि मुलभूत आवश्यकता हिन्ना । चु थेन्ना नोन आवश्यकता हिन्ना थे चु लडाइरि आंशिक भागीदारी लाला बिले चुदा तोबा म्हान्ना ओम समर्थन पिन्ना, बिले च्याङ्नारि चुफिरि सहानुभूति थान्ना ।
ह्वाइखा थे लडाइरि निरन्तर सार्थक भागीदारीला आवश्यकता हिन्ना, खाजिबा लडाइरि ह्वाइखाला पुनस्र्थापना लाबाला लागि हिन्ना । ह्याङ सचेतन प्रयासजुगुग्याम म्हिजुगुरि कादे हददोना ह्वाइखाला आवश्यकताला अनुभूति केना लाबारि खाम्गे, थेनोन हददोना थेह्राङ्बा म्हिजुगुला संख्या ल्हेना लाबारि सफल तासेला मुला, खाला बिजनरी ताला, कल्पनाशील ताला ओम दातेला ब्रेबा दुइग्याम निरास आताना, ख्योल्बा (गल्ती) ग्याम लोप्बान, चुह्राङ लासि लडप ताचिला, बिले इन्क्लाब थेन्ना लागि जेक्खे याखारगि उद्देस्य आहिन तासाइ केवा (जीन्दगी)ला तरिका हिन्ना । वास्तविक दुइ चुनोन हिन्ना कि, ‘ह्वाइखा गेङ ह्राङ्बान, क्योङ म्हिला लागि ताला ।’
ह्याङ्ला युगला विडम्बना चु हिन्ना कि बहुसंख्यक जनसंख्यारि चु तामला ग्युइ आरे । चोदे थेनिकादेसे सेबा मुबा हिन्साम, चुदा पाङ्चि आतो, तिल्दाबिसाम चु सामान्य ताम हिन्ना । ह्याङ्से निरन्तर म्हिजुगुदा चु तामला अनुभूति ताना लातोसेला मुला । चुरि ह्याङ कादे हद दोना सफल ताला, ओते हददोना अन्यायपूर्ण संरचना लिब्रो लडप ताबाजुगुला रेखा ल्हेना लाबा थेन थे लडाइला सामाजिक समर्थनला देन (आधार) दा ल्हानाबिमा ल्हाना ल्हेना लाबा अवसर याङ्ला ।
(कविता कृष्णपल्लवी भारतला चर्चित ह्वाइखाब्रिखेन हिन्ना ।)
हिन्दीग्याम दोःबा : यकिना अगाध
